अहमदनगर: यशस्विनी महिला ब्रिगेडच्या अध्यक्ष व राष्ट्रवादी काँग्रेसच्या कार्यकर्त्या रेखा जरे यांच्या हत्या प्रकरणातील मुख्य आरोपी, सकाळचा ...
अहमदनगर: यशस्विनी महिला ब्रिगेडच्या अध्यक्ष व राष्ट्रवादी काँग्रेसच्या कार्यकर्त्या रेखा जरे यांच्या हत्या प्रकरणातील मुख्य आरोपी, सकाळचा माजी कार्यकारी संपादक बाळ ज. बोठे याने केलेल्या अटकपूर्वजामीन अर्जावर आज न्यायालयात सरकारी पक्ष आपले म्हणणे मांडणार होते; मात्र आता या अर्जावर येत्या सोमवारी (14 डिसेंबर) सुनावणी होणार आहे.
सरकारी वकील अ‍ॅड. सतीश पाटील यांनी ही माहिती दिली. जामीनअर्जावर सुनावणीच्या वेळी बोठे याने स्वतः न्यायालयात हजर राहावे, असा अर्ज पोलिसांकडून देण्यात आला असून, तो सरकारी वकिलांमार्फत न्यायालयात दिला जाणार आहे. त्यातच रेखा जरे यांचा मुलगा रुणाल जरे याने आरोपी बोठे याच्याकडून कुटुंबाला धोका असल्याचे निवेदन पोलिस प्रशासनाला दिले आहे. आता हा मुद्दा सरकारी पक्षाच्या वतीने न्यायालयात मांडला जातो का, याकडेही लक्ष लागले आहे.
नगर-पुणे महामार्गावरील जातेगाव घाट शिवार येथे 30 नोव्हेंबर रात्री आठच्या सुमारास जरे यांची गळा चिरून हत्या झाली होती. या प्रकरणात पाच आरोपी अटकेत असून मुख्य सूत्रधार, सकाळचा माजी कार्यकारी संपादक बाळ ज. बोठे पसार आहे. बोठे हाच मुख्य सूत्रधार असल्याचे तीन डिसेंबरला समोर आले होते. तेव्हापासून तो पसार झाला आहे. बोठे याचा पोलिस शोध घेत असतानाच त्याने सात डिसेंबरला न्यायालयात अटकपूर्व जामीनअर्ज दाखल केला होता. आठ डिसेंबरला या अर्जावर सुनावणी झाली. बोठे याच्या वतीने अ‍ॅड. महेश तवले यांनी बाजू मांडली. त्यानंतर न्यायालयाने सरकारी पक्षाचे म्हणणे मागत पुढील सुनावणी 11 डिसेंबरला ठेवली होती; मात्र आता या अर्जावर येत्या सोमवारी नगरच्या जिल्हा व सत्र न्यायालयात सुनावणी होणार आहे.
सरकारी पक्षाच्या वतीने तपास अधिकारी पोलिस उपअधीक्षक अजित पाटील हे स्वतः न्यायालयासमोर पोलिसांचे म्हणणे मांडणार आहेत. त्यानंतर दोन्ही बाजूचे म्हणणे ऐकल्यानंतर न्यायालय आपला निर्णय देऊ शकते; परंतु जरे यांच्या मुलाने आरोपी बोठे याच्यापासून जरे कुटुबीयांना धोका असल्याचे निवेदन पोलिस प्रशासनाला दिले होते. त्यानंतर जरे कुटुंबीयांना पोलिस संरक्षणदेखील देण्यात आले आहे. आता हा मुद्दा पोलिस प्रशासन न्यायालयात मांडणार का, याकडेही लक्ष लागले आहे.
ःःःःःःःःः
