Breaking News

फोनवरून वाइन ऑर्डर केली आणि लाखो गेले

मुंबई
फोनवरून वाइनची ऑर्डर देणे एकाला चांगलेच महागात पडले आहे. वाइन ऑर्डर केल्यानंतर या व्यक्तीची तब्बल सव्वा लाख रुपयांची फसवणूक झाली . शनिवारी 12 ऑक्टोबर रोजी ही घटना घडली असून पोलिस ठाण्यात गुन्हा दाखल करण्यात आला आहे.
एका मोबाइल सर्व्हिस स्टोरचा अधिकारी असलेल्या या व्यक्तीने ऑनलाइन वाइन मागवली. इंटरनेटवर वाइन घरपोच करणार्‍या दुकानांचा शोध या पीडित व्यक्तीने घेतला. अंधेरी (पूर्व) येथील उज्जवल वाइन्स या दुकानाचा फोन क्रमांक सर्च इंजिनवर आढळला. त्याने या वाइन शॉपवर दूरध्वनी करून वाइन ऑर्डर केली. ऑर्डर देताना मी कॅश ऑन डिलिव्हरीच्या पर्यायाबाबत सांगितले. मात्र, कॅश ऑन डिलिव्हरी आम्ही बंद केली असल्याचे सांगून क्रेडिट कार्डची माहिती समोरच्या व्यक्तीने घेतली असल्याचे पीडित व्यक्तीने सांगितले. याआधीदेखील याच वाइन शॉपमधून वाइन ऑर्डर केली होती. त्यामुळे शंका आली नसल्याचेही पीडित व्यक्तीने सांगितले. सौम्य भाषेत संवाद साधून फोनवरील व्यक्तीने पीडित व्यक्तीच्या कार्ड डिटेल्ससोबत ओटीपीदेखील मागून घेतला.
शनिवारी रात्री 10.20 आणि 11.15 वाजण्याच्या सुमारास पीडित व्यक्तीच्या खात्यातून व्यवहार करण्यात आला. पहिल्या व्यवहाराच्या वेळी क्रेडिट कार्डमधून 31 हजार 777 रुपयांचा व्यवहार करण्यात आला. याची विचारणा केल्यानंतर त्या व्यक्तीने चुकून एवढी रक्कम घेतली असल्याचे सांगत काही वेळाने रक्कम पुन्हा तुमच्या खात्यात रक्कम येईल असे पीडित व्यक्तीने सांगितले. त्यानंतर पुन्हा 31 हजार 777 आणि शेवटी रात्री 11.15 वाजण्याच्या सुमारास 61 हजार रुपये क्रेडिट कार्ड वापरुन काढण्यात आल्याची माहिती पीडित व्यक्तीने दिली. या व्यवहारावर संशय आल्यामुळे कार्ड ब्लॉक करून बँकेकडे तक्रार नोंदवली असल्याची माहिती या व्यक्तीने दिली.
पोलिसांनी या प्रकरणी तक्रार नोंदवून घेतली आहे. उज्जवल वाइन शॉपच्या मालकाने आपल्या वाइन शॉपच्या नावाचा दुरुपयोग होत असल्यची तक्रार पोलिसांकडे केली आहे. पोलिसांनी 7027043565 आणि 8723877079 या दोन फोन क्रमांकाविरोधात गुन्हा नोंदवून घेतला आहे. या दोन्ही फोन क्रमांक ट्रॅकिंगवर असून अधिक तपास सुरू असल्याची माहिती पोलिसांनी दिली. फसवणूक करणार्‍या व्यक्तीने सव्वा लाख रुपये मोबिक्विक ई-वॉलेटमध्ये वळते केले. ई-वॉलेट ब्लॉक करण्याआधीच ठगाने बहुतांशी रक्कमेवर डल्ला मारला असल्याची माहिती पीडित व्यक्तीने दिली.