Latest Post


कोपरगाव श. प्रतिनिधी :

शहरातील कलश मंगल कार्यालयात ‘नवरात्र उत्सव- जागर स्त्री शक्तीचा जागर अंबेचा’ या उपक्रमांत आ. स्नेहलता कोल्हे यांच्या प्रमुख उपस्थितीत सामुदायिक दुर्गा सप्तशतीचा पाठ घेण्यात आला. यावेळी वृंदा को-हाळकर व त्यांच्या सहका-यांनी अंबेच्या अष्टरूपांचे सादरीकरण करून दुर्गाशक्तीचा जागर व आशिर्वाद जोगवा हा बहारदार कार्यक्रम सादर केला. रात्री रासदांडिया व गरबा पार पडला. कोपरगांव तालुका औद्योगिक वसाहतीचे अध्यक्ष विवेक कोल्हे यांच्या पत्नी रेणुका कोल्हे यांची उपस्थिती होती. याप्रसंगी कोपरगांव नगरपालिकेच्या सर्व नगरसेविका, महिला भाजपा तसेच युवा मोर्चा पदाधिकारी, आजी माजी पदाधिकारी युवती मोठया संख्येने उपस्थित होत्या.


मुंबई  : जी शस्रास्र सुरक्षा यंत्रणा वापरत नाही अशी शस्र संघाकडे कशी आहेत, असा सवाल करत भारिपचे अध्यक्ष प्रकाश आंबेडकर यांनी राष्ट्रीय स्वयंसेवक संघ आणि सरसंघचालक मोहन भागवत यांच्यावर हल्लाबोल केला. पोलिसांनी मोहन भागवत यांच्यावर कारवाई करत मोक्का लावला पाहिजे, अशी मागणीही प्रकाश आंबेडकर यांनी मुंबईतील पत्रकार परिषदेत केली.


‘संघाकडे गन्स आणि एके ४७ आहेत. जो कायदा माओवादी आणि दहशतवाद्यांना लागू होतो तो संघाच्या लोकांना का नाही, असा सवाल करत आंबेडकर यांनी पोलीस यंत्रणेलाही धारेवर धरलं. आमचा पूजेला विरोध नाही तर शस्त्र बाळगण्याला विरोध आहे, असं म्हणत त्यांनी आपली भूमिका स्पष्ट केली.


श्रीरामपूर / प्रतिनिधी 

आघाडी सरकारच्या काळामध्ये सुरु झालेल्या गोदावरी नदीवरील नागमठाण पुलाचे बांधकाम सुरु होऊन बंद पडले. या कामासाठी सरकारचे ५ ते ६ कोटी रुपये मृतावस्थेत पडले होते. मी जनतेसाठी पुढचा प्रयत्न करुन पैसे उपलब्ध करुन दिले आहे. त्यामुळे नागमठाण पुलाचे काम पावसाळ्यापूर्वी पूर्ण होणार आहे, असा विश्वास महाराष्ट्र विधानसभा अध्यक्ष हरिभाऊ बागडे यांनी व्यक्त केला. 

नागमठाण येथे आयोजित गोदावरी नदीवरील पुलाच्या बांधकाम भूमीपुजनप्रसंगी आयोजीत कार्यक्रमात बागडे बोलत होते. राज्याचे विधानसभा विरोधी पक्षनेते राधाकृष्ण विखे यांच्या हस्ते व सराला बेटाचे मठाधिपती रामगिरी महाराज यांच्या आशिर्वादाने संपन्न झालेल्या या कार्यक्रमास आ. भाऊसाहेब चिगटगावकर, आ. भाऊसाहेब कांबळे, मराठवाडा वैधानिकविकास मंडळाचे अध्यक्ष डॉ. भागवत कराड. पंचंयात समतीचे सभापती दीपक पटारे, जि. प. सदस्य अविनाश गलांडे, पं. स. सदस्या मुक्ता डांगे, भाजपा जिल्हाध्यक्ष एकनाथ जाधव, सा. बां. विभागाचे अधिक्षक अभियंता खंडेराव पाटील, अधिक्षक अभियंता अतुल चव्हाण, नागमठाण पुल कृती समितीचे कार्याध्यक्ष व उद्योजक बाबासाहेब काळे, अध्यक्ष भगवान तांबे, केशव उद्योग समुहाचे केशवकुमार काळे आदी उपस्थित होते. आ. भाऊसाहेब चिगटगावकर, आ. भाऊसाहेब कांबळे, मराठवाडा वैधानिक विकास मंडळाचे अध्यक्ष डॉ. भागवत कराड आदींची यावेळी भाषणे झाली. सूत्रसंचालन आकाशवाणीचे निवेदक संतोष मते यांनी केले. यावेळी ग्रामस्थ मोठ्या संख्येने उपस्थित होते. अधिक्षक अभियंता अतुल चव्हाण यांनी आभार मानले.


कराड (प्रतिनिधी) : पोलीस खात्यात बॉम्ब स्कॉड व डॉग स्कॉड येथे नोकरीस असल्याचे सांगून वडाप चालकाने कॉलेज युवतीची फसवणूक केली. तिच्याशी लग्न करण्याचे आमिष दाखवून तिला 38 हजार रुपयांना गंडा घातला. आपली फसवणूक झाल्याचे लक्षात येताच संबंधित युवतीने कराड शहर पोलीस ठाण्यात तोतया पोलिसांविरोधात तक्रार दिली आहे. सागर यशवंत बोत्रे (रा. बोत्रेवाडी, कुंभारगाव, ता. पाटण, जि. सातारा) असे पोलिसात गुन्हा नोंद झालेल्या तोतया पोलीस पोलिसाचे नाव आहे.
 
याबाबत पोलिसांनी सांगितले की, कराड परिसरातील एक युवती पुणे येथे कॉलेजला आहे. तिचे नेहमी गावाकडे येणे-जाणे होते. 17 सप्टेंबर रोजी ती पुण्याला जाण्यासाठी कराड येथे कोल्हापूर नाक्यावर थांबली होती. त्यावेळी कार घेऊन एक जण तेथे आला. त्या कारमध्ये तीन लोक व चालक बसला होता. चालकाने कुठे जायचे आहे असे संबंधित युवतीला विचारले. त्यावर त्या युवतीने वाकड-पुणे येथे जायचे असल्याचे सांगितले. त्यामुळे चालकाने त्या युवतीला कारमध्ये घेतले व कार पुण्याच्या दिशेने निघाली. प्रवासात सागर बोत्रेने आपले नाव सांगितले व युवतीचा फोन नंबर घेतला. युवती पुणे येथे उतरल्यानंतर तो मुंबईला निघून गेला. त्यानंतर सायंकाळी त्याने फोन वरून संपर्क करून माझ्या ओळखीवर लालबागच्या गणपतीचे दर्शन घडवितो, असे युवतीला सांगितले. त्यानुसार संबंधित युवती आपल्या मैत्रिणींसह मुंबईला गेली. तेथेही त्याने आपले ओळखपत्र दाखवून गणपतीचे दर्शन घडविले. ओळख वाढल्याने संबंधित युवतीला कराडपर्यंत सोडण्यासाठी सागर बोत्रे येत होता. तसेच त्याने संबंधित युवतीच्या आई-वडिलांचीही ओळख करून घेतली होती. एके दिवशी पुणे येथे कॉलेजवर संबंधित युवतीला भेटून सागर बोत्रे याने मी तुझ्याशी लग्न करणार असल्याचे सांगितले. मात्र, त्यावेळी सदर युवतीने आई-वडिलांना विचारून निर्णय सांगते, असे सांगितले. त्यानंतर 18 सप्टेंबर रोजी पाकीट हरवले आहे, असा बहाणा करून सागर बोत्रे याने कॉलेज युवतीला आपल्या बँक खात्यावर दहा हजार रुपये ट्रान्सफर करण्यास सांगितले. त्यानुसार या युवतीने बोत्रेच्या खात्यावर रक्कम ट्रान्सफर केली. त्यानंतर 21 सप्टेंबर रोजी पैशाची गरज आहे, दुसर्‍याला द्यायचे आहेत, असे सांगून कॉलेजवर युवतीला भेटून तिच्याकडून एटीएम कार्ड व पासवर्ड मागून घेतला. त्याच दिवशी त्याने युवतीच्या एटीएम मधून 21 हजार रुपये काढून घेतले. त्यानंतर एके दिवशी घरी येऊन त्याने संबंधित युवतीच्या आईवडिलांशी युवतीच्या लग्नाच्या अनुषंगाने बोलणी सुरु केली. परंतु, आई-वडिलांनी चौकशी करून कळवतो, असे सांगितले. त्यामुळे सागर बोत्रे पुन्हा गाडी घेऊन मुंबईला निघून गेला. जात असताना त्याने एटीएम संबंधित युवतीला परत दिले नाही. त्यानंतर 25 सप्टेंबर रोजी पुन्हा सागर बोत्रे याने कॉलेज युवतीच्या एटीएम खात्यावरून सात हजार रुपये काढून घेतले. त्याचा मेसेज मोबाईलवर आल्याने सागर बोत्रे यांच्या विषयी युवतीला संशय आला. त्यामुळे संबंधिताच्यावतीने सागर बोत्रेच्या आई, वडील, मैत्रीण यांच्याकडे चौकशी सुरू केली. त्यावेळी सागर बोत्रे पोलीस खात्यात नोकरीला नाही, तो प्रवासी वाहतूक गाडीतून वडाप करतो. त्याने सांगितलेली ओळखही खोटी असल्याचे निदर्शनास आल्यानंतर संबंधित युवतीने एटीएम कार्ड व पैसे परत आणून देण्यासाठी तगादा लावला. परंतु सागर बोत्रे यांने टाळाटाळ केली. त्यामुळे आपली फसवणूक झाल्याबाबतची तक्रार संबंधित युवतीने शनिवार दि. 13 रोजी कराड शहर पोलिसात दिली आहे.


सातारा (प्रतिनिधी) : दारू पित असताना अपशब्द वापरल्यानंतर तिघांमध्ये बाचाबाची होऊन नेलकटरमधील चाकूचा वार झालेला समीर हरिश्चंद्र बनसोडे (रा. पिलेश्वरीनगर, सातारा) या जखमीचा उपचारदरम्यान मृत्यू झाला. शाहूपुरी पोलीस ठाण्यात याप्रकरणी महादू पवार (रा. करंजे) याच्याविरुध्द खुनाचा गुन्हा दाखल झाला आहे. याप्रकरणी मिलिंद लक्ष्मण गायकवाड (रा. करंजे) यांनी पोलीस ठाण्यात तक्रार दिली आहे. 

याबाबत मिळालेली अधिक माहिती अशी, दि. 7 ऑक्टोबर रोजी सायंकाळी तक्रारदार मिलिंद गायकवाड व त्यांचा मामेभाऊ समीर बनसोडे हे दोघे राधिका रोडवर दारू पिण्यासाठी गेले होते. यावेळी त्याठिकाणी असलेल्या महादू पवार याने अपशब्द वापरल्याने समीर याच्याशी वाद झाला. हा वाद मिटवल्यानंतर तक्रारदार मिलिंद गायकवाड तेथून निघून गेले. महादू पवार याने सव्वासातच्या दरम्यान समीर बनसोडे यांना फोन करून पुन्हा एसटी स्टँड परिसरात बोलावले. झालेल्या भांडणाच्या कारणातून महादू पवार याने नेलकटरमधील चाकूने समीर याच्या पोटावर वार केले. या घटनेत जखमी झालेल्या समीर याला सिव्हिलमध्ये दाखल करण्यात आले होते. दि. 12 रोजी समीर यास पुन्हा त्रास होऊ लागला. त्यानंतर त्यांना पुन्हा उपाचारासाठी रुग्णालयात दाखल केले होते. दरम्यान, दि. 14 रोजी उपचार सुरू असताना समीर यांचा मृत्यू झाला. संशयित महादू पवार याने चाकूने वार केल्याने मृत्यू झाल्याचे समीर बनसोडे यांच्या कुटुंबियांनी आरोप केले. त्यानुसार शाहूपुरी पोलीस ठाण्यात महादू पवार याच्याविरुध्द खुनाचा गुन्हा दाखल झाला आहे.

राहुरी / प्रतिनिधी

भक्ष्य शोध असतांना एक बिबट्या राहुरी तालक्यातील गंगापूर परिसरातील संपत मजांबापु काळे यांच्या विहिरीत पडला. मात्र वनविभागाने तात्काळ घटनेच्या ठिकाणी जाऊन बिबट्याला कुठलीही इजा न होता वर काढण्यात यश मिळविल्याने वनविभागाने सुटकेचा नि:श्वास सोडला. राहुरीच्या वनविभागाचे लांबे यांच्याशी संपर्क केला असता वनविभागाचे कर्मचारी प्रकाश कोहकडे, बाळू दिवे, मुसाखा पठाण, वनविभागाने क्रेनच्या सहाय्याने पिंजरा विहिरीत सोडला व त्या पिंजर्यात बिबट्या काही क्षणात अलगद अडकला. पिंजऱ्यातील बिबट्याला डिग्रस येथील नर्सळीत रवाना केल्याची माहिती वनविभागाने दिली आहे. बिबट्या हा दिड वर्षाचा असल्याचेही माहिती वनविभागाने दिली.


श्रीगोंदा प्रतिनिधी

भारत देशाला परम वैभव, शक्तिशाली, सुसंस्कृत राष्ट्र करण्याचे राष्ट्रीय स्वयंसेवक संघाचे स्वप्न आहे. संघाचे  काम सर्व समाजापर्यंत घेउन जाण्याचे तरुण मोठ्या संख्येने सहभागी होत आहेत, असे प्रतिपादन संघाचे जिल्हा ग्रामविकास प्रमुख प्रा. गजानन चावरे यांनी केले. श्रीगोंदा येथे आयोजित विजयादशमी उत्सव आणि पथसंचलन सराव कार्यक्रमात ते बोलत होते. रा. स्व. संघाचा विजयादशमी उत्सव आणि शस्त्रपूजन कार्यक्रम व पथसंचलन कार्यक्रमाचे आयोजन शहरात करण्यात आले होते. यावेळी चावरे यांनी संघकार्याची माहिती दिली. यावेळी सहकार्यवाह संदीप चौधरी, डॉ. विक्रम भोसले, सुधाकर खर्डेकर, तात्या एरंडे, अरविंद कासार, सुनील मुनोत, संदीप घोडेकर, निवृत्ती शेलार, आबा लबडे, गणेश गडदे आदींसह स्वयंसेवक मोठ्या संखेने उपस्थित होते. शिवाजी साळुंके यांनी प्रास्ताविक केले.

statcounter

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget