Breaking News

विद्यापीठ देणार नोकर्‍या

मुंबई
 मुंबई विद्यापीठाशी संलग्न कॉलेजांत इंजिनीअरिंग, विज्ञान पदवी आणि पदव्युत्तर अभ्यासक्रमांच्या अखेरच्या वर्षात शिक्षण घेत असलेल्या विद्यार्थ्यांना नोकरीची संधी उपलब्ध करून देण्यात येणार आहे. यासाठी विद्यापीठाने विविध कॉलेजांमध्ये तीन दिवसीय शिबिराचे आयोजन केले आहे. यासाठी ऑनलाइन परीक्षा व मुलाखतीच्या माध्यमातून विद्यार्थ्यांची निवड करण्यात येणार असून, निवड होणार्‍या विद्यार्थ्यांना दरवर्षी तीन लाख 60 हजार रुपयांपर्यंतचे पॅकेज मिळेल.
मुंबई विद्यापीठ आणि इन्फोसिस लिमिटेड यांच्या संयुक्त विद्यमाने सन 2020 मध्ये बी.ई., बी.टेक., एम.ई., एम.टेक., एमसीए, एम.एस्सी. अभ्यासक्रम पूर्ण करणार्‍या विद्यार्थ्यांच्या बॅचसाठी नोकरी शिबीर आयोजित करण्यात आले आहे. सायन येथील के. जे. सोमय्या कॉलेजचे प्राचार्य डॉ. सुरेश उकरंडे आणि ठाणे येथील ए. पी. शाह इन्स्टिट्यूट ऑफ टेक्नॉलॉजीचे प्राचार्य डॉ. उत्तम कोळेकर यांनी हे शिबीर आयोजित करण्यात महत्त्वपूर्ण भूमिका बजावली आहे. तीन दिवस चालणार्‍या या शिबिरामध्ये ऑनलाइन परीक्षा आणि मुलाखतीच्या आधारे विद्यार्थ्यांची निवड करण्यात येईल. ऑनलाइन परीक्षेमध्ये अ‍ॅप्टिट्यूड, तांत्रिक बहुपर्यायी प्रश्‍न, प्रोग्रामिंग व कोडिंगशी संबंधित प्रश्‍नांचा समावेश असेल.
त्याचप्रमाणे विद्यार्थ्यांची लेखन कौशल्याचीही परीक्षा घेण्यात येणार आहे. शिबिरातून निवडण्यात येणार्‍या विद्यार्थ्यांना दरवर्षी तीन लाख 60 हजार रुपये इतके पॅकेज मिळणार आहे. 15 ऑक्टोबर रोजी ठाण्यातील ए. पी. शाह इन्स्टिट्यूट ऑफ टेक्नॉलॉजी येथे पहिल्या दिवसाचे शिबीर होईल. 16 ऑक्टोबर रोजी सोमय्या कॉलेजमध्ये दुसर्‍या दिवसाचे शिबीर असेल, तर 17 ऑक्टोबर रोजी ए. पी. शाह कॉलेजमध्ये शिबीर होईल. यामध्ये सिस्टिम इंजिनिअर या पदासाठी मुलाखती घेण्यात येतील.