अहमदनगर: यशस्विनी महिला ब्रिगेडच्या अध्यक्ष व राष्ट्रवादी काँग्रेसच्या कार्यकर्त्या रेखा जरे यांच्या हत्या प्रकरणातील मुख्य संसयित आरोपी, सक...
अहमदनगर: यशस्विनी महिला ब्रिगेडच्या अध्यक्ष व राष्ट्रवादी काँग्रेसच्या कार्यकर्त्या रेखा जरे यांच्या हत्या प्रकरणातील मुख्य संसयित आरोपी, सकाळचा माजी कार्यकारी संपादक बाळ ज. बोठे याने जामीन अर्जावरील सुनावणीच्या वेळी स्वतः न्यायालयात हजर राहावे, असा अर्ज पोलिसांकडून देण्यात आला. बोठे याचा आठवडाभरापेक्षा जास्त काळ शोध घेऊनही तो सापडला नसल्याने हा अर्ज देऊन पोलिसांनी एकप्रकारे माईंड गेम खेळला आहे, अशी चर्चा आहे. पोलिसांत खबरे असलेल्या बोठे याचा शोध घेण्यात पोलिसांचे खबरे आता कुठे गेले, असा प्रश्‍न उपस्थित होत आहे.
नगर जिल्ह्यात घडणार्‍या प्रत्येक हालचालीची खबरबात पोलिसांपर्यंत पोहोचते, असे काही वर्षांपूर्वी सांगितले जाई. त्याच जोरावर पोलिस गुंतागुंतीचे तपासही करीत असत; मात्र रेखा जरे हत्या प्रकरणातील मुख्य आरोपी बोठे हा गेल्या आठभरापासून पोलिसांना गुंगारा देण्यात यशस्वी ठरला आहे. या निमित्ताने पोलिसांच्या खबर्‍यांचे हे जाळे विस्कळित झाले आहे का, असा प्रश्‍न निर्माण झाला आहे. रात्रंदिवस धावपळ करूनही पोलिसांना बोठेला पकडण्यात यश आले नाही. बोठे याची माहिती मिळाल्यानंतर तेथे पोलिस जातात; पण प्रत्यक्षात त्यांच्या हाती काहीच लागत नाही. त्यामुळे पोलिसांना मिळणार्‍या माहितीबाबतही शंका उपस्थित होऊ लागली आहे. पोलिसांना चकवा देण्याचा हा प्रकार तर नाही ना, असा सवाल केला जात आहे.
बोठे याने नगरच्या जिल्हा व सत्र न्यायालयात अटकपूर्व जामीनासाठी अर्ज केला. या अर्जावर 11 डिसेंबरला सुनावणी ठेवण्यात आली, व या सुनावणीच्या वेळी सरकारी पक्षाला त्यांचे म्हणणे मांडण्यास सांगण्यात आले होते; मात्र सुनावणीच्या वेळी आरोपी बोठे याने स्वतः उपस्थित राहावे, असा अर्ज पोलिसांकडून देण्यात आला. पोलिसांचे म्हणणे ऐकण्यासाठी आता सोमवारी सुनावणी होणार आहे. आता 14 डिसेंबरला बोठे न्यायालयात हजर राहणार किंवा नाही, हे समजेल; परंतु यानिमित्ताने आठवडाभर शोध घेऊनही बोठे न सापडल्यामुळे पोलिसांना हा माईंड गेम खेळावा लागल्याची चर्चा सुरू झाली आहे.
