Breaking News

कोपर पुलावर जड वाहनांना बंदी

कल्याण
रेल्वे प्रशासनाने धोकादायक जाहीर केलेल्या कोपर पुलाच्या दुरुस्तीस अखेर मान्यता मिळाली आहे. दुरुस्तीदरम्यान या पुलावरून हलक्या वाहनांची वाहतूक सुरू ठेवता येणार असली तरी जड वाहनांना या पुलावरून बंदी घालण्याची अधिसूचना वाहतूक विभागाकडून काढण्यात आली आहे. या दरम्यान नागरिकांच्या सोयीसाठी ठाकुर्ली रेल्वे उड्डाणपुलावरून जड वाहनांना प्रवेश खुला करण्याचा निर्णय पालिका प्रशासनाकडून घेण्यात आला आहे.
हिमालय पूल दुर्घटनेनंतर रेल्वे प्रशासनाकडून रेल्वेवरील सर्वच उड्डाणपुलांची पाहणी करण्यात आली होती. यात डोंबिवली पूर्व-पश्‍चिम जोडणार्‍या कोपर पुलाला तडे गेल्याने हे पूल धोकादायक झाल्याचा निष्कर्ष काढत रेल्वेने या पुलावरील वाहतूक 27 मेपासून बंद करण्याच्या सूचना महापालिका प्रशासनाला दिल्या होत्या. मात्र शहरातील महत्त्वाचा आणि आवश्यक असलेला हा पूल तडकाफडकी बंद केल्यास वाहतुकीवर ताण पडणार असल्यामुळे महापालिका प्रशासनाकडून अन्य पर्यायांचा विचार करण्याची विनंती रेल्वेला करण्यात आली होती. पालिका प्रशासनाच्या विनंतीवरून आयटीआयच्या अधिकार्‍यांनी महापालिका अधिकार्‍यांसमवेत या पुलाची पुन्हा एकदा पाहणी केली होती. यावेळी या पुलावर डांबरचे अतिरिक्त थर साचल्याने पुलाचे वजन वाढले असून भिंतीत उगवलेल्या झाडामुळे पुलाच्या कठड्यांना तडे गेल्याचे स्पष्ट करण्यात आले होते. यासारखे जवळपास 12 ते 13 मुद्दे उपस्थित करत हा पूल धोकादायक असल्याचा निष्कर्ष काढण्यात आला होता. पालिका प्रशासनाने तातडीने पुलावरील अतिरिक्त डांबरथर हटविण्यासह पदपथ काढून टाकण्याचे काम सुरू केले जाईल तसेच रेल्वेने पुलाच्या खालच्या बाजूने दुरुस्ती करावी, अशी विनंती करतानाच हलक्या वाहनांना पुलावरून ये-जा करण्याची परवानगी देण्याची विनंती करण्यात आली होती. अखेर रस्त्याच्या एका बाजूला दुरुस्तीचे काम करताना दुसर्‍या बाजूने हलक्या वाहनांना ये-जा करण्यासाठी परवानगी देण्यात आली आहे. रेल्वेच्या आदेशानंतर याबाबतच्या अधिसूचना काढण्यासाठी महापालिकेने वाहतूक विभागाला तब्बल तीनवेळा स्मरणपत्रे दिली होती. यानंतर शुक्रवारपासून वाहतूक विभागाने या पुलावरील जड वाहनांची वाहतूक बंद केली असून ही वाहतूक ठाकुर्ली उड्डाणपुलावरून वळविण्यात आली आहे. तर, पालिका प्रशासनाकडून दुरुस्तीचे काम तातडीने सुरू केले जाणार असल्याचे अधिकार्‍यांनी संगितले.