Breaking News

फुलांचे दर वधारणार : पावसामुळे दर दुप्पट होण्याची शक्यता

Flower Market
ठाणे
 दिवाळी सण अवघ्या दोन दिवसांवर येऊन ठेपला असतानाच अवकाळी पावसाचा फटका झेंडूच्या फुलांवर झाला आहे. त्यामुळे बरीच फुले खराब होत असल्यामुळे दिवाळीत या फुलांचे दर दुप्पट होण्याची शक्यता असल्याचे व्यापार्‍यांनी स्पष्ट केले.
ठाण्यातील स्थानक रोड परिसरातील होलसेल फुल बाजारात सध्या नाशिक, जुन्नर, सांगली अणि सातारा परिसरातून झेंडू, शेवंती अशा फुलांची आयात होत आहे. गेल्या काही दिवसांपासून पडणार्‍या अवकाळी पावसामुळे फुलविक्रेत्यांचे मोठे नुकसान होत आहे. ओला आणि सुका झेंडू अशा दोन प्रकारांत फुलांची विक्री होत असून ओला झेंडू सध्या होलसेलमध्ये 30 रुपये किलोने, तर सुका झेंडू 60 रुपये किलोने विक्री होत आहे. मात्र दोन दिवसांनी आलेल्या दिवाळी सणाला फुलांची प्रचंड मागणी असते. खराब झेंडुमुळे मागणीच्या तुलनेत पुरवठा कमी असल्याने दिवसेंदिवस झेंडूच्या दरात वाढ होण्याची शक्यता वर्तविण्यात येत आहे. झेंडूमध्ये कोलकाता झेंडू, नामधारी झेंडू, पिवळा झेंडू , कापरी झेंडू अशा वेगवेगळ्या प्रकारांतील झेंडूची फुले बाजारात उपलब्ध आहेत. तर मोगरा बेंगळुरू, वसई आणि बदलापूर अशा ठिकाणांहून ठाण्यात येत असून सध्या तो 500 ते 600 रुपये किलोने विक्री होत असून भाऊबिजेच्या दिवशी मोगर्‍याचे दुप्पट दर होणार असल्याचेही सांगण्यात आले.
झेंडू 60 ते 30 रुपये किलो असून तो 80 ते 100 रुपये किलोवर पोहोचणार असून शेवंती सध्या 80 असून 150 रुपये किलो गाठेल आणि निशिगंधा 120 रुपये किलो असून ती 200 रुपये किलोवर पोहोचेल. दिवाळी सणामध्ये तोरण, पूजेसाठी फुलांची मागणी अधिक असते, मात्र आता ठाण्यातील फुलांच्या बाजारात दिवसेंदिवस मागणी वाढत असल्याचे चित्र आहे.
अवकाळी पावसामुळे झेंडूच्या फुलांमध्ये प्रचंड नुकसान झाले आहे. त्यामुळे ओल्या फुलांची आयातही सध्या होत आहे. दिवाळी सणाला फुलांची सर्वाधिक मागणी असते. त्यामुळे सध्याच्या फुलांच्या दरात दुप्पट वाढ होण्याची शक्यता आहे.