Breaking News

करोनामुळे नाटय संमेलन पुढे ढकलण्याचा निर्णय


 मुंबई : करोना विषाणूने जगभरात हाहाकार माजवला आहे. सिनेमांपासून ते खेळांपर्यंत प्रत्येक क्षेत्रावर याचा परिणाम झालेला दिसतो. एकीकडे मोठमोठ्या कार्यक्रमांपासून ते सिनेमाच्या प्रदर्शनाच्या तारखा बदलत आहेत. करोना विषाणूच्या वाढत्या प्रादूर्भावामुळे अखिर भारतीय मराठी नाट्य परिषदेने 100 वे नाट्य संमेलन पुढे ढकलण्याचा निर्णय घेतला आहे. नाट्य परिषदेचे अध्यक्ष नवनाथ कांबळी यांनी पत्रक प्रसिद्ध करून याबद्दल माहिती दिली.
फक्त मराठी सिनेसृष्टीवरच नाही तर बॉलिवूड आणि हॉलिवूडवरही याचा परिणाम स्पष्ट दिसून येतो. 27 मार्चपासून सुरू होणार्‍या 100 व्या नाट्य संमेलन आता होणार नसून अनिश्‍चित काळासाठी हे संमेलन पुढे ढकलण्यात आलं आहे. नाट्य संमेलन पुढे ढकलत असल्याची घोषणा नाट्य परिषदेकडून करण्यात आली आहे. सांगलीत 27 मार्च ते 14 जून या कालावधी नाट्य संमेलन संपन्न होणार होतं. भारतात करोना विषाणूचा पहिला बळी गेल्याने प्रशासनाकडून महत्त्वाची काळजी घेतली जात आहे. जगभरातील 100 हून अधिक देशात करोना व्हायरस पोहोचल्याने खबरदारीचे अनेक मार्ग अवलंबले जात आहेत. कोणत्याही ठिकाणी गर्दी न करण्याचं आवाहन सरकारकडून करण्यात आलं आहे. याचमुळे नाट्य परिषदेने हे संमेलन पुढे ढकलण्याचा निर्णय घेतला. विशेष म्हणजे काही दिवसापूर्वी जयंत पाटील यांनी आयोजकांची बैठक घेतली होती. यात हे संमेलन पार पाडण्याची चर्चा झाली होती. दरम्यान आता प्रशासकीय पातळीवर हे संमेलन पुढे ढकलण्याचा पर्याय सुचविण्यात आला होता. सांगलीचे निवास उपजिल्हाधिकारी यांनी हा सल्ला दिला. यावर विचार करून अध्यक्ष कांबळी यांनी हा निर्णय घेतला आहे.