Breaking News

मासेमारीचा हंगाम यंदाचा कोरडाच

शेतकर्‍यांप्रमाणेच नुकसानभरपाई देण्याची मागणी

वसई
 अवकाळी पाऊस, चक्रीवादळे, पर्ससीन नेटमार्फत होणारी मासेमारी आणि त्यात भर म्हणजे मत्स्यदुष्काळ यांमुळे मच्छिमारांचा यंदाचा हंगाम कोरडा गेला आहे. त्यामुळे मच्छिमार हे आर्थिक संकटात सापडले असून, शेतकर्‍यांप्रमाणे त्यांच्या देखील हातचा घास हिरावून गेला आहे. त्यामुळे नुकसान भरपाईची मागणी सध्या वसईतील मच्छिमारांकडून जोर धरू लागली आहे.
पावसाळ्यात मत्स्यप्रजातीसाठी जून आणि जुलै हा प्रजननाचा काळ असतो. शिवाय समुद्रात वादळी वार्‍यांचाही धोका असतो. या करिता दोन महिने मासेमारी बंद ठेवली जाते. मात्र यावेळी पाऊस लांबल्याने दिवस वाढत जाऊन अडीच महिन्याहून जास्त काळ मासेमारी बंदी होती. तर दुसरीकडे गणपती उत्सव, नवरात्र उत्सव यामुळे माशांना मागणी कमी होती. यामुळे मच्छिमारांना यामधून कोणत्याही प्रकारचे उत्पन्न मिळाले नसून मासेमारी करण्यासाठी येण्या जाण्याचा खर्चाचा अधिक भार सहन करावा लागला. त्यामुळे पुढील महिने ही कसर भरून काढण्यासाठी सज्ज झालेल्या मच्छिमारांच्या आनंदाला या वादळाने ग्रहण लावले आहे.
मागच्या आठवड्यात आलेल्या ‘क्यार’ वादळामुळे मच्छिमारांना गेल्या पावली पुन्हा मागे परतावे लागले होते. त्यात या तीन दिवस आलेल्या ‘महा’ चक्रीवादळामुळे पुन्हा मच्छिमारीसाठी गेलेल्या मच्छिमारांना परतावे लागले. यामुळे मच्छिमारांचे लाखोंचे नुकसान झाले आहे. अर्ध्यातूनच दोन्ही वेळा मासेमारी करण्यास गेलेल्या मच्छिमारांना किनार्‍यावर यावे लागल्याने मासेमारीमध्ये घट झाली असून ऐन मच्छिमारीच्या मोसमात त्यांना मत्स्य संकटाला समोरे जावे लागत आहे. यासाठी शेतकर्‍यांप्रमाणे मच्छिमारांना देखील नुकसान भरपाई मिळावी मागणी स्थानिक मच्छिमारांनी केली आहे. तर दुसरीकडे नुकताच भाईंदर उत्तन येथे मत्स्यव्यवसाय मंत्री महादेव जानकर यांनी नुकसान झालेल्या मच्छिमारांना भेट दिली. यावेळी त्यांनी, ओल्या दुष्काळाचा फटका बसलेल्या राज्यातील शेतकर्‍यांसह मच्छिमारांना देखील नुकसान भरपाई देण्यास मुख्यमंत्री देवेंद्र फडणवीस यांनी मान्यता दिली आहे,’ अशी माहिती त्यांनी दिली. मात्र सध्या सरकार कोण प्रस्थापित करणार? यामध्येच सर्व गाडे अडकल्याने यामध्ये शेतकरी आणि मच्छिमार यांना नुकसान भरपाई नक्की कधी मिळणार, असा सवाल समोर येत आहे.
यंदाचा हंगाम कोरडा गेला असून, आम्हा मच्छिमारांना त्याचा आर्थिक फटका बसला आहे. एवढेच नव्हे तर सुक्या मासळीचे देखील अवकाळी पावसामुळे मोठ्या प्रमाणावर नुकसान झाले आहे. याची भरपाई देखील शासनाने दिली तर मच्छिमारांवरील आर्थिक संकट दूर होईल. - निनाद पाटील, स्थानिक अर्नाळा
पर्ससीन जाळी वापरणार्‍यांचा धुमाकूळ
पर्ससीन जाळी पर्सच्या आकारासारखी गोलाकार आणि तीन किमी लांब असते. ही जाळी तीन किमी अंतरात गोलाकार समुद्रात सोडली जाते. नंतर ती खालून बंद होते. 40 ते 50 लाख रुपये किंमतीची ही जाळी मोठ्या भांडवलदार ट्रॉलर्सकडे असतात. हे ट्रॉलर्स माशांना बेशुद्ध करण्यासाठी समुद्रात रसायने सोडतात. त्यामुळे घोळ, रावस, दांडा, सुरमई, बांगडा, शिंगाडा, शार्कमुशी असे ताकदवान मासेही अर्धमेले होतात. पर्ससीन जाळ्याने मासेमारी करणारे फक्त निर्यातीची मासळी उचलतात. ती मासळी एका वेळी 5 ते 10 टनांपेक्षा जास्त असते. जाळ्यात सापडलेले बाकीचे बोंबिल, मांदेळी, शिंगाडे, छोटे बांगडे इत्यादी कमी किंमतीचे मासे 5 ते 10 टन मासे समुद्रात फेकून देतात. त्यामुळे तीन किलोमीटरच्या मोठ्या अंतरातील माशांचे साठे एकाच वेळी संपुष्टात येतात. पर्ससीन जाळ्यामुळे माशांची पिल्ले प्रजोत्पादनायोग्य होण्याआधीच पकडली जातात. त्यामुळे समुद्रतळावरील जीवसृष्टीची हानी होते. पर्यावरणावर प्रतिकूल परिणाम होऊन मत्स्योत्पादन बाधित होते. अशा एक हजारापेक्षा जास्त भांडवलदारांच्या पर्ससीन जाळ्यांनी समुद्रात सध्या धुमाकूळ घातला आहे. यामुळे माशांच्या साठ्यावर त्यांचा परिणाम होत आहे.