Breaking News

अनिल अंबानींच्या कंपन्यांत साडेपाच हजार कोटींचा गफला


मुंबई / प्रतिनिधी
अडचणीत सापडलेल्या रिलायन्स कम्युनिकेशन्स आणि अनिल अंबानी यांच्या रिलायन्स ग्रुपच्या अन्य कंपन्यांच्या व्यवहारात तब्बल साडेपाच हजार कोटी रुपयांची हेराफेरी झाली असल्याचे भारतीय स्टेट बँकेला आढळून आले आहे.

आरकॉम, रिलायन्स टेलिकॉम लिमिटेड आणि रिलायन्स टेलिकॉम इन्फ्रास्ट्रक्चर लिमिटेडमध्ये फंडाच्या रकमेच्या देवाणघेवाणीदरम्यान पैशांचे संशयास्पद व्यवहार, कर्जाबाबतची कथित एव्हरग्रीनिंग आणि निनावी कंपन्यांशी व्यवहार झाल्याचे स्पष्ट होत आहे. यात रिलायन्स ग्रुपच्या संचालकांचा सहभाग असल्याचेही उघड झाले आहे. रिलायन्स ग्रुपला यापूर्वी अनिल धीरुभाई अंबानी ग्रुप म्हटले जात असे.
तपासादरम्यान मे 2017 पासून ते मार्च 2018 दरम्यान झालेल्या पैशांच्या व्यवहारांवर विशेष लक्ष देण्यात आल्याचे सूत्राने सांगितले. यात हजारो नोंदीपैकी तीन नोंदी संशयास्पद आढळून आल्या. त्यांचा संबंध फंड वळवण्याशी असू शकतो असे म्हटले जात आहे.
दरम्यान, झालेल्या व्यवहारांची प्रामाणिकता तपासण्यासाठी अधिक खोलात जाऊन तपास करण्यावर कर्जपुरवठादार विचार करत आहेत. एसबीआयने फंड पुरवठ्याबाबत अभ्यास करण्यासाठी नोव्हेंबर 2017 मध्ये बीडीओ या अकाउंटिंग कंपनीची मदत घेतली होती. नेटिझन या कंपनीला मे 2017 मध्ये चार हजार कोटी रुपयांची आगाऊ रक्कम मिळाली होती, अशी माहिती सूत्रांनी दिली. ही रक्कम नेटिझनला रिलायन्स ग्रुपच्या अनेक कंपन्यांकडून अनेक ट्रान्झॅक्शनच्या माध्यमातून मिळाली होती. इतक्या मोठ्या रकमेमुळेच संशय बळावला. यानंतर देण्याची प्रक्रिया संपल्याचे दाखवण्यात आले. कंपनीच्या ऑडिटर्सनी कंपनीच्या व्यवहारांमध्ये या देवाणघेवाणीची माहिती द्यायला हवी होती, मात्र ती दिली गेली नाही, अशी माहितीही सूत्रांनी दिली.

कंपनी सध्या दिवाळखोरीत असून या बाबतची माहिती रिझॉल्युशन प्रोफशनल अनीश नानावटी यांच्याकडून घेतली जावी, असे आरकॉमच्या प्रवक्त्याने सांगितले. नानावटी यांनी मात्र कोणत्याही प्रश्‍नांची उत्तरे दिली नाहीत.


इंटर कार्पोरेट डिपॉझिटबाबत संशय
ग्रुपच्या एका कंपनीला इंटर-कॉर्पोरेट डिपॉझिटच्या रुपात 600 कोटी रुपये देण्यावरदेखील प्रश्‍न उपस्थित केले गेले आहेत. हे प्रेफरेन्शियल ट्रान्झॅक्शन असू शकते, असा आरोप तपासादरम्यान करण्यात आला आहे.