काँग्रेसचे मदतीसाठी पवारांना साकडे; धर्मनिरपेक्ष जनता दलाचा 12 जागांसाठी आग्रह


बेंगळुरूः लोकसभा निवडणुका अवघ्या काही महिन्यांवर आलेल्या असताना काँग्रेसची डोकेदुखी वाढायला लागली आहे. धर्मनिरपेक्ष जनता दला (जेडीएस) ने काँग्रेसकडे लोकसभेच्या 12 जागांची मागणी केली आहे. जेडीएसला एवढ्या जागा सोडणे शक्य नसल्याने हा तिढा सोडवण्यासाठी काँग्रेसने राष्ट्रवादीचे नेते शरद पवार, आंध्र प्रदेशचे मुख्यमंत्री एन. चंद्राबाबू नायडू आणि जम्मू काश्मीरचे माजी मुख्यमंत्री फारुख अब्दुल्ला यांच्याकडे मदत मागितली आहे. 

राष्ट्रीय लोकशाही आघाडी विरोधात राष्ट्रीय आघाडी स्थापन करण्यासाठी येणारे अडथळे पवार, नायडू आणि अब्दुल्ला यांनी दूर करावेत, अशी काँग्रेसची अपेक्षा आहे. प्रादेशिक पक्षांना जितक्या जागांवर विजय मिळवणे शक्य आहे, असे वाटतेय तितक्या जागा मागणे हा त्यांचा हक्क आहे. आघाडीत मित्रपक्षांना किती जागा देणार याचा रोडमॅप तयार करण्याआधी यावर चर्चा करणे गरजेचे आहे, असे टीडीपीचे प्रवक्ते के. राममोहन राव यांनी म्हटले आहे. कर्नाटकात सत्ताधारी काँग्रेस आणि जेडीएस यांच्यात सर्व पदांसाठी 2:1 अशी विभागणी करण्यात आल्याचेही त्यांनी सांगितले. हा फॉर्म्युला लागू केल्यास राज्यातील 28 पैकी लोकसभेच्या 10 जागा जेडीएसला मिळू शकतात. जेडीएसचे सर्वेसर्वा एच. डी. देवेगौडा यांनी 12 जागांवर लोकसभा निवडणूक लढवणार असल्याची घोषणा याआधीच केली होती. ही मागणी पूर्ण न झाल्यास जेडीएस स्वतंत्रपणे निवडणुकीला सामोरे जाईल, असा इशारा त्यांनी दिला होता. 

’जेडीएसने 12 जागांची मागणी केली असून काँग्रेस समजून घेईल, अशी आम्हाला आशा आहे. 8 जानेवारी रोजी संसदेचे अधिवेशन संपणार आहे. तोपर्यंत हे प्रकरण सुटलेले असेल, असेही देवेगौडा यांनी म्हटले आहे. जेडीएसने काँग्रेसचे ज्येष्ठ नेते वीरप्पा मोईली यांच्या चिक्काबल्लुपुरा जागेवरही दावा केल्याने काँग्रेसची मोठी गोची झाली आहे. या पार्श्‍वभूमीवर पवार, नायडू, अब्दुल्ला यांनी देवेगौडा यांची समजूत घालून त्यांना ठरलेल्या फॉर्म्युल्यानुसार जागावाटपास राजी करावे, असे साकडे काँग्रेसने घातले आहे. पवार यांचे देवेगौडाशी असलेल संबंध कामी येतील, असे काँग्रेसला वाटते. 

Post a Comment

[blogger]

statcounter

Contact Form

Name

Email *

Message *

Powered by Blogger.
Javascript DisablePlease Enable Javascript To See All Widget