Breaking News

मुंबईच्या पोलिस आयुक्तपदी पहिल्यांदाच महिलेची वर्णी?

मुंबई / प्रतिनिधी
मुंबईचे पोलिस आयुक्त संजय बर्वे लवकरच निवृत्त होणार आहेत. त्यामुळे या पदावर आता कोणाची वर्णी लागणार याकडे, सर्वांचे लक्ष लागले आहे. महाराष्ट्र गुप्तचर यंत्रणेच्या आयुक्त रश्मी शुक्ला यांची निवड होण्याची शक्यता वर्तविली जात आहे.

बर्वे यांचा कार्यकाळ 31 ऑगस्टला संपत आहेत. त्यांच्यानंतर आयुक्तपदासाठी 29 अधिकार्‍यांपैकी प्रामुख्याने याने तीन नावे समोर येत आहेत. त्यामध्ये महाराष्ट्र गुप्तचर यंत्रणेच्या आयुक्त रश्मी शुक्ला, लाचलुचपत प्रतिबंधक विभागाचे महासंचालक परमबीर सिंह आणि पुण्याचे पोलिस आयुक्त डॉ के व्यंकटेशम यांची नाव चर्चेत आहे. हे तिन्ही अधिकारी 1988 च्या आयपीएस बॅचचे आहेत. शुक्ला पुणे विभागाच्या आयुक्त होत्या. सध्या त्या गुप्तचर यंत्रणेच्या आयुक्त आहेत. मुंबईच्या पोलिस आयुक्तपदी नियुक्ती झाली, तर त्या या पदावर येणार्‍या पहिल्या महिला ठरणार आहेत. डॉ. व्यंकटेशम यांनी पुणे आणि नागपूर विभागाचा आयुक्तपदाचा कारभार सांभाळला आहे.  परमबीर सिंह हे यापूर्वीही आयुक्तपदाच्या शर्यतीत होते; मात्र मुख्यमंत्री देवेंद्र फडणवीस यांनी त्यांना डावलून बर्वे यांची मुंबईच्या आयुक्तपदी नेमणूक केली होती. ते ठाण्याचे पोलिस आयुक्त होते. सध्या परमबीर सिंह लाचलुचपत प्रतिबंधक विभागाचे महासंचालक आहेत. त्यामुळे आता परमबीर सिंह यांना संधी मिळणार का, याकडे अनेकांचे लक्ष आहे.

दरम्यान, काही वरिष्ठ अधिकार्‍यांच्या माहितीनुसार मुख्यमंत्री देवेंद्र फडणवीस हे संजय बर्वे यांना पोलिस आयुक्तपदी मुदतवाढ देण्याचाही विचार करत आहेत. आयुक्तपदी नियुक्ती करताना अधिकार्‍यांची सेवाज्येष्ठता, कार्यक्षमता आणि सचोटी हे निकष ध्यानात घेतले जातात.