Breaking News

झाडांची उरली खोडे

मुंबई
 मेट्रो कारशेडच्या मागच्या बाजूला तापेश्‍वर मंदिराजवळ मेट्रोच्या कामादरम्यान सीप्झ, मरोळ, कफ परेड या ठिकाणांहून पुनर्रोपित केलेल्या झाडांची आता केवळ मृतावस्थेतील खोडेच उरली आहेत. या ठिकाणी नवे वृक्षारोपणही झालेले दिसते. मात्र, ही नवी रोपे कधी लावली याची तिथे नोंद नाही. त्यामुळे या पुनर्रोपण आणि वृक्षारोपणाबद्दल प्रश्‍नचिन्ह उभे राहिले आहे. मेट्रोचे काम सुरू करताना अनेक ठिकाणी झाडांची छाटणी करण्यात आली तर काही ठिकाणाहून झाडांचे पुनर्रोपण करण्यात आले. त्यांपैकी पिंपळ, गुलमोहोर, बोर अशी काही झाडांची खोडे तापेश्‍वर मंदिराच्या परिसरात दिसतात. एका पिंपळावर त्याची सद्यस्थिती ‘जिवंत’ अशी नमूद करण्यात आली आहे, तर एका गुलमोहोराच्या झाडाला पालवी फुटलेली दिसते. बाकी इतर झाडांवर मात्र त्या झाडांच्या सद्यस्थितीबद्दल कोणतीही माहिती लिहिण्यात आलेली नाही. या झाडांच्या बाजूने मिठी नदीचा प्रवाह वाहतो. त्यामुळे तेथे भूजल पातळी चांगली आहे. असे असतानाही दोन वर्षांनंतरही या झाडांना पालवी फुटली नाही त्यावरून पुनर्रोपणाच्या वेळी झाडांची स्थिती काय असावी आणि नंतर त्यांची कशा पद्धतीने काळजी घेतली गेली असावी हे दिसते, अशी प्रतिक्रिया ‘आरे वाचवा’ चळवळीतील अम्रिता भट्टाचारजी यांनी दिली. पुनर्रोपित केलेल्या आणि नव्याने लावलेल्या झाडांच्या सद्यस्थितीबद्दल माहिती देण्याचे आदेश सर्वोच्च न्यायालयाने ‘एमएमआरसीएल’ला दिले आहेत. यामध्ये झाडांची उंची, जाडी यांबद्दलची माहितीही देणे अपेक्षित आहे. या ठिकाणी गेल्या 15 ते 20 दिवसांमध्ये काही नवी रोपे लावण्यात आलेले दिसते. मात्र, रोपांवर त्यासंदर्भातील कोणतीही माहिती नमूद केलेली नाही. हे रोपटी कधी लावली याची तारीख त्यावर असणे अपेक्षित आहे. मात्र, ते नमूद न केल्याने दिशाभूल करण्याचा प्रयत्न होऊ शकतो, असा आक्षेप यासंदर्भात आरे चळवळीतील नागरिकांकडून नोंदवला जात आहे. या रोपांमध्ये सप्तपर्णी, पिंपळ यांचा समावेश आहे. मात्र, या झाडांची मुळे किती पसरतील, झाडांचा घेर किती वाढेल याचा अंदाज घेऊन शास्त्रीय पद्धतीने वृक्षारोपण होणे अपेक्षित असते. मात्र, ही रोपटी अवघ्या सहा ते सात फुटांच्या अंतरावर लावण्यात आली आहेत. तसेच, ती मोठ्या झाडांच्या सावलीत असल्याने त्यांच्या वाढीवर परिणाम होण्याचीही शक्यता आहे. त्यामुळे कापलेल्या झाडांचा मोबदला म्हणून झाडे लावण्याचा उद्देश त्यातून कसा साध्य होणार हा प्रश्‍नच आहे. बिरसा मुंडा चौकाजवळही अशाच पद्धतीने वृक्षारोपण करण्यात आले आहे.