Breaking News

प्रो कबड्डी लीगचा अंतिम सामना दिल्ली विरूद्ध बंगाल

गतविजेत्या बंगळुरू बुल्सचे व यू मुंबाचेही आव्हान संपुष्टात 

अहमदाबाद/वृत्तसंस्था
प्रो कबड्डी लीगमध्ये उपांत्य सामन्यात बंगालने आपला संघ एकखांबी तंबू नाही, कर्णधार आणि हुकमी चढाईपटू मणिंदरसिंग संघात नसतानाही आपण महत्त्वाच्या लढतीत जिंकू शकतो हे बंगाल वॉरियर्सने बुधवारी प्रो कबड्डी लीग लढतीत दाखवून दिले. अहमदाबाद येथील ट्रान्स स्टेडिया येथे पार पडलेल्या प्रो कबड्डी लीगच्या उपांत्य फेरीत बंगाल वॉरियर्सने यू मुम्बावर 37-35 असा विजय मिळवत फायनलमध्ये धडक मारली. रविवारी रंगणार्‍या अंतिम लढतीत त्यांचा सामना होईल तो दबंग दिल्लीशी. उपांत्य फेरीत दिल्लीने बेंगळुरू बुल्सवर 44-38 अशी मात केली. दिल्ली आणि बंगाल हे दोन्ही संघ प्रथमच प्रो कबड्डी लीगच्या फायनल दाखल झाले आहेत. त्यामुळे यंदा या लीगला नवा विजेता मिळणार आहे.
यू मुम्बाविरुद्धच्या लढतीत बंगालचा कर्णधार मणिंदर खांद्याच्या दुखापतीमुळे खेळू शकला नाही. साखळीतील दिल्लीविरुद्धच्या लढतीत झालेल्या दुखापतीतून तो अद्याप सावरू शकलेला नाही. तरीदेखील अनुभवी सुकेश हेगडे (8), मोहम्मद नबिबक्श (5) आणि प्रपंजन (4) यांनी चढायांमध्ये पुढाकार घेतला. तर रिंकू नरवाल (4) जीवाकुमार (3) आणि बलदेवसिंग (2) यांनी पकडीत कमाल करत यू मुम्बाला संधी दिली नाही. मुम्बाकडून अभिषेकसिंगने 11, तर अजिंक्य काप्रेने 5 गुण पटकावले; पण उपांत्य लढतीत मुम्बाचा कर्णधार फझल अत्राचली पकडीत फक्त एक गुण मिळवू शकला. बंगालच्या चढाईपटूंनी त्याला दोनवेळा बाद करण्यात यश मिळवले. मुम्बाकडून मोक्याच्या क्षणी चुकाही झाली. या चुका त्यांच्या अंगलट आल्या. यु मुंबाकडून अतिरिक्त गुण बंगाला बहाल करण्यात आले. मुंबाचा अभिषेक 3 तर कर्णधार फजल अत्राचली व अनुभवी संदीप नरवाल प्रत्येक एक वेळीस स्वयंचित झाले.
त्याआधी पार पडलेल्या पहिल्या उपांत्य लढतीत पुन्हा एकदा नवीनकुमारच्या खणखणीत कामगिरीमुळे दबंग दिल्ली संघाने बेंगळुरू बुल्सवर 44-38 अशी मात करत रविवारी रंगणार्‍या फायनलमधील प्रवेश निश्‍चित केला. नवीनने 15 गुणांची कमाई केली असली तरी संपूर्ण दिल्ली संघ सर्वोत्तम खेळला. पकडीत अनिलकुमारने चार गुण घेत दिल्लीचा बचाव भक्कम केला. दिल्लीचा भरवशाचा बचावपटू रवींदर पहलने बेंगळुरूचा हुकमी चढाईपटू पवन सेहरावतची पकड करत बेंगळुरूला ही लढत जड जाईल याची प्रचिती करून दिली. अशीच झंझावाती कामगिरी करत दिल्लीने सहाव्या मिनिटालाच बेंगळुरूवर लोण चढवला. तर दुसरा लोण 13 व्या मिनिटाला चढवत दिल्लीने तब्बल 11 गुणांची आघाडी घेतली. दिल्लीच्या नवीने सलग विसाव्यांदा सुपर टेनची कमाई केली. बेंगळुरूने उत्तरार्धात आक्रमक कामगिरीवर भर दिला; पण दिल्लीच्या अष्टपैलू कामगिरीपुढे बेंगळुरूचा निभाव लागला नाही. दिल्लीकडून नवीन हा प्रत्येक लढतीत सरस ठरत असला तरी चंद्रन रणजित आणि विजय हेदेखील चढाईत योगदान देत होते. बेंगळुरूकडून पवन सेहरावतने (18) सुपर टेन पूर्ण केले; पण त्याची झुंज अपयशी ठरली. बंगळुरूचा हुकमी एक्का पवन सेहरावात याला दंबग दिल्लीने सामन्यात तब्बल 20 मिनिटाहून अधिक जास्त मैदानाच्या बाहेर बसविले.
 
नवीन ठरतोय दिल्लीचा हुकमी एक्का
प्रो-कबड्डीच्या सातव्या हंगामात दबंग दिल्लीचा युवा चढाईपटू नवीन कुमार हा संघासाठी हुकुमाचा एक्का ठरतोय. यंदाच्या हंगामात साखळी सामन्यापासून दिल्लीला गुणतालिकेत आघाडीवर ठेवण्यात नवीनचा महत्वाचा वाटा आहे. यादरम्यान नवीन कुमारने पाटणा पायरेट्सचा अनुभवी चढाईपटू प्रदीप नरवालचा विक्रमही मोडीत काढला आहे. आपल्या अखेरच्या साखळी सामन्यात यू मुम्बाने दबंग दिल्लीला 37-37 अशा बरोबरीत रोखलं. या सामन्यात नवीनने चढाईत 19 गुणांची कमाई करत सातव्या हंगामात 20 व्या ‘सुपर 10’ ची नोंद केली. नवीनने आत्तापर्यत 21 सुपर टेनची कमाई केली आहे.