भुईंज / वार्ताहर : शेतकर्‍यांच्या काळजीतून नुकसान भरपाई म्हणून विम्याच्या माध्यमातून बुलडाणा अर्बनने 1 कोटी 13 लाखांची केलेली मदत शेतकरी ...
भुईंज / वार्ताहर : शेतकर्‍यांच्या काळजीतून नुकसान भरपाई म्हणून विम्याच्या माध्यमातून बुलडाणा अर्बनने 1 कोटी 13 लाखांची केलेली मदत शेतकरी हिताची आहे, असे मत किसन वीर साखर सातारा सहकारी कारखान्याचे अध्यक्ष मदन भोसले यांनी केले.
बुलडाणा अर्बन को-ऑप क्रेडिट सोसायटीच्या वतीने ही मदत देण्यात आली. किसन वीर कारखान्याला ऊस पुरवठा करणार्‍या ऊसतोडणी यंत्राचे मालक जितेंद्र घाटे यांचा अपघाती मृत्यू झाला. त्यांना बँकेच्या वाई शाखेकडून कर्जपुरवठा करण्यात आला होता. त्यांच्या वारसांना 25 लाखांचा धनादेश, तर खंडाळा येथील अजित भोसले यांच्या संपूर्ण नुकसान झालेल्या ऊसतोडणी यंत्राच्या नुकसान भरपाईपोटी 88 लाख रुपयांच्या विमा रक्कमेच्या धनादेशाचे वितरण भोसले यांच्या हस्ते करण्यात आले. यावेळी बुलडाणा अर्बनचे मुख्य कार्यकारी अधिकारी तथा पुणे कमर्शइल बँकेचे अध्यक्ष शिरीष देशपांडे, कारखान्याचे संचालक विजय चव्हाण, मालोजीराजे बँकेचे मुख्य कार्यकारी अधिकारी राजेश लड्डा, पुणे कमर्शइलचे संचालक अनिल शिंदे, मुख्य कार्यकारी अधिकारी धनंजय पाटील उपस्थित होते.
भोसले म्हणाले, गेल्या तीन-चार वर्षांपासून सहकारी साखर कारखान्यापुढे ऊसतोड मजुरांचा मोठ्या प्रमाणात तुटवडा जाणवत आहे. अशा स्थितीत यांत्रिकीकरणाने ऊसतोड करणे हा उपक्रम किसन वीर’ ने राबवला. त्याला बुलडाणा अर्बनने मशिन मालकांना अर्थसाहाय्य करून खर्‍या अर्थाने प्रोत्साहित केले.
देशपांडे म्हणाले, बुलडाणा सोसायटीने किसन वीरच्या विद्यमाने शेतकरी हा शेतकरी न राहता तोही एक उद्योजक, व्यावसायिक व्हावा. या हेतूने शेतकर्‍यांच्या मालकीचे हार्वेस्टर मशिन खरेदी करून कारखाना व्यवस्थापनाने यांत्रिकीकरणाने ऊसतोडणीस बळ दिले. त्याचा फायदा अनेक मशिन मालकांना झाला आहे. सोसायटीने खातेदार, ठेवीदार व कर्जदारांना विना मोबदला विम्याचे कवच दिले आहे. बुलडाणा अर्बनचे व्यवस्थापक मनोहर देशमुख यांनी प्रास्ताविक केले, तर विजय चव्हाण यांनी आभार मानले. या वेळी चंद्रकांत इंगवले, सचिन साळुंखे, मधुकर शिंदे, चंद्रसेन शिंदे, मधुकर नलवडे, विजय चव्हाण, प्रभारी कार्यकारी अशोकराव शिंदे, विठ्ठल कदम, मृत वारसांचे कुटुंबीय उपस्थित होते.
