कोरेगाव / प्रतिनिधी : शहरातील दोन वेगवेगळ्या ठिकाणी व्हिडिओ गेम पार्लरमध्ये सुरू असलेल्या ऑनलाईन जुगारावर, तसेच शहरातील एका ठिकाणी बेकायदेशी...
कोरेगाव / प्रतिनिधी : शहरातील दोन वेगवेगळ्या ठिकाणी व्हिडिओ गेम पार्लरमध्ये सुरू असलेल्या ऑनलाईन जुगारावर, तसेच शहरातील एका ठिकाणी बेकायदेशीरपणे दारूची वाहतूक करणार्‍या वाहनावर परिविक्षाधीन पोलीस अधीक्षक रितू खोखर यांच्या नेतृत्वाखालील पोलीस पथकाने छापा घालून या तिन्ही प्रकरणांमध्ये मिळून सुमारे 10 लाखांचा मुद्देमाल जप्त केला असून याप्रकरणी 12 जणांविरुध्द गुन्हा दाखल झाला आहे.
पोलिसांनी दिलेले माहिती अशी की, कोरेगाव शहरातील जुना मोटार स्टँड आणि आझाद चौकातील व्यापारी संकुलातील दुकान गाळ्यांमधील व्हिडिओ गेम पार्लरमध्ये ऑनलाईन जुगार खेळला जात असल्याची माहिती परिविक्षाधीन पोलीस अधीक्षक रितू खोखर यांना मिळाली होती. याबाबतची पडताळणी केल्यानंतर पोलीस उपअधीक्षक गणेश किंद्रे यांनी दोन्ही व्हिडिओ गेम पार्लरच्या झडतीसाठी सर्च वॉरंट घेतले. त्यानंतर अधीक्षक रितू खोखर यांच्या नेतृत्वाखाली उपनिरीक्षक दत्तात्रय नाळे, हवालदार सुधीर खुडे, मिलिंद कुंभार, अमोल सपकाळ, समाधान गाढवे, किशोर भोसले, प्रमोद जाधव, नीलेश जांभळे, शुभम चव्हाण, इंद्रजित भोसले, संदीप मगरे, शीतल रासकर, पूनम रजपूत यांच्या पथकाने जुना मोटार स्टँड परिसरातील व्हिडिओ गेम पार्लरवर अचानक छापा टाकला. तेथे परवाना नसल्याचे व ऑनलाईन जुगार सुरू असल्याचे निदर्शनास आल्यानंतर दोन लाख 84 हजार 60 रुपयांचा मुद्देमाल जप्त करण्यात आला. यासंदर्भात पोलीस कर्मचारी प्रमोद चव्हाण यांनी दिलेल्या फिर्यादीवरून प्रवीणकुमार बर्गे, सुमित कदम, दीपक मोरे, आदित्य ओसवाल, सचिन जाधव यांच्याविरोधात गुन्हा दाखल झाला आहे.
आझाद चौक येथील व्यापारी संकुलातील गाळ्यामध्ये सुरू असलेल्या व्हिडिओ गेम पार्लरवर याच पथकाने कारवाई केली. त्या ठिकाणीही परवाना नसल्याचे व ऑनलाईन जुगार सुरू असल्याचे निदर्शनास आल्यानंतर 4 लाख 19 हजार 730 रुपयांचा मुद्देमाल जप्त केला. यासंदर्भात हवालदार महादेव खुडे यांनी दिलेल्या फिर्यादीवरून राहुल बर्गे, रवींद्र नामदास, संजय सावंत, चंद्रकांत जाधव, राजेंद्र जाधव, संजय खरात यांच्यावर गुन्हा दाखल केला आहे. दरम्यान, शहरातील महादेवनगर परिसरात आसरे रस्त्यावर बेकायदेशीरपणे दारूची वाहतूक करणार्‍या एका जीपवर अधीक्षक रितू खोखर यांच्या नेतृत्वाखाली हवालदार प्रमोद चव्हाण, प्रमोद जाधव, संतोष जाधव यांनी छापा घालून जीप व त्यामधील देशी, विदेशी दारूचे बॉक्स, असा दोन लाख 62 हजार 80 रुपयांचा मुद्देमाल जप्त केला. यासंदर्भात पोलीस कर्मचारी प्रमोद जाधव यांनी दिलेल्या फिर्यादीवरून अभिजित बर्गे व अरुण जाधव यांच्यावर गुन्हा दाखल करण्यात आला आहे.
