Breaking News

गरिबांच्या खात्यात ते काय पैसे जमा करणार?



मोदी यांची राहुल गांधींवर टीका; पन्नास वर्षांत गरिबांची खाती खोलता आली नाहीत

मीरतः गेल्या 50 वर्षांत ज्यांनी गरिबांची बँकेत खाती उघडली नाहीत, ते गरिबांच्या खात्यात पैसे काय जमा करतील? असा टोला पंतप्रधान नरेंद्र मोदी यांनी काँग्रेसचे अध्यक्ष राहुल गांधी यांना नाव न घेता लगावला.
उत्तर प्रदेशातील मीरत येथे पहिल्या निवडणूक प्रचार सभेला संबोधित करताना मोदी यांनी राहुल गांधी यांच्या न्याय योजनेवर टीकास्त्र सोडले. जेव्हा गोरगरिबांची बँकेत खाती उघडण्यास सुरुवात केली, तेव्हा हेच बुद्धिमान लोक देशात बँका नाहीत, नुसती खाती उघडून काय करणार? अशी टीका करायचे. गेल्या 50 वर्षात ज्यांनी कधी गोरगरिबांची बँकेत खाती उघडली नाहीत, आज तेच लोक गरिबांच्या खात्यात पैसे जमा करणार असल्याचे आश्‍वासन देत आहेत, असा टोला मोदींनी लगावला. मी जेव्हा 8-10 वर्षाचा होतो, तेव्हा सरकार गरिबी हटवण्याचा प्रयत्न करणार असल्याचे ऐकत होतो. जेव्हा मी 20-22 वर्षाचा झालो, तेव्हा इंदिरा गांधी यांनी ‘गरिबी हटाव’चा नारा दिल्याचे ऐकले होते. आता काँग्रेसच्या नामदारांनीही तीच घोषणा पुन्हा केली आहे, अशा शब्दांत राहुल यांच्यावर टीकेची तोफ डागताना काँग्रेसच्या प्रत्येक पिढीत गरिबी हटावची घोषणा होते, पण गरिबी मात्र काही हटवली जात नाही, असे ते म्हणाले.
जमीन असो, आकाश असो की अंतराळ; चौकीदाराच्या सरकारने तिन्ही ठिकाणी सर्जिकल स्ट्राइक केला. आम्ही अंतराळात अँटी सॅटेलाइट क्षेपणास्त्राद्वारे एक सॅटेलाइट पाडला; मात्र नक्की काय झालं हे त्यांना (राहुल गांधी) समजले नाही. मी अ-सॅटबद्दल बोलत होतो, तर ते थिएटरच्या सेटबाबतची चर्चा करत होते, असे सांगतानाच मातृभूमीच्या पुत्रांनी केलेल्या पराक्रमावर संशय घेऊन हे लोक पुरावे मागत आहेत, अशी टीकाही त्यांनी केली. या वेळी मोदी यांनी त्यांच्या सरकारने केलेल्या कामाची जंत्रीच मतदारांपुढे मांडली.