Breaking News

अत्याचारांविरोधात हवा समान कायदा

मुंबई
पुरुषत्वाच्या अनेक खोट्या भ्रामक कल्पनांच्या पूर्ततेसाठी तृतीयपंथीयांवर सर्रास शारिरिक, लैंगिक अत्याचार केले जातात. मात्र कायद्याच्या कक्षेत आजही असे घृणास्पद प्रकार करणार्‍यांना कडक शासन केले जात नाही. प्रस्तावित विधेयकामध्येही असे लैंगिक अत्याचार करणार्‍यांविरोधात शिक्षेची तरतूद तोकडी आहे, त्यामुळे समानतेच्या कक्षेमध्ये कायदेशीर प्रक्रियेचाही समावेश केला जाणार की नाही, असा प्रश्‍न तृतीयपंथीयांना उपस्थित केला आहे.
शरण्या (नाव बदलले आहे ) ज्या व्यक्तीकडे विश्‍वासाने कामाला जायची, त्याच मालकाने तिच्यावर दोन वेळा जबदरस्ती करण्याचा प्रयत्न केला. तर वासंतीवरही धमक्या देऊन सख्ख्या काकाने अनैसर्गिक अत्याचार केले. याविरोधात तिने पोलिसांकडे तक्रार करण्याचा प्रयत्न केला, पण तेव्हा तिला तुझी तक्रार काय घ्यायची, असे तुच्छतेचे उत्तर मिळाले. स्त्री आणि पुरुष यांच्यावर जेव्हा कोणत्याही प्रकारचे लैंगिक वा शारीरिक अत्याचार होतात तेव्हा कायद्याचे जे भक्कम कवच या दोघांनाही मिळते ते तृतीयपंथीयांना का दिले जात नाही, असा प्रश्‍न तृतीयपंथीयांच्या प्रश्‍नांवर काम करणार्‍या व्यक्ती, संघटनांनी उपस्थित केले आहे. शरीरविक्रय करूनच अनेक तृतीयपंथीय पोट भरतात, असाच समाजाचा आजही समज आहे. त्यामुळे त्यांच्यावर अशा प्रकारचे अत्याचार झाले तर त्यात अनेकांना काहीच खटकत नाही.

लिंगाधारित शिवीगाळ थांबायला हवी
‘हिजडा’, ‘छक्का’ अशा प्रकारची लिंगाधारित शिवीगाळ करणेही थांबायला हवे, असा आग्रह सुरभी विकास विश्‍वास पुन्हा पुन्हा व्यक्त करते. कागदावर जर तृतीयपंथीयांना थर्ड जेंडर म्हणून ओळख मिळाली आहे तर त्यांच्या लिंगाचा उल्लेख हा शिवीगाळ करणे, हिणवणे या प्रकाराने का केला जातो, असा प्रश्‍नही त्यांनी उपस्थित केला. महिलांवरील बलात्कार, विनयभंगाचे कायदे तृतीयपंथीयांना लागू नाहीत. याउलट त्यांचा लैंगिक छळ, बलात्कार आणि विनयभंग अशा गुन्ह्यांच्या शिक्षेत प्रचंड तफावत आहे. एलजीबीटीसंदर्भात सरकारने जो कायदा तयार करायला घेतला आहे त्यामध्ये हा बदल एक नवी सुरूवात म्हणून स्वीकारला पाहिजे, असाही एक सूर या निमित्ताने व्यक्त होत आहे.

ऑनलाइन छळवणुकीचे प्रकारही वाढते
तृतीयपंथीय ज्या वस्त्यांमध्ये राहतात त्या ठिकाणी अनेकदा तरुणांची टोळकी त्यांना हैराण करतात. त्यांच्याकडे शरीरसुखाची मागणी करणे, त्यांना तुच्छतेची वागणूक देणे, त्यांचे फोटो काढून सोशल मीडिया तसेच व्हॉटस्अपवर टाकणे असेही प्रकार वाढले आहेत. पोलिसांकडे आता तृतीयपंथीयांवर विविध प्रकारे होणार्‍या अत्याचारांच्या तक्रारी वाढत आहेत. त्याचाही सातत्याने पाठपुरावा करावा लागतो. अशा प्रकारच्या अत्याचारांविरोधात कठोर शिक्षेची तरतूद झाली तरच या प्रकारांना चाप लागेल, अशी अपेक्षा राष्ट्रवादी काँग्रेसच्या प्रवक्त्या आणि तृतीयपंथी कार्यकर्त्या प्रिया पाटील यांनी व्यक्त केली.

आरोग्याचे प्रश्‍नही झाले बिकट
अशा प्रकारच्या अनैसर्गिक अत्याचारामुळे त्यांना शारिरिक अत्याचारांमुळे त्यांना विविध प्रकारचे आजारही होतात त्यामुळे या व्याधींवर उपचार करण्यासाठी महात्मा फुले वा आयुषमान भारत आरोग्ययोजनेमध्येही समावेश करण्यात आलेला नाही. त्यामुळे अनारोग्याच्या समस्याही उद्भवतात.