सातारा / प्रतिनिधी : सातारा जिल्ह्याच्या दृष्टीने अतिशय जिव्हाळ्याचा प्रश्न बनलेल्या मेडीकल कॉलेजचा प्रश्न मार्गी लावण्यात यश आले आहे. उपमु...
सातारा / प्रतिनिधी : सातारा जिल्ह्याच्या दृष्टीने अतिशय जिव्हाळ्याचा प्रश्न बनलेल्या मेडीकल कॉलेजचा प्रश्न मार्गी लावण्यात यश आले आहे. उपमुख्यमंत्री अजित पवार यांच्या अध्यक्षतेखाली आणि पालकमंत्री ना. बाळासाहेब पाटील यांच्या उपस्थितीत झालेल्या बैठकीत वाढीव 60 एकर जागा हस्तांतरणाचा निर्णय घेण्यात आला असून त्यासाठी 61 कोटी रुपये निधीची तरतूद करण्यात आली आहे.
राज्य मंत्रीमंडळाचे खातेवाटप झाल्यानंतर लगेचच विकासकामे मंजूरीसाठी आ. शिवेंद्रसिंहराजे यांनी पाठपुरावा सुरु केला होता. नुकत्याच झालेल्या दोन दिवसीय अधिवेशनादरम्यान आ. शिवेंद्रसिंहराजे यांनी जिल्ह्याचे पालकमंत्री ना. पाटील यांच्यासमवेत ना. अजित पवार यांची भेट घेतली. यावेळी विविध विकास कामांबरोबरच सातारा जिल्ह्याचा महत्वाचा आणि जिव्हाळ्याचा प्रश्न असलेल्या मेडीकल कॉलेज लवकरात लवकर पुर्ण होण्यासाठी तातडीने निर्णय घ्यावा, अशी मागणी आ. शिवेंद्रसिंहराजे यांनी ना. पवार यांच्याकडे केली. यानंतर ना. पवार यांनी संबंधीत विभागाच्या अधिकार्‍यांची बैठक घेतली. या बैठकीला आ. शिवेंद्रसिंहराजे यांच्यासह पालकमंत्री ना. पाटील उपस्थित होते. बैठकीत चर्चा होवून नेमका विषय काय आहे, याची माहिती ना. पवार यांनी घेतली. कृष्णानगर येथील कृष्णा खोरे विभागाची 25 एकर जागा मेडीकल कॉलेजसाठी यापुर्वी अधिगग्रहीत करण्यात आली होती. उर्वरीत 60 एकर जागा हस्तांतरीत करण्याचा निर्णय प्रलंबीत होता. ही जागा तातडीने हस्तांतरीत करण्यात यावी. त्यासाठीच्या प्रशासकीय बाबी पुर्ण कराव्यात आणि मेडीकल कॉलेज उभारणीस प्रारंभ होण्यासाठी तातडीने निधीची तरतूद करावी तसेच कॉलेज प्रवेश प्रक्रीया सुरु करावी, अशी मागणी आ. शिवेंद्रसिंहराजे यांनी केली.
यानंतर ना. पवार यांनी तातडीने वाढीव 60 एकर जागा मेडीकल कॉलेजसाठी हस्तांतरीत करण्याचे आदेश अधिकार्‍यांना दिले. मेडीकल कॉलेजसाठी वैद्यकीय शिक्षणमधून 61 कोटी रुपये निधीची तरतूद ना. पवार यांच्या सुचनेनुसार करण्यात आली आहे. दरम्यान, मेडीकल कॉलेज नाशिक विद्यापिठाला संलग्न करण्याचा निर्णयही झाला असून आता नॅशनल मेडीकल कमिशनमार्फत येत्या 15 दिवसांत प्रत्यक्ष पाहणी करण्यात येवून पुढील कार्यवाही सुरु होणार आहे. अखेर जिल्ह्यातील विद्यार्थ्यांसाठी वैद्यकीय शिक्षणाचा मार्ग खुला झाला आहे. सातारा जिल्ह्याचा महत्वाचा आणि गरजेचा प्रश्न मार्गी लावल्याबद्दल आ. शिवेंद्रसिंहराजे भोसले यांनी ना. अजित पवार आणि ना. बाळासाहेब पाटील यांचे आभार मानले.
