Breaking News

मोदींविरुद्ध कारवाईसाठी निवडणूक आयोगाच्या निर्णयाची प्रतीक्षा : शिंदे



मुंबई : निवडणूक आयोगाकडून उत्तरप्रदेशचे मुख्यमंत्री योगी आदित्यनाथ, मनेका गांधी, मायावती यांच्यावर प्रचारबंदीची कारवाई केल्यानंतर आता भारतीय सैन्याच्या नावे मते मागितल्यामुळे पंतप्रधान नरेंद्र मोदी यांच्यावर कारवाई कधी करणार? असा सवाल विचारला जात आहे. यावर उत्तर देतांना अतिरिक्त निवडणूक अधिकारी दिलीप शिंदे म्हणाले की, निवडणूक आयोगाच्या निर्णयाची आम्हाला प्रतीक्षा आहे.
उस्मानाबाद आणि लातूर जिल्ह्यातील औसा येथील लोकसभा प्रचाराच्या जाहीर सभेत मोदी यांनी भाजप-शिवसेना युतीला मतदान करण्याचे आवाहन केले होते. ’आपका पहिला वोट पाकिस्तान के बालाकोट मे एअर स्ट्राईक करनेवाले वीर जवानो के नाम समर्पित हो सकता है क्या? आप का पहिला वोट पुलवामा मे जो वीर शहिद हुए है, उन वीर शहीदों के नाम समर्पित हो सकता है क्या?’ असे मोदी प्रचार सभेत म्हणाले होते. त्यामुळे भारतीय जवानांच्या, सैन्याच्या नावावर मतदान मागितले. मोदींनी सैन्याच्या नावावर राजकारण केले असल्याचा आरोप अनेक स्तरावरून होत होता.आचारसंहिता भंग केल्याप्रकरणी कारवाई करून गुन्हा नोंद करावा. तसेच त्यांच्यावर प्रचारबंदी घालण्यात यावी, अशी मागणीही केली जात आहे.
एवढेच नाहीतर निवडणुक आयोगाने सैनिकांचा किंवा लष्कराचा वापर प्रचारात करू नका, अशा सूचना दिल्या आहेत. मात्र, मोदींनी बालाकोटमधील हवाई हल्ल्यासंदर्भात मत मागण्यासाठी केलेले विधान सकृतदर्शनी आचारसंहितेचा भंग आहे, असे उस्मानाबाद जिल्हा निवडणुक अधिकार्‍यांनी निवडणूक आयोगाकडे सादर केलेल्या अहवालामध्ये म्हटले आहे. राज्य निवडणूक निर्णय अधिकार्‍यांनी जिल्हा निवडणूक अधिकार्‍यांनी दिलेल्या अहवालावर आपली प्रतिक्रिया जोडली. तसेच तो अहवाल निवडणूक आयोगाकडे पाठविला असल्याचे दिलीप शिंदे यांनी सांगितले.योगी, मायावती, आजमखान, मेनका गांधी यांच्यावर आचारसंहिता भंगाबाबत कारवाई केली. त्याप्रमाणे पंतप्रधान नरेंद्र मोदी यांच्यावर निवडणूक आयोग कारवाई करणार का? याकडे आता सर्व देशाचे लक्ष लागले आहे. एवढेच नाहीतर निवडणुक आयोगाने या चौघांवर तातडीने कारवाई केली. त्याचप्रमाणे तातडीने मोदी यांच्यावरही कारवाई व्हावी, अशा प्रतिक्रियाही सोशल मिडियावर उमटू लागल्या आहेत. निवडणूक आयोगाने पंतप्रधान नरेंद्र मोदी यांच्यावर कोणतीही कारवाई केली अथवा त्यांना इशारा दिल्यास तो भाजपला मोठा धक्का ठरणार आहे. संपूर्ण निवडणुक प्रचाराला मोठी कलाटणी बसणार असल्याने आता निवडणूक आयोग काय निर्णय घेते? यावर निवडणुकीचे गणित अवलंबून आहे.