नाशिक : शहरातील लिकर किंग म्हणून ओळख असलेल्या अतुल मदनला पोलिसांनी फरार घोषित केले आहे. मदनच्या शोधार्थ नाशिक पोलिसांची दोन पथके रवाना क...
नाशिक : शहरातील लिकर किंग म्हणून ओळख असलेल्या अतुल मदनला पोलिसांनी फरार घोषित केले आहे. मदनच्या शोधार्थ नाशिक पोलिसांची दोन पथके रवाना करण्यात आली आहेत.
नाशिक ग्रामीण पोलिसांनी तीन दिवसांपूर्वी अवैध मद्यसाठा जप्त केला. हा मद्यसाठा लिकर किंग अतुल मदनच्या वाईनशॉपमध्ये जात असल्याचे उघडकीस आल्यानंतर नाशिक जिल्हाधिकार्‍यांच्या आदेशाने अतुल मदन याचे नाशिक मधील 14 वाइनशॉप सील करण्यात आले होते. दरम्यान, या कारवाईनंतर अतुल मदन फरार झाला असून नाशिकच्या उत्पादन शुल्क विभागाने मदन याला तात्काळ अटक न करता एकप्रकारे संधी दिल्याची चर्चा सध्या शहरात आहे. अतुल मदनवर झालेल्या कारवाईने शहरातील वाईनशॉप चालकांमध्ये भीतीचे वातावरण आहे.
सर्वसामान्यांना किरकोळ गुन्ह्यांसाठी खाक्या दाखवणार्‍या उत्पादन शुल्क विभागाने, लिकर किंग अतुल मदनचे शहरातील तब्बल 14 दारु दुकाने सील केल्यानंतरदेखील त्याला अटक न केल्याने शहरात उलटसुलट चर्चा होऊ लागल्या. तीन दिवसांपूर्वीच ग्रामीण पोलिसांनी अवैध मद्यसाठा करणारा ट्रक पकडल्यानंतर हा प्रकार समोर आला. ग्रामीण पोलीस अधीक्षक सचिन पाटील यांनी गेल्या आठवड्यात नाशिक हद्दीत पशू खाद्याच्या ट्रकमधून जाणारा अवैध मद्यसाठा पकडला. विशेष म्हणजे लाखो रुपयांचा हा मद्यसाठा शहरातील एकाच दारु दुकान मालकाच्या दुकानांमध्ये जात होता. नाशिकच्या ग्रामीण पोलिस अधीक्षकांनी केलेल्या कारवाईने अवैध मद्यविक्री करणार्‍याचे धाबे दणाणले आहेत. नाशिक जिल्हाधिकार्‍यांनीदेखील या प्रकरणाची सखोल चौकशी करुन लिकर किंग अतुल मदनच्या मालकीच्या 14 दारु दुकानांना सील करत धडक कारवाई केली होती. दरम्यान, एकीकडे ग्रामीण पोलिस अधीक्षक, जिल्हाधिकार्‍यांनी थेट कारवाई केलेली असताना, उत्पादन शुल्क विभाग मात्र, अतुल मदन यांच्याकडून खुलासा आल्यानंतर अटक करु, अशा डिफेनसिव्ह मोडमध्ये का आहे, हे मात्र गुलदस्त्यात आहे.
