पंढरपूर: भाजपचे नेते कल्याणराव काळे लवकरच राष्ट्रवादी काँग्रेसमध्ये प्रवेश करण्याची शक्यता आहे. सरकोली येथे शुक्रवारी झालेल्या कार्यक्रमात...
पंढरपूर: भाजपचे नेते कल्याणराव काळे लवकरच राष्ट्रवादी काँग्रेसमध्ये प्रवेश करण्याची शक्यता आहे. सरकोली येथे शुक्रवारी झालेल्या कार्यक्रमात काळे हे राष्ट्रवादी काँग्रेसचे अध्यक्ष शरद पवार यांच्यासोबत एकाच मंचावर उपस्थित होते. त्यामुळे काळे पुन्हा राष्ट्रवादी काँग्रेसमध्ये जाणार असल्याच्या चर्चांनी जोर धरला आहे.
या कार्यक्रमात काळे यांनी केलेल्या एका वक्तव्याचीही चांगलीच चर्चा आहे. आपण यापुढे शरद पवार जसे सांगतील, तसे काम करू, असे काळे यांनी म्हटले. पवार यांच्या मदतीमुळेच आज साखर कारखान्याचे धुराडे पेटले. आमच्यापण काही चुका झाल्या; परंतु त्यांनी कधीच दुजाभाव केला नाही. शेतकर्‍यांची कारखानदारी नीट चालावी, अशी त्यांची इच्छा आहे. त्यामुळे आज पंढरपुरातील विठ्ठल, चंद्रभागा आणि भीमा हे कारखाने सुरू झाले आहेत. त्यामुळे आपण यापुढे पवार यांच्या नेतृत्वाखाली काम करणार असल्याचे काळे यांनी सांगितले.
दिवंगत आमदार भारत भालके यांच्या कुटुंबीयांची भेट घेण्यासाठी पवार आज सकाळी सरकोली येथे आले होते. या सर्व कार्यक्रमात कल्याणराव यांची उपस्थिती अनेकांच्या भुवया उंचावणारी ठरली. काळे यांनी 2014 मध्ये काँग्रेसकडून निवडणूक लढवून 65 हजार मते मिळवली होती. ऐन लोकसभा निवडणुकांच्या तोंडावर ते भाजपत गेल्याने काँग्रेस-राष्ट्रवादीला माढ्यासारख्या बालेकिल्ल्यातच खिंडार पडले होते.
