शिर्डी / प्रतिनिधी: साईबाबांच्या मंदिरातील भाविकांची दर्शन मर्यादा वाढवण्यात आली आहे. अनलॉकनंतर आतापर्यंत रोज सहा हजार भाविकांना दर्शनाची ...
शिर्डी / प्रतिनिधी: साईबाबांच्या मंदिरातील भाविकांची दर्शन मर्यादा वाढवण्यात आली आहे. अनलॉकनंतर आतापर्यंत रोज सहा हजार भाविकांना दर्शनाची परवानगी मिळत होती; पण आता रोज 12 हजार भाविक साईंचे दर्शन घेऊ शकणार आहेत. साईंच्या दर्शनासाठी येणार्‍या भाविकांनी ऑनलाईन बुकिंग करावे, असे आवाहन साई संस्थानकडून करण्यात आले आहे.
नाताळमुळे होणार्‍या संभाव्य गर्दीच्या पार्श्‍वभूमीवर हा निर्णय घेतला गेला आहे. कोरोनाचे संकट टळले नसले, तरी प्रादुर्भाव कमी झाला आहे. या पार्श्‍वभूमीवर साई बाबांच्या दर्शनासाठी येणार्‍या भाविकांचीही संख्याही वाढत आहे. त्या पार्श्‍वभूमीवर साई संस्थानकडून एक महत्वाचा निर्णय घेण्यात आला आहे. साई संस्थानकडून रोज दर्शनासाठी येणार्‍या भाविकांची मर्यादा वाढवण्यात आली आहे; मात्र जास्त गर्दी झाल्यास दर्शन बंद केले जाणार असल्याचे साई संस्थानकडून स्पष्ट करण्यात आले. सुट्टीच्या दिवशी शिर्डीमध्ये ऑफलाईन बुकिंग काऊंटर बंद ठेवण्यात येणार आहेत.
साई संस्थानकडून रोज 12 हजार भाविकांना दर्शनाची परवानगी दिली जाणार आहे. त्यात आठ हजार भक्तांना ऑनलाईन फ्री पास तर चार हजार भक्तांना ऑनलाईन पेड पास दिले जाणार आहेत. 31 डिसेंबरला मंदिर खुले ठेवायचे, की नाही याबाबत मात्र अद्याप निर्णय झाला नसल्याची माहिती संस्थांचे मुख्य कार्यकारी अधिकारी कान्हूराज बगाटे यांनी दिली.
