मुंबई / प्रतिनिधीः अनाथ मुलांच्या सामाजिक संस्थेच्या नावाखाली दिल्लीतील अभिनव अग्रवाल या व्यक्तीला काही वर्षांपूर्वी नऊ दिवसांचे मूल दत्तक द...
मुंबई / प्रतिनिधीः अनाथ मुलांच्या सामाजिक संस्थेच्या नावाखाली दिल्लीतील अभिनव अग्रवाल या व्यक्तीला काही वर्षांपूर्वी नऊ दिवसांचे मूल दत्तक देण्यात आले होते; मात्र तब्बल अडीच वर्षानंतर हे दत्तक घेतलेले मूल तस्करीच्या माध्यमातून बेकायदापणे अभिनव अग्रवाल याला विकण्यात आल्याचे समोर आले होते. त्यानंतर या प्रकरणी मुंबई पोलिसांकडून या व्यक्तीवर गुन्हा दाखल करण्यात होता; मात्र अग्रवाल यांनी न्यायालयीन लढा देऊन पुन्हा एकदा मुलाचा ताबा मिळवला आहे.
काही वर्षांपूर्वी अग्रवाल हे त्यांच्या बहिणीसोबत एका रुग्णालयांमध्ये गेले असता, त्याठिकाणी एक व्यक्ती त्यांना भेटली. एका सामाजिक संस्थेच्या माध्यमातून त्याने त्यांची भेट घेतली होती. त्या वेळी त्या व्यक्तीने त्याच्याकडे दत्तक देण्यासाठी काही मुले असल्याचेही सांगितले होते. सुरुवातीला दत्तक मूल घेण्यामध्ये रुची न दाखवणार्या अग्रवाल यांनी नंतर नऊ दिवसांचे एक मूल दत्तक घेतले होते. यासाठी काही लाख रुपये या सामाजिक संस्थेला अग्रवाल यांनी दिले होते.
मूल दत्तक घेतल्यानंतर त्याच्या पालन-पोषणाकडे अग्रवाल हे मन लावून लक्ष देत होते; मात्र अचानक ऑक्टोबर 2019 मध्ये मुंबई पोलिसांकडून त्यांना नोटीस आली, या नोटिशीतून त्यांना मुंबईत त्यांनी घेतलेल्या दत्तक मुलांसह हजर राहण्याचे आदेश देण्यात आले होते.
अग्रवाल यांना मिळालेल्या नोटीसनुसार ते मुंबई पोलिसांसमोर हजर झाले. त्या वेळी त्यांनी दत्तक घेतलेले मूल हे तस्करीचे असल्याचे समजले. तसेच या प्रकरणी त्यांच्यावर गुन्हाही नोंदवण्यात आला होता. यानंतर अग्रवाल यांनी दिवाणी न्यायालयमध्ये या संदर्भात दाद मागितली आपली फसवणूक झाली जरी असली, तरी या मुलांचे पालनपोषण आपण मन लावून करत होतो, म्हणून त्याची कस्टडी आपल्याला मिळावी, अशी याचिका त्यांनी दाखल केली. दिवाणी न्यायालयाकडून कुठलाही दिलासा न मिळाल्यामुळे त्यांनी मुंबई उच्च न्यायालयामध्ये यासंदर्भात याचिका दाखल केली. मुंबई उच्च न्यायालयाचे न्यायमूर्ती साधना जाधव व न्यायमूर्ती एन. जे. जमादार यांच्या खंडपीठासमोर ही सुनावणी आली असता, अग्रवाल यांची याचिका ग्राह्य धरत त्यांनी दत्तक घेतलेल्या मुलाचा ताबा पुन्हा त्यांच्याकडे देण्यात यावा, असे आदेश न्यायालयाने दिले.
सामाजिक संस्थेच्या नावाखाली तस्करी
मुंबई शहरामध्ये दत्तक मूल देण्याच्या नावाखाली बनावट सेवाभावी संस्था काम करत असून तस्करीच्या माध्यमातून दत्तक मूल देण्यात येते. या माध्यमातून लाखो रुपये कमावले जात असल्याचेही समोर आले आहे.
