Breaking News

पाकच्या अहवालात राहुल, ओमरचा उल्लेख

Rahul Gandhi Omar Abdullah
जीनिव्हा
काश्मीरप्रकरणी भारताविरोधात पाकिस्तानने संयुक्त राष्ट्र मानवाधिकार परिषदेत धाव घेतली आहे. आपल्या 115 पानी दस्तावेजात पाकिस्तानने काँग्रेस नेते राहुल गांधी आणि नॅशनल कॉन्फरन्सचे नेते ओमर अब्दुला यांच्या वक्तव्याचा समावेश केला असल्याचे वृत्त पाकिस्तानी माध्यमांनी दिले आहे.

जम्मू-काश्मीरसाठी असलेले राज्यघटनेतील कलम 370 हटवल्यानंतर संचार बंदी लागू करण्यात आली होती. त्याशिवाय, अनेक राजकीय नेत्यांना स्थानबद्ध करण्यात आले होते. त्यानंतर विरोधकांनी सरकारवर दडपशाहीचा आरोप करत टीका केली होती. या अहवालात, काश्मीरच्या लोकांचे स्वातंत्र्य आणि संविधानिक अधिकारांना समाप्त करून 20 दिवस झाले आहेत. विरोधी पक्ष आणि माध्यमे सत्तेचे क्रूर रुप पाहत असून जम्मू-काश्मीरच्या नागरिकांवर दडपशाही करत असल्याचा उल्लेख करण्यात आला आहे.

पाकिस्तानने भारताविरोधात प्रस्ताव आणण्याची तयारी सुरू केली आहे. कलम 370 हटवल्यानंतर राहुल गांधी यांनी केंद्र सरकारवर टीका केली होती. त्यांनी केलेल्या टीकेचा समावेश पाकिस्तानने आपल्या भारतविरोधी अहवालात केला आहे. केंद्र सरकारचे एकतर्फी आणि धक्कादायक निर्णयांचे घातक परिणाम होणार आहेत. बेकायदेशीर आणि असंविधानिक निर्णय घेण्यात आली असल्याची टीका ओमर यांनी केली होती. ओमर यांच्याही वक्तव्याचा समावेश करून पाकिस्तानने खेळी खेळली आहे.

मानवाधिकार प्रमुखांचे प्रतिकूल मत
दरम्यान, संयुक्त राष्ट्र मानवाधिकार प्रमुखांचे वक्तव्य भारतासाठी फारसे सकारात्मक ठरले नाही. संयुक्त राष्ट्रसंघाच्या 42 व्या सत्राच्या सुरुवातील मानवाधिकार प्रमुख मिशेल बाशालेट यांनी काश्मीरबाबत चिंता व्यक्त केली. काश्मीरमधील नागरिकांच्या मानवाधिकाराला घेऊन आपण चिंतेत असल्याचे त्यांनी म्हटले. स्थानिक नेत्यांना स्थानबद्ध करणे, इंटरनेट सेवा, दूरध्वनी सेवा ठप्प करणे आदी पावले सरकारने उचलली असल्याचे त्यांनी म्हटले.