पुणे / प्रतिनिधीः डेटिंग अ‍ॅपवर महिलांशी ओळख वाढवून त्यांचे अश्‍लील व्हिडिओ आणि फोटो मिळवून ब्लॅकमेल करणार्‍या एकाला गुन्हे शाखेच्या पोलि...
पुणे / प्रतिनिधीः डेटिंग अ‍ॅपवर महिलांशी ओळख वाढवून त्यांचे अश्‍लील व्हिडिओ आणि फोटो मिळवून ब्लॅकमेल करणार्‍या एकाला गुन्हे शाखेच्या पोलिसांनी अटक केली. संदीप जगन्नाथ धर्मक (वय 28) असे अटक केलेल्या तरुणाचे नाव आहे.
या प्रकरणी भारती विद्यापीठ पोलिस ठाण्यामध्ये एका डॉक्टर महिलेने फिर्याद दिली होती. फिर्यादी महिलेची डेटिंग अ‍ॅपवर आरोपी तरुणाशी ओळख झाली होती. त्यानंतर त्याने या महिलेचा विश्‍वास संपादन करून तिच्याशी ऑनलाइन चॅटिंग सुरू केले. या डॉक्टर महिलेचे काही नग्न फोटो आणि व्हिडिओ त्याने मिळवले. त्या आधारे ब्लॅकमेल करत तिला पैशाची मागणी सुरू केली. गुन्हा दाखल झाल्यानंतर पोलिसांनी तपास करून आरोपीला अटक केली.
त्याच्याकडे केलेल्या अधिक चौकशीत धक्कादायक माहिती उघडकीस आली. आरोपीने टिंडर व हिंज या अ‍ॅपवर नॉरमन व रेयान या नावाने फॉरेनर व्यक्तीचे फोटो लावून बनावट अकाऊंट तयार केले. यावर तो स्वतःला पुणे शहरात असणार्‍या मसाज सेंटरचा मॅनेजर असल्याचे सांगून महिलांशी ऑनलाइन चॅटिंग करत होता. नंतर महिलांना विश्‍वासात घेऊन त्यांचे अश्‍लील फोटो आणि व्हिडिओ मागून घ्यायचा. नंतर हे व्हिडिओ आणि फोटो उघड करण्याची धमकी देऊन त्यांच्याकडून पैसे उकळायचा. काही महिलांनी भीतीपोटी त्याला पैसेही दिलेले आहेत.
आरोपी हा सराईत गुन्हेगार असून त्याच्यावर यापूर्वी लष्कर पोलिस ठाणे आणि सायबर पोलिसांत अशा प्रकारचे दोन गुन्हे दाखल झालेले आहेत. या आरोपीने अशाप्रकारे आणखी कुणाला ब्लॅकमेल केले असल्यास त्यांनी पुढे येऊन पोलिसात तक्रार द्यावी, असे आवाहन सायबर पोलिसांनी केले आहे. पोलिस निरीक्षक महेंद्र जगताप यांच्या मार्गदर्शनाखाली सहायक पोलिस निरीक्षक वैशाली भोसले, पोलिस कर्मचारी समीर पटेल, तारु, चोरमोले यांनी ही कारवाई केली.
सातार्‍यातही असाच प्रकार
गेल्या आठवड्यात सातारा जिल्ह्यातील वाईमध्येही अशीच एक घटना झाली होती. फेसबुकवरील एका 35 वर्षीय मैत्रिणीचे अश्‍लील छायाचित्र समाज माध्यमांवर प्रसारित केल्याप्रकरणी वाई पोलिसांनी एकाला अटक केली होती.
