भुसावळचे आमदारही खडसेंचा रस्ता धरून राष्ट्रवादीत? जळगाव : माजी मंत्री एकनाथ खडसे यांनी भाजप सोडून राष्ट्रवादी काँग्रेसमध्ये प्रवेश केला. ...
भुसावळचे आमदारही खडसेंचा रस्ता धरून राष्ट्रवादीत?
जळगाव : माजी मंत्री एकनाथ खडसे यांनी भाजप सोडून राष्ट्रवादी काँग्रेसमध्ये प्रवेश केला. त्यानंतर उत्तर महाराष्ट्रात आणखी धक्के देण्याचा इशारा खडसे यांच्यासह राष्ट्रवादीच्या दिग्गज नेत्यांनी भाजपला दिला आहे. आता भाजपचे भुसावळचे आमदारही खडसे यांच्या पावलावर पाऊल टाकण्याची चिन्हे आहेत. आ. संजय सावकारे यांच्या पोस्टरवर चक्क खडसे यांचा फोटो झळकला आहे.
भाजपचे भुसावळचे आ. सावकारे हे खडसे यांचे खंदे समर्थक मानले जातात. खडसे यांनी राष्ट्रवादी काँग्रेसमध्ये प्रवेश केल्यानंतर सावकारेही हातात घड्याळ बांधणार का, असा प्रश्‍न निर्माण होत आहे. त्यातच सावकारें यांच्या वाढदिवशी झळकलेले पोस्टर राजकीय वर्तुळात कुजबूज वाढवण्यास कारणीभूत ठरले आहे. सावकारे यांच्या कार्यकर्त्यांनी भाजपच्या कुठल्याही नेत्याचा फोटो न लावता फक्त खडसे यांचा फोटो लावला. या पोस्टरचे फोटो सोशल मीडियावर व्हायरल झाले असून राजकीय वर्तुळात खळबळ उडाली आहे.
खानदेशातील मोठे नेते म्हणून ओळख असलेल्या खडसे यांनी आपल्या हातावर घड्याळ बांधले. त्यानंतर भविष्यात अनेक उलथापालथी होतील, अशा चर्चा रंगल्या होत्या. अनेक खडसे समर्थकांनी राष्ट्रवादी काँग्रेसमध्ये प्रवेश केला, तर काहींनी पक्षांतराच्या अडचणी येऊ नये, म्हणून टर्म झाल्यानंतर त्यांच्यासोबत जाण्याचा निर्णय घेतला आहे. खडसे यांचे खानदेश समर्थक म्हणून ओळख असलेले सावकारे आणि त्यांच्या समर्थकांनी वाढदिवशीच धक्का दिला. खडसे यांच्यासोबत असल्याचा अप्रत्यक्ष संदेश त्यांनी सोशल मीडिया आणि जाहिरातीच्या माध्यमातून दिला आहे. या पोस्टर किंवा वृत्तपत्रातील जाहिरातींमध्ये भाजपचे उत्तर महाराष्ट्रातील बडे नेते आणि संकटमोचक अशी ख्याती असलेल्या गिरीश महाजन यांचा फोटो नाही. भाजपच्या कुठल्याही मोठ्या नेत्यांचे छायाचित्र नाही. सावकारे यांचे पुढचे पाऊल कुठल्या दिशेने पडणार, याची उत्सुकता लागली आहे.
