Breaking News

मायबोली मराठी भाषेचे वैभव जपण्यासाठी सरकारी काम आता मराठी भाषेतच

मुंबई
मायबोली मराठी भाषेचे वैभव जपण्यासाठी तसेच शासकीय कामकाजात मराठी भाषेचा अधिकाधिक वापर करण्यासाठी नव्या वर्षात अधिक प्रयत्न केले जाणार आहेत. राज्यात शासकीय कामकाज 100 टक्के मराठी करणे आवश्यक असून, त्यासाठी 1964च्या महाराष्ट्र राजभाषा कायद्यात काही स्पष्ट तरतुदी आहेत. शिवाय त्रिभाषा सूत्रानुसार राज्यातील केंद्र सरकारच्या अखत्यारीतील शासकीय कार्यालये, मंडळे, शासकीय उपक्रमांनीसुद्धा मराठीचा वापर करणे अनिवार्य आहे. यासाठी मुख्यमंत्री उद्धव ठाकरे यांच्या नेतृत्वाखाली महाराष्ट्र विकास आघाडीचे सरकार जाणीवपूर्वक प्रयत्न करणार आहे.
मायबोली मराठी भाषेचे वैभव जपण्यासाठी तसेच मराठी भाषेच्या संवर्धनासाठी दरवर्षी राज्यात 1 जानेवारी ते 15 जानेवारी दरम्यान मराठी भाषा संवर्धन पंधरवडा साजरा करण्यात येतो. यंदा राज्यात मराठी अस्मितेचा जागर करणाऱ्या शिवसेनेचा मुख्यमंत्री विराजमान झाल्यामुळे मायबोली मराठी भाषेचा अधिकाधिक शासकीय कामकाजात वापर होण्याच्या दृष्टिकोनातून या पंधरवड्यात मोठे प्रयत्न करण्यात येणार आहेत. सर्व मंत्रालयीन कार्यालये तसेच विभागाच्या अखत्यारीतील सर्व विभागीय कार्यालयांना याबाबत राज्य सरकारच्या मराठी भाषा विभागाने निर्देश दिले आहेत.
मराठीचा वापर शासकीय कामकाजात व्हायलाच हवा. देशाच्या विविध राज्यात तेथील मायबोली मातृभाषेचा वापर शासकीय कामकाजासाठी केला जातो. महाराष्ट्र राजभाषा कायद्यानुसार काही अपवाद वगळता सर्वच सरकारी कामकाज मराठी होणे आवश्यक आहे. त्रिभाषा सूत्रानुसार केंद्र सरकारच्या अखत्यारीतील महाराष्ट्रातील कार्यालयाच्या कामकाजात मराठी भाषेचा वापर होतो की नाही याचा त्या पंधरवड्यात आढावा घेतला जाणार आहे.
राज्यातील सर्व शासकीय, निमशासकीय कार्यालये, महामंडळे, राज्यातील केंद्र शासनाच्या अखत्यारीत असलेली सर्व कार्यालये, मंडळ, उपक्रम, सर्व खाजगी व व्यापारी बँका, सर्व शैक्षणिक संस्था, विद्यापीठे, महाविद्यालये आदी संस्थांना मराठी भाषा संवर्धन पंधरवडा साजरा करण्याच्या सूचना राज्य सरकारने दिल्या आहेत. मराठी भाषा आणि साहित्याबाबत परिसंवाद, कार्यशाळा आणि व्याख्यान आयोजित करणे, ग्रंथप्रदर्शन आयोजित करणे, मराठी वाचन संस्कृती वाढविण्यासाठी संवाद लेखकांशी यासारखे विविध उपक्रम राबविण्यात यावेत. विविध क्षेत्रात यशस्वी झालेल्या मराठी व्यक्तींचा सत्कार व मुलाखती आयोजित कराव्यात. अमराठी भाषिकांसाठी मराठी भाषा शिकण्याचे वर्ग आयोजित करावेत. सोशल मीडियावर मराठी भाषा जागृतीसाठी प्रयत्न करावेत तसेच मराठी सांस्कृतिक कार्यक्रम घ्यावेत अशा सूचना संबंधितांना देण्यात आल्या आहेत.