Breaking News

‘... अन्यथा जनता धडा शिकवेल’; पवारांची मोदींवर टीका

मुंबई
नरेंद्र मोदी सरकारच्या चुकीच्या धोरणांमुळे देशातील कृषी, वाहन उद्योग, लघुउद्योग आणि बांधकाम क्षेत्रांना मोठ्या प्रमाणात फटका बसला असून, देशाच्या विकासदरात मोठी घसरण झाली आहे. देशाची बिघडत चाललेली अर्थव्यवस्था सरकारने लवकर रुळावर आणावी अन्यथा जनता धडा शिकवेल, असा इशारा राष्ट्रवादी काँग्रेसचे अध्यक्ष शरद पवार यांनी बुधवारी दिला.
पवार यांनी बुधवारी मुंबईतील यशवंतराव चव्हाण प्रतिष्ठानच्या सभागृहात पत्रकार परिषद घेतल्यानंतर देशाच्या अर्थव्यवस्थेबाबत चार पानांचे टिपण पत्रकारांना वितरित केले आहे. त्यात त्यांनी देशाच्या ढासळत चाललेल्या अर्थव्यवस्थेबाबत चिंता व्यक्त केली आहे. भाजपप्रणित रालोआ सरकार सत्तेत आल्यानंतर पहिल्या वर्षी (2015) शेतकर्‍यांच्या आत्महत्यांचा दर 39 टक्क्यांवर गेला. त्यानंतर सहा वर्षांत देशात 15 हजार शेतकर्‍यांनी आत्महत्या केल्या आहेत. नोटाबंदीच्या वादग्रस्त निर्णयामुळे सहकारी क्षेत्रातील पतपुरवठा व्यवस्था पूर्णपणे कोलमडून पडली. यंदा पहिल्या त्रैमासिक काळात कृषी विकासदर दोन टक्के इतका नीचांकी घसरल्याचे त्यांनी सांगितले.
सार्वजनिक क्षेत्रातील 21 बँकांकडे भांडवलाची चणचण असून त्यांचा एनपीए (बुडीत भांडवल) चार लाख कोटींवर गेला आहे. रिझर्व्ह बँकेच्या राखीव भांडवलातील 1 लाख 76 हजार कोटी रु. घेऊनही सार्वजनिक क्षेत्रातील बँकांना भांडवलाची चणचण भासत असल्याचे पवार यांचे म्हणणे आहे. चुकीच्या धोरणांमुळे देशातील दीड कोटी लोक बेरोजगार झाले आहेत. 2015 मध्ये बेरोजगारीचा पाच टक्यांच्या घरातील दर 2017 मध्ये 16 टक्क्यांवर गेला आहे. सीएमआयईच्या नोंदीनुसार देशातील सध्याचा बेरोजगारीचा दर 8.4 टक्के, तर मेट्रो शहरांतील बेरोजगार दर 9.4 टक्के आहे, असे पवार यांनी नमूद केले आहे.
माजी पंतप्रधान डॉ. मनमोहन सिंग आणि नोबेल विजेते अर्थतज्ज्ञ अभिजित बॅनर्जी यांनी मोदी सरकारला चुकीच्या आर्थिक धोरणांबाबत वेळोवेळी सावध केले होते. मात्र यातून मोदी सरकारने काही धडा घेतला नाही, तर जनताच त्यांना धडा शिकवेल, असा इशारा पवार यांनी दिला आहे.