Breaking News

सोन्याचा भाव वाढला; दहा वर्षांतला सर्वांत महागडा दसरा

Gold Ornaments
मुंबई
दसर्‍याच्या मुहूर्तावर सोन्याची मागणी वाढल्यामुळे दरातही थोडी वाढ झाली आहे. पण गेल्या दहा वर्षांतला सोन्याचा चढता भाव बघता या वर्षभरात झालेली दरवाढ विक्रमी आहे. सराफा बाजारात आजचा सोन्याचा भाव प्रति तोळा 39300 ( ॠडढ सह )आहे. कालच्यापेक्षा हा दर वाढलेला आहे. आंतरराष्ट्रीय बाजारात न्यूयॉर्कमध्ये सोन्याचे दर 1 हजार 503 डॉलर प्रतिऔंस झाले तर चांदीचा दर 17. 47 डॉलर प्रतिऔंस आहे.

2010 साली 18000 ते 19000 च्या दरम्यान असलेला सोन्याचा दर आता 2019 मध्ये 40 हजारांच्या जवळ पोहोचला आहे. गेल्या वर्षीच्या दसर्‍याला सोन्याचा दर 31 हजार 912 होता. तो आता 39 हजार 300 झाला आहे. आंतरराष्ट्रीय बाजारात सोन्याच्या वाढलेल्या किमती, अमेरिका - चीन ट्रेड वॉर, भारतीय रुपयाचं गडगडलेलं मूल्य, जागतिक मंदीसदृश परिस्थिती अशी अनेक कारणं सोन्याच्या भाववाढीमागे आहेत.

दसरा किंवा विजया दशमी हा साडेतीन मुहूर्तांपैकी एक मुहूर्त मानला जातो. या दिवशी आवर्जून सुवर्ण खरेदी केली जाते.

त्यामुळे आजची दसर्‍याची भाववाढ ही स्थानिक बाजारातल्या वाढलेल्या मागणीमुळे झाली आहे. सोमवारी सोन्याच्या मागणीत घट झाल्याने दर कमी झाले होते.

10 वर्षांत सोनं  झळाळलं

दसर्‍याच्या मुहूर्तावर सोनं खरेदी होते. त्यामुळे त्या वर्षातला दसर्‍याच्या दिवशीचा दर महत्त्वाचा ठरतो. 2010 साली दसर्‍याच्या दिवशी सोन्याचा दर होता 19हजार 820 आणि आजचा दर आहे 39 हजार 300. 2015 नंतर असाच सोन्याचा दर मोठ्या प्रमाणावर वाढला होता. आदल्या वर्षी 26 हजार 862   असलेला दर 2016 च्या दसर्‍याला 29 हजार 678 वर पोहोचला. गेल्या वर्षीच्या दसर्‍याला सोन्याचा दर 31 हजार 912 होता. तो आता 39 हजार 300 झाला आहे.

08 ऑक्टोबर 2019 - 39300

19 ऑक्टोबर 2018 - 31912

30 सप्टेंबर 2017 - 29557

11 ऑक्टोबर 2016 - 29678

22 ऑक्टोबर 2015 - 26862

03 ऑक्टोबर 2014 - 26559

13 ऑक्टोबर 2013 - 28350

24 ऑक्टोबर 2012 - 30854

6 ऑक्टोबर 2011 - 26510

17 ऑक्टोबर 2010 - 19820

तुम्ही सराफाकडून जे सोनं खरेदी करता त्याच्या किंमती स्पॉट प्राइस या न्यायाने ठरतात. बहुतांश शहरात सराफांच्या संघटनेचे सदस्य मिळून बाजार सुरू होण्याच्या वेळी सोन्याचे भाव ठरवतात. त्यामुळे वेगवेगळ्या शहरात सोन्याचे भाव वेगवेगळे असतात.