न्यूयार्कः भारतातील बँकांना कोट्यवधींचा गंडा घालून पलायन केलेल्या हिरा व्यापारी नीरव मोदीच्या भावावरही अमेरिकन कंपनीला कोट्यवधींचा गंडा घात...
न्यूयार्कः भारतातील बँकांना कोट्यवधींचा गंडा घालून पलायन केलेल्या हिरा व्यापारी नीरव मोदीच्या भावावरही अमेरिकन कंपनीला कोट्यवधींचा गंडा घातल्याचा आरोप करण्यात आला आहे. जगातील सर्वात मोठ्या हिर्‍यांच्या कंपन्यांपैकी एक समजल्या जाणार्‍या अमेरिकेतील एका कंपनीला नेहाल मोदीने गंडा घातला.
एका मल्टिलेअर्ड स्किमद्वारे त्याने अमेरिकेतील कंपनीची 2.6 दशलक्ष डॉलर्सची फसवणूक केल्याचा आरोप आहे. शुक्रवारी न्यूयॉर्कमधील वकील वेन्स ज्युनिअर यांनी नेहाल मोदीविरोधात करण्यात आलेल्या आरोपांची माहिती दिली. तसेच नेहाल मोदीला आता न्यायालयीन कारवाईचा सामना करावा लागणार असल्याचे त्यांनी सांगितले. न्यायालयात सादर करण्यात आलेल्या दस्तावेजांवरून मार्च 2015 ते ऑगस्ट 2015 या कालावधीत नेहालने चुकीच्या पद्धतीने 2.6 दशलक्ष डॉलर्सचे एलएलडी डायमंड्स युएसएकडून हिरे घेतल्याचे सांगण्यात आले आहे. मार्च 2015 मध्ये नेहालने पहिल्यांदा कंपनीला 8 लाख डॉलर्स किंमतीचे हिरे देण्यास सांगितले होते आणि ते हिरे कॉस्टको होलसेल कॉर्पोरेशन नाव्याच्या कंपनीला विक्रीसाठी दाखवणार असल्याचे सांगितले होते. आपले सदस्य म्हणून जोडले जाणार्‍या ग्राहकांनना कॉस्टको कमी दरात हिर्‍यांची विक्री करते.
एलएलडीकडून हिरे मिळाल्यानंतर नेहालने कंपनीला कॉस्टको ही कंपनी हिरे खरेदीसाठी तयार झाल्याचे म्हटले. त्यानंतर एलएलडीने त्याला हे हिरे उधारीवर दिले आणि 90 दिवसांच्या आत त्याचे पैसे देण्यास सांगितले; परंतु त्यानंतर नेहालने ते हिरे कोलॅट्रल लोन्सकडे तारण ठेवून त्यावर छोट्या कालावधीचे कर्ज घेतले, असे डिस्ट्रीक्ट अ‍ॅटर्नी कार्यालयाकडून सांगण्यात आले. एप्रिल ते मे 2015 दरम्यान, नेहालने कोस्टकोला विक्री करण्याचा दावा करत एलएलडीकडून तीन वेळा 10 लाख डॉलर्स पेक्षा अधिक किंमतीचे हिरे घेतले. या वेळी त्याने कंपनीला काही प्रमाणात रक्कम दिली; परंतु ती त्या हिर्‍यांच्या किंमतीपेक्षा कमी होती. जेव्हा आपली फसवणूक झाल्याचे कंपनीला समजले, तोवर नेहालने ते हिरे विकून मिळालेले पैसे खर्च केले होते. यानंतर एलएलडीने मॅनहॅटन प्रॉसिक्युटर ऑफिसमध्ये त्याच्याविरोधात तक्रार दाखल केली.
