शिर्डी / प्रतिनिधीः राष्ट्रीय समाज पक्षाचे अध्यक्ष महादेव जानकर यांनी राष्ट्रवादी काँगद्रेसचे अध्यक्ष शरद पवार यांची भेट घेतल्यापासून त्यां...
शिर्डी / प्रतिनिधीः राष्ट्रीय समाज पक्षाचे अध्यक्ष महादेव जानकर यांनी राष्ट्रवादी काँगद्रेसचे अध्यक्ष शरद पवार यांची भेट घेतल्यापासून त्यांचा पवार यांच्याविषयीचा सूर बदलला आहे. पवार यांच्यावर सातत्याने टीका करणार्‍या जानकर यांनी आता पवार यांचा उल्लेख किंग मेकर असा केला आहे.
राष्ट्रीय समाज पक्षाचे दोन दिवशीय देशव्यापी अधिवेशन शिर्डीत पार पडले. राष्ट्रीय समाज पक्षाची ताकद वाढत असून आता अनेक राज्यात खासदार, आमदार निवडून आणण्यासाठी व्यूहरचना केली जात असल्याचे जानकर यांनी म्हटले आहे. या अधिवेशनाला रासपचे देशभरातील अनेक पदाधिकारी उपस्थित होते. या अधिवेशनात बोलताना जानकर यांनी महाविकास आघाडीबाबत संमिश्र मत व्यक्त केले. राज्यातल्या आघाडी सरकारला आणखी थोडा वेळ देण्याची गरज आहे. कोविडच्या काळात अनेक घटक अडचणीत आले असून सरकारबद्दल नाराजीही असल्याचे जानकर म्हणाले.
’राज्य सरकार आणि प्रशासन चालवण्याची क्षमता आणि कुवत असायला हवी. अन्यथा त्या खुर्चीचा अपमान होतो. त्यामुळेच किंगमेकर असलेल्या शरद पवार यांचा सल्ला घेवून सध्या काम सुरू आहे,’ असे जानकर म्हणाले.
दरम्यान, भाजपने धनगर समाजातील प्रमुख चेहरा म्हणून जानकर यांना डावलून गोपीचंद पडळकर यांना ताकद देण्यास सुरुवात केली आहे. पडळकर यांना विधान परिषदेची आमदारकीही देण्यात आली. भाजपकडून डावलण्यात येत असल्याने जानकर हे नाराज असल्याची चर्चा आहे. त्यामुळे आगामी काळात ते नेमकी काय भूमिका घेतात, याकडे लक्ष लागले आहे.
