मुंबई – अमेझॉन या शॉपिंग वेबसाईटने मराठी भाषेत सेवा देण्यास नकार दिल्याने आता महाराष्ट्र नवनिर्माण सेना आणि ऍमेझॉन यांच्यातील वाद वाढला आहे....
मुंबई – अमेझॉन या शॉपिंग वेबसाईटने मराठी भाषेत सेवा देण्यास नकार दिल्याने आता महाराष्ट्र नवनिर्माण सेना आणि ऍमेझॉन यांच्यातील वाद वाढला आहे. मनसेने राबवलेल्या मराठी भाषेच्या मोहिमेविरोधात अ‍ॅमेझॉनने कोर्टात धाव घेतली आहे. यानंतर दिंडोशी कोर्टाकडून मनसे अध्यक्ष राज ठाकरे यांना नोटीस बजावण्यात आली आहे. कोर्टाने राज ठाकरे आणि काही मनसे सचिवांना ५ जानेवारीला कोर्टात हजर राहण्याचा आदेश दिला आहे. दरम्यान मनसेने आपण मराठीच्या भूमिकेवर ठाम राहणार असल्याचं स्पष्ट केलं आहे. तसंच अ‍ॅमेझॉनला मोठी किंमत मोजावी लागेल असा इशारा दिला आहे.
राज ठाकरेंना नोटीस पाठवल्यानंतर मनसे नेते अखिल चित्रे यांनी एबीपी माझावर प्रतिक्रिया दिली. यावेळी ते म्हणाले की, “मनसे आपल्या भूमिकेवर ठाम आहे. अ‍ॅमेझॉनला महाराष्ट्रात व्यवसाय करु देत आहे हे विसरता कामा नये. अ‍ॅमेझॉनला सह्याद्रीचं पाणी पाजणार हे नक्की आहे”.
पुढे ते म्हणाले की, “खटले दाखल करण्याचा प्रयोग त्यांनी सुरु केला आहे. १९ तारखेला माझ्याविरोधात केस टाकली होती. आता राज ठाकरेंना नोटीस पाठवण्याचं दुसाहस त्यांनी केलं आहे. याची किंमत त्यांना मोजावी लागणार आहे. अशा फालतू नोटीसला आम्ही फार किंमत देत नाही. मराठीसाठी कोणत्याही केसेस अंगावर घेण्याची तयार आहोत हे अ‍ॅमेझॉनने लक्षात ठेवावं”.
