Lokmanthan News

Latest Post

शिवथर / प्रतिनिधी : गतसप्ताहात मालगाव (ता. सातारा) येथे धोम डाव्या कालव्याला भगदाड पडल्याने मालगाव येथील 44 व वनगळ येथील 15 शेतकर्‍यांचे सुमारे 75 लाखांचे नुकसान झाले असल्याची माहिती उपलब्ध झाली आहे. नुकसानीचे पंचनामे गावकामगार तलाठी यांनी करून याबाबतची माहिती तहसीलदारांकडे सादर केली. दरम्यान, धोम डाव्या कालव्याला पडलेल्या भगदाड दुरुस्तीचे काम पूर्ण झाले असून कालव्यात पाणीही सोडण्यात आले आहे.

पाटबंधारे विभागाच्या हलगर्जीपणामुळे मालगाव येथे धोम डाव्या कालव्याला गत सप्ताहात भगदाड पडून मालगाव व वनगळ येथील शेतकर्यांचे विहिरी, विद्युत पंप, पाईपलाईन, पाणंद रस्ते यासह शेतीचे नुकसान झाले. मालगाव येथील एकूण 44 शेतकर्यांचे गावकामगार तलाठी व्ही. बी. नलावडे यांनी पंचनामे केले असून एकूण 75 लाख 83 हजार 500 रुपयांचे नुकसान झाले आहे तर वनगळ येथील एकूण 15 शेतकर्यांचे नुकसान झाले असून गावकामगार तलाठी वसंतराव मुळीक यांनी हे पंचनामे केले. या शेतकर्यांचे अंदाजे 3 लाखांचे नुकसान झाले आहे. मालगाव येथील काही शेतकर्यांच्या विहिरी गाळाने भरल्या आहेत त्याचबरोबर विद्युत पंप गाळामध्ये बुडाले आहेत. मालगाव, अंबवडे रस्त्याचा भराव व दोन फुटी पाईपलाईन वाहून गेली आहे त्याचबरोबर मालगाव, शिवथर रस्त्याचा भराव, स्मशानभूमी शेजारील ओढ्यावर असणारा नाला बंधारा, एक सिमेंट पूल वाहून गेलाआहे. वनगळ येथील 8 विहिरी गाळाने पूर्ण भरल्या असून 4 विद्युत पंप व पाईप लाईन वाहून गेली आहे.

पाटबंधारे विभागाच्या हलगर्जीपणामुळे शेतकर्‍यांचे लाखो रुपयांचे नुकसान झाले असल्याने केवळ महसूल विभागावर अवलंबून न राहता पाटबंधारे विभागानेही नुकसान भरपाई द्यावी, अशी मागणी ग्रामस्थांनी केली आहे.
धोम डाव्या कालव्यावर असणार्या नाल्यांमध्ये पाणी गळती सुरु असून तिही बंद करावी अन्यथा पुन्हा कालवा फुटीचा धोका निर्माण होवू शकतो. कालव्यातील अनेक ठिकाणचे दगडी बांधकाम निघाले आहे तर काही ठिकाणी कॉंक्रिटीकरण करणे गरजेचे आहे. कालव्या शेजारी असणार्या नाल्यावरील झाडे-झुडपे काढणे गरजेचे आहे.
पंचायत समितीकडून ज्या शेतकर्‍यांच्या विहीरी गाळाने भरल्या आहेत त्यांना विहिर दुरुस्तीसाठी अनुदान उपलब्ध करावे, अशी मागणी होत आहे. दरम्यान कालवा दुरुस्तीचे काम पाटबंधारे खात्याच्या यांत्रिकी विभाग व मेकॅनिक विभागाने युद्ध पातळीवर पूर्ण केले असून गुरुवारी धोम उजव्या कालव्यात 350, 400 व 500 गेजने टप्प्या टप्प्याने पाणी सोडले जाणार आहे, असे शिवथर शाखा अभियंता पाटील यांनी सांगितले.



फलटण / प्रतिनिधी : 23लोकसभेच्या तोंडावर सातारा जिल्ह्यात राजकीय भूकंप झाला असून कॉंग्रेसचे जिल्हा कॉंग्रेस कमिटी अध्यक्ष रणजितसिंह नाईक-निंबाळकर भाजपात डेरेदाखल झाले असून त्यांच्या प्रवेशाची आता फक्त औपचारिकता बाकी आहे. दरम्यान, रणजितसिंह नाईक-निंबाळकर यांची भाजपकडून लोकसभा उमेदवारी निश्र्चित मानली जात आहे.

गेल्या आठवड्यापासून माढा लोकसभा मतदारसंघाचा तिढा वाढलेला होता. राष्ट्रवादी सुप्रिमो शरद पवार यांनी आपल्या उमेदवारीची तलवार म्यान केल्यानंतर राष्ट्रवादी अंतर्गत बंडाळ्या वाढल्या होत्या. तर्कवितर्कांना उधाण आले होते. असे असतानाच जिल्हा कॉंग्रेसमधील कद्दावर युवा नेते तथा सातारा जिल्हा कॉंग्रेस कमिटीचे जिल्हाध्यक्ष रणजितसिंह नाईक-निंबाळकर हे भाजपमध्ये जाणार असल्याची अटकळ काही दिवसांपासून बांधली जात होती. त्या अटकली व शक्यतांना अखेर आज दुजोरा मिळाला. कालपासूनच रणजितसिंह नाईक निंबाळकर व आ. जयकुमार गोरे दिल्लीत तळ ठोकून होते. भाजपचे राष्ट्रीय अध्यक्ष अमित शहा यांनी रणजितसिंह नाईक-निंबाळकर यांना माढ्यातून लढण्याबाबत ग्रीन सिग्नल दिलेला आहे. आता केवळ भाजपा प्रवेशाची औपचारिकता बाकी राहिली आहे. गेल्या काही दिवसांपूर्वी कॉंग्रेसचे ज्येष्ठ नेते, माजी आमदार मदन भोसले यांनी मुख्यमंत्र्यांच्या उपस्थितीत भाजपात प्रवेश केला होता.

आता त्यांच्या पाठोपाठच रणजितसिंह नाईक-निंबाळकर यांनी भाजपात प्रवेश करीत असल्यामुळे सातारा जिल्ह्यातील कॉंग्रेसची पूर्णत: वाताहात झाली आहे. माढ्यातून राष्ट्रवादीकडून उमेदवारी जाहीर झालेले संजय शिंदे व भाजपात नुकतेच डेरेदाखल झालेले रणजितसिंह नाईक-निंबाळकर यांच्यामध्ये माढा लोकसभेला लढत होण्याची शक्यता आहे. रणजितसिंह यांच्यासोबत माणचे आमदार जयकुमार गोरे हेसुध्दा भाजपात जाणार असल्याची जोरदार चर्चा सर्वत्र होती. मात्र आ. गोरे यांच्याशी दूरध्वनीवरून संपर्क साधला असता, त्यांनी आपण कॉंग्रेसमध्येच असल्याचे लोकमंथनशी बोलताना स्पष्ट केले. रणजितसिंह नाईक निंबाळकर यांचा काही दिवसांपूर्वी झालेला जिल्हाध्यक्ष पदाच्या निवडीच्या पार्श्वभूमीवर या वृत्ताने खळवळ उडाली आहे.


कराड / प्रतिनिधी - मलकापूर (ता. कराड) येथे पूर्ववैमन्सयातून दोन गटात गुरूवारी रात्री तुंबळ मारामारी झाली. याबाबत कराड शहर पोलिस स्टेशनला परस्परविरोधी फिर्यादी दाखल झाल्या असून याप्रकरणी दोन्हीकडील 14 जणांवर गुन्हा दाखल करण्यात आला आहे.

अरबाज शेख, अलतमेश मुल्ला, इकलाश खोजी, सईद शिकलगार (रा. मंडई कराड), नाजीम सय्यद, कमरअली मुतवली, तौफिक इनामदार (तिघेही रा. दर्गा मोहल्ला, कराड), व इतर अनोळखी सात जण (नावे समजू शकली नाहीत) अशी गुन्हा नोंद झालेल्यांची नावे आहेत.

याबाबत अरबाज आयाज बागवान याने दिलेल्या फिर्यादीत म्हंटले आहे, मलकापूर धनगरवाडा येथे बाबा मेडीकल समोर अरबाज व अरिन सय्यद व सईद शिकलगार दोन दिवसापूर्वी झालेल्या भांडणाचा समेट करण्याकरीता गेलो असता इकलास खैजी याचे बरोबर चर्चा करीत असताना इकलास व त्याच्याबरोबर असणार्या मित्रांनी मारहाण करण्यास सुरूवात केली. त्यानंतर घरी बैलबाजार रोडने गाडीवरून घरी येत असताना अरबाजचा पाठलाग करून काहीनी दांडक्याने व तलवारीने मारहाण करण्यास सुरूवात केली. अरबाज शेख याने हातातील दांडक्याने मानेवर व कमरेवर मारहाण केली. व अलतमेश मुल्ला याने तलवारीने अरबाजच्या पायावर वार केला.

तर वरील फिर्यादीच्या विरोधात इकलाश इनाईतुल्ल खोजी याने दिलेल्या तक्रारीत म्हटले आहे की, मलकापूर धनगरवाडा येथे बाबा मेडीकल समोर इकलाश, आकिब पठाण, अरबाज शेख, अलतमेश मुल्ला व अरबाज शेखचा मित्र (नाव माहित नाही) असे सर्वजण गप्पा मारत असताना अचानकपणे मलकापूर गावातून सईद शिकलगार व त्याच्याबरोबर इतर लोक इकलाश जवळ आले व अकिबा पठाण व अलतमेश मुल्ला या दोघांना दांडक्याने मारहाण करण्यास सुरूवात केली. सदरचा प्रकार बघून इकलाश, अरबाज शेख व त्याचा मित्र यांनी मारामारी सोडविण्याचा प्रयत्न करीत असताना सईद शिकलगार याने हातातील कोयत्याने इकलाशच्या डोक्यात वार करून छोडनेका नही सबको मार डालनेका असे ओरडून हातातील कोयत्याने वार करीत होता. व आरिन सय्यद याने त्याचे हातातील दांडक्याने इकलाशच्या पाठीत मारले. त्यातील कमरअली मुतवली व नाजीम सय्यद यानी इकलाशच्या हातावर व पोटात पाईप व दांडक्याने मारहाण केली. याबाबत कराड शहर पोलिस स्टेशनला परस्परविरोधी फिर्यादी दाखल झाल्या असून दोन्हीकडील चौदाजणांवर गुन्हा नोंद करण्यात आला आहे.


कराड (प्रतिनिधी) ः सुर्ली ता. कराड येथे एकाने दारू पिऊन शिवीगाळ करीत कापून ठेवलेल्या गव्हास आग लावल्याची घटना गुरूवारी सायंकाळी सहा वाजण्याच्या सुमारास घडली. याबाबतची फिर्याद पद्मावती कृष्णत फुके (वय 30 रा. सुर्ली ता. कराड) यांनी तालुका पोलिसात दिली असून याप्रकरणी त्यांनी त्यांच्या दिरावर गुन्हा नोंद दाखल केला आहे. मिथून आनंदा फुके (रा. सुर्ली, ता. कराड) असे गुन्हा नोंद झालेल्याचे नाव आहे.
याबाबत पोलिसांनी दिलेली माहिती अशी, पद्मावती फुके यांचे विहरीजवळच्या शेतात गहू कापून ठेवला होता. गुरूवारी सायंकाळी 6 वाजण्याच्या सुमारास दिर मिथुन हा दारू पिऊन येऊन शिवीगाळ करू लागला. व कापून ठेवलेल्या गव्हाच्या बुचडीस काडीपेटीने आग लावली.

यामध्ये सुमारे 7 हजार रूपये किमतीचा 2 क्विंटल गहू आगीत जळून खाक झाला. याबाबत पद्मावती फुले यांनी तालुका पोलिसात फिर्याद दिली असून याप्रकरणी दिरावर गुन्हा नोंद करण्यात आला आहे.



कर्‍हाड - महाराष्ट्र बँकेच्या शेणोली (ता. कर्‍हाड) येथील शाखेवर टाकण्यात आलेल्या दरोड्याप्रकरणी पोलिसांनी मास्टर माईंड किरण शिवाजी गायकवाड (वय 24, रा. नेर्ली, ता. कडेगाव), दत्तात्रय मधुकर जाधव (वय 24, रा. पारे, ता. सांगोला, जि.सोलापूर), विकीराज संजय चौधरी (वय 22, मूळ रा. बिहार, सध्या रा. चेंबूर,मुंबई), श्रवणकुमार ब्रीजनंदन प्रसाद यादव (वय 24) आणि अभिषेककुमार रणजित सिंग (वय 20, रा. दोघेही रा. दानापूर, बिहार), या संशयीतांना ताब्यात घेतले आहे.

त्यांच्याकडे करण्यात आलेल्या चौकशीदरम्यान त्यांनी दरोड्यांनतर खुशीमध्ये दरोड्यात वापरण्यात आलेल्या चालकाला 50 हजार रुपये दिल्याचे समोर आले आहे. त्याचबरोबर त्याला भाडे म्हणुन दिलेले 35 हजार असे 85 हजार रुपये देण्यात आले. ते पैसे पोलिसांनी या दरोड्याच्या प्रकरणात जप्त केल्याची माहिती तालुका पोलिस निरीक्षक अशोकराव क्षिरसागर यांनी आज दिली. दरम्यान दरोड्यातील आणखी काही संशयीतांच्या शोधासाठी पथक बिहारला रवाना होणार असल्याचेही पोलिस निरीक्षक क्षीरसागर यांनी सांगितले.



सातारा / प्रतिनिधी : आदर्श आचारसंहितेचा भंग केल्याप्रकरणी एका गॅस एजन्सीवर गुन्हा दाखल झाला आहे. शर्वरी गॅस एजन्सी असे या एजन्सीचे नाव आहे. या एजन्सीने पंतप्रधान नरेंद्र मोदी यांचा फोटो न झाकता ग्राहकांना गॅस शेगडीचे वाटप केल्याने हा गुन्हा दाखल करण्यात आला आहे.

डॉ. सत्यजित रामचंद्र शिंदे यांनी याप्रकरणी तालुका पोलीस ठाण्यात हा गुन्हा दाखल केला आहे. याबाबत अधिक माहिती अशी, सध्या भारत निवडणूक आयोगाची दि. 10 मार्चपासून आदर्श आचारसंहिता लागू झाली आहे.शर्वरी गॅस डिस्ट्रीब्युटर्स ही एजन्सी पंतप्रधान उज्वला योजनेमार्फत ग्राहकांना देण्यात येणार्‍या गॅस शेगडीचे वितरण करत आहे. मात्र त्या बॉक्सवर असलेल्या पंतप्रधान मोदी यांचा फोटो न झ्राकता तो आहे त्या अवस्थेत लोगोसह ग्राहकांना वितरीत करत असल्याची बाब समोर आली आहे.हा प्रकार दि. 21 रोजी ठोसेघर येथे घडला आहे. या घटनेमुळे आदर्श आचारसंहितेचा भंग झाली असल्याचे डॉ. सत्यजित शिंदे यांनी तक्रारीत म्हटले आहे.त्यानुसार भारतीय दंड विधान कायदा 188 प्रमाणेया गुन्हा दाखल करण्यात आला आहे. अशा पद्धतीचा गुन्हा दाखल झाल्याने व्यापार्‍यांमध्ये खळबळ उडाली आहे.


सातारा / प्रतिनिधी : प्रेम प्रकरणातून कुटुंबाची बदनामी करु नये, असा जाब विचारायला गेलेल्या एकाला सपासप वार करून भोकसून खून केल्याची घटना घडली आहे. ही घटना उमरकांचन वसाहत (नेवरी, ता. कडेगांव) येथे शुक्रवारी रात्री नउ वाजता घडली. याबाबत कडेगांव पोलीस ठाण्यात नोंद झाली आहे. राजेंद्र मधुकर कारंडे (रा. उमरकांचन वसाहत) असे हल्ला करणाराचे नाव आहे. प्रदिप भिकाजी शिदे ( रा उमरकांचन वसाहत, नेवरी) असे मृत व्यक्तीचे नाव असून तो संबंधित युवतीच्या नात्यातील आहे. दरम्यान, या हल्ल्यात संदिप शिदे, शारदा शिंदे हे दोघे गंभीर जखमी आहेत.

कारंडे याला जाब विचारला सुरवात केली असता शाब्दिक बाचाबाची झाली काही वेळातच त्याचे रूपांतर हाणामारीत झाले. त्यावेळी जखमी संदिप व शारदा हेही कारंडे यांना समजावून सांगू लागले. क्षणाचाही विचार न करता त्याने खिशातून धारदार चाकू बाहेर काढला व तो प्रदिप शिंदेवर तूटून पडला. राजेंद्रने त्याच्या पोटावर व छातीवर सपासप वार केले. त्यात प्रदीप जागीच कोसळला. हल्लेखोर कारंडेस रोखण्यासाठी गेलेल्या दोघांवरही वार करीत तिथून पसार झाला. शिदे कुटुंबाने तातडीने जखमी प्रदीपला खासगी रुग्णालयात दाखल करण्यात आले. मात्र उपचार सुरु असताना प्रदिप शिदेचा मृत्यू झाला त्यानुसार कडेगांव पोलीस ठाण्यात गुन्हा नोंद झाला आहे. अधिक तपास सपोनि गोसावी करीत आहेत.

statcounter

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget