Breaking News

अमित शाह यांची उमेदवारी रद्द करण्याची आयोगाकडे मागणी



गांधीनगर : भारतीय जनता पक्षाचे अध्यक्ष अमित शाह यांनी त्यांच्या शपथपत्रात स्वतःच्या संपत्तीविषयीची माहिती लपवल्याचा आरोप करत काँग्रेसने निवडणूक आयोगाकडे तक्रार दाखल केली आहे. या तक्रारीत काँग्रेसने शाह यांचा उमेदवारी अर्ज रद्द करण्याची मागणी केली आहे. शाह गुजरातमधील गांधीनगर येथून लोकसभेच्या रिंगणात उभे आहेत.

शाह यांनी त्यांचा उमेदवारी अर्ज दाखल करताना शपथपत्रामध्ये दोन ठिकाणी चुकीची माहिती दिली असल्याचा काँग्रेसचा दावा आहे. शाह यांनी गांधीनगरमध्ये असलेल्या त्यांच्या मालकीच्या एका भूखंडाबाबत आणि मुलाच्या कर्जाबाबत योग्य माहिती दिली नसल्याचा आरोप काँग्रेसने केला आहे. शाह यांना निवडणूक लढवण्यास अयोग्य ठरवून त्यांचा उमेदवारी अर्ज रद्द करण्याची मागणी काँग्रेसने निवडणूक आयोगाकडे केली आहे. 2016-17 मध्ये राज्यसभा उमेदवारीसाठी अर्ज दाखल करताना शाह यांनी त्यांचे वार्षिक उत्पन्न 43 लाख 68 हजार 450 रुपये इतके असल्याचे सांगितले होते, तर त्यांची पत्नी सोनल यांचे वर्षिक उत्पन्न एक कोटी पाच लाख 84 हजार 450 रुपये इतके असल्याचे सांगितले होते; परंतु 2017-18 मध्ये शाह यांचे वार्षिक उत्पन्न 53 लाख 90 हजार 970 रुपये इतके वाढले आहे, तर त्यांची पत्नी सोनल यांचे वार्षिक उत्पन्न दोन कोटी 30 लाख 82 हजार 360 रुपये इतके वाढले आहे.