Breaking News

सर्वसाधारण सभेवरून भाजपचा लेटरबॉम्ब

ठाणे
 ठाणे महापालिकेची सर्वसाधारण सभा जुलै महिन्यात तहकूब झाल्यापासून साडेतीन महिन्यांत महासभेचे आयोजन झालेले नाही. त्यामुळे ठाणेकर नागरिकांचे प्रश्‍न मार्गी लावण्यात दिरंगाई होत असल्याचा आरोप करून भाजपच्या गटनेत्यांनी महापौरांना पत्र लिहून आपली नाराजी व्यक्त केली आहे. सर्वसाधारण सभेअभावी विकासकामेही होत नसल्याचे सांगत भाजपकडून शिवसेनेवर ह‘ा चढवण्यात आला आहे. त्यामुळे राज्यस्तरावर महायुतीमध्ये सुरू असलेल्या सत्तासंघर्षाचे पडसाद ठाणे महापालिकेच्याही प्रांगणात उमटण्याची चिन्हे आहेत.
विधानसभा निवडणुकांनंतर राज्यातील सरकार स्थापनेविषयी एकमत होत नसताना ठाणे महापालिकेच्या राजकारणामध्येही भाजप आणि शिवसेना यांच्यामधील तणाव वाढू लागला आहे. मंगळवारी ठाणे महापालिकेतील भाजपचे गटनेते नारायण पवार यांनी ठाणे महापालिकेच्या महापौर मीनाक्षी शिंदे यांना पत्र पाठवून सर्वसाधारण सभा घेण्याची विनंती केली. गेल्या साडेतीन महिने सर्वसाधारण सभा घेतली नसल्याने ठाणेकरांची हित साधता आला नसल्याचा दावा या पत्रामध्ये केला आहे. ठाणे महापालिकेची 19 जुलै रोजीची सर्वसाधारण सभा तहकूब करण्यात आली होती. तर त्यानंतर 20 ऑगस्ट रोजी लावण्यात आलेली सभा अतिवृष्टीमुळे रद्द करण्यात आली. पुढे सप्टेंबर महिन्यामध्ये विशेष सर्वसाधारण सभा घेण्यासंदर्भात भाजपकडून पत्रव्यवहार करण्यात आला होता. परंतु निवडणूक आचारसंहिता आल्यामुळे ती सभाही होऊ शकली नव्हती. त्यामुळे शहरात साडेतीन महिने सर्वसाधारण सभा झालेली नाही. या सभा होऊ शकलेल्या नसल्याबद्दल भाजप नगरसेवकांकडून आश्‍चर्य व्यक्त करण्यात आले आहे. तर या दिरंगाईमुळे सात महिन्यांमध्ये 2019-20 या आर्थिक वर्षामधील निधीही खर्च होऊ शकला नसल्याचा दावा करत ठाणेकरांचे हित साधता येत नसल्याची तक‘ार केली आहे. यातून शिवसेनेला लक्ष करण्याचा प्रयत्न भाजपकडून झाल्याची चर्चा राजकीय वर्तुळात सुरू आहे.
अतिवृष्टी आणि विधानसभा निवडणूक आचरसंहितेमुळे ठाणे महापालिकेची सर्वसाधारण सभा होऊ शकली नव्हती. पुढील दोन दिवसांमध्ये सर्वसाधारण सभेचे आयोजन केले जाईल.
मीनाक्षी शिंदे, महापौर, ठाणे महापालिका