Breaking News

सांडपाणी पुनर्प्रक्रिया केंद्रांची पायाभरणी

मुंबई
दररोज समुद्रात वाहून जाणार्‍या हजारो दशलक्ष लिटर सांडपाण्यावर प्रक्रिया करून त्याचा पुनर्वापर करण्यासाठी महापालिकेतर्फे पुनर्प्रक्रिया केंद्राची उभारणी करण्यात येणार आहे. सात प्रक्रिया केंद्रापैकी वर्सोवा व घाटकोपर या दोन केंद्रांच्या कामासाठी प्रकल्प व्यवस्थापन सल्लागार म्हणून टाटा कन्सल्टिंग इंजिनीअर्स लिमिटेड कंपनीची निवड करण्यात आली आहे. या दोन्ही केंद्रांच्या प्रकल्प सल्ल्यासाठी 55 कोटी रुपये देण्यात येणार आहेत.
घाटकोपर व वर्सोवा या सध्या अस्तित्वात असलेल्या व सांडपाणी पुनर्प्रक्रिया केंद्रात सांडपाण्यावर प्रक्रिया करून ते खाडीत सोडण्यात येते. हे केंद्र क्षमतेने खूपच लहान आहे. त्यामुळे या केंद्राचा विस्तार केला जाणार आहे. सांडपाणी विल्हेवाटीसंदर्भात प्रदूषण नियंत्रण मंडळाची दिवसेंदिवस कडक होणारी धोरणे, वाढणारी लोकसंख्या या बाबी लक्षात घेऊन पालिकेने 2002 मध्ये मलनि:सारण प्रकल्प-2 हाती घेतला आहे. या प्रकल्पाचा अभ्यास करून नवीन प्रक्रियाकेंद्र उभारण्यासाठी संकल्पचित्रे, बांधकाम व देखरेख या तत्त्वावर वरळी, वांद्रे, धारावी, वर्सोवा, भांडुप, घाटकोपर व मालाड यांच्यासाठी निविदा मागवण्यात आल्या आहेत.
सांडपाणी प्रक्रियाकेंद्राच्या कामाचा दर्जा चांगला राखण्यासाठी काम सुरू असताना तांत्रिक देखरेख करणे आवश्यक आहे. त्यामुळे बांधकाम व प्रकल्प व्यवस्थापनासाठी या क्षेत्रातील कार्यरत असलेली प्रकल्प व्यवस्थापन सल्लागार सेवा नियुक्त करण्यासाठी पालिकेने निविदा मागवल्या होत्या. त्यानंतर टाटा कन्सल्टिंग इंजिनीअर्स लिमिटेड कंपनीची निवड करण्यात आली आहे. दोन्ही केंद्रांसाठी अनुक्रमे 19 कोटी सात लाख रुपये व 35 कोटी 39 लाख रुपये मोजण्यात येणार आहेत. विधानसभा निवडणुकीच्या आचारसंहितेमुळे सल्लागार नियुक्तीला काही दिवसांपूर्वी निवेदनाद्वारे मंजुरी देण्यात आली होती. आचारसंहिता संपल्यामुळे आता प्रस्ताव आणण्यात आला असून तो स्थायी समितीच्या बैठकीत मंजुरीसाठी मांडण्यात आला आहे.
वर्सोवा केंद्राची दुरुस्ती
सध्याच्या वर्सोवा सांडपाणी पुनर्प्रक्रिया केंद्रात मोठ्या दुरुस्तीचे काम करण्यात येणार आहे. यामध्ये, अंतर्गत व बाह्य भिंतींचे गिलावा आणि रंगरंगोटी कामे, छताचे वॉटरप्रुफिंग, जलवाहिन्यांची कामे, खिडक्या व दरवाजे यांची दुरुस्ती कामे, लोखंडी छप्पराची दुरुस्तीची कामे केली जाणार आहेत. यासाठी पालिकेने निविदा मागवल्या होत्या. त्यास 7 कंत्राटदारांनी प्रतिसाद दिला. त्यापैकी 27.88 टक्के कमी दर भरणार्‍या कंत्राटादाराला हे काम देण्यात आले आहे. पुढील नऊ महिन्यांत हे पूर्ण केले जाणार आहे.