मुंबई : देशभरात कोरोना प्रतिबंधक लसीकरणाच्या मोहिमेला पुढील आठवडयात सुरूवात होत आहे. यादृष्टीने मुंबई महानगरपालिकेने विशेष योजना आखली असून,...
मुंबई : देशभरात कोरोना प्रतिबंधक लसीकरणाच्या मोहिमेला पुढील आठवडयात सुरूवात होत आहे. यादृष्टीने मुंबई महानगरपालिकेने विशेष योजना आखली असून, दररोज 12 हजार जणांना ही लस देण्यात येणार आहे. यानंतर हेच लक्ष्य दररोज 50 हजार जणांना लस देण्याचे असल्याची माहिती अतिरिक्त आयुक्त सुरेश काकाणी यांनी दिली आहे.
लसीकरण मोहिमेच्या पूर्वतयारीला पालिकेकडून अडीच-तीन महिन्यांपासूनच तयारी करण्यात आली होती. त्यामुळेच आता लस उपलब्ध होणार म्हणताच पालिका लसीकरण मोहीम राबवण्यासाठी पूर्णतः सज्ज झाली आहे. मुंबईत 8 मुख्य लसीकरण केंद्र तयार करण्यात आले असून डॉक्टर, अधिकारी-कर्मचार्‍यांचे प्रशिक्षण पूर्ण झाले आहे. तर आता मुंबईतील सर्व कोविड सेंटरमध्ये लसीकरण केंद्र तयार करण्यात येत आहेत. लसीकरण केंद्र कमी पडू नयेत यासाठी हा निर्णय घेण्यात आला आहे. दरम्यान, बीकेसी केविड सेंटरमध्ये तर अवघ्या दीड दिवसात केंद्र उभारण्यातही आले आहे. याच तयारीच्या जोरावर लस उपलब्ध झाल्याबरोबर 24 तासात लस देण्यास सुरुवात करू, असा दावा पालिकेकडून केला जात आहे.
पालिकेच्या 8 मुख्य केंद्रासह कोविड सेंटरमधील केंद्रावर मुंबईकरांचे लसीकरण करण्यात येणार आहे. मुंबईची लोकसंख्या प्रचंड असून प्रत्येक नागरिकांपर्यंत लस पोहोचवण्याचे पालिकेचे उद्दिष्ट आहे. हेच उद्दिष्ट पूर्ण करण्यासाठी पालिकेकडून लसीकरणाचे बारीक नियोजन करण्यात येत आहे. त्यानुसार पहिल्या टप्प्यात 12 हजार प्रतिदिन लस याप्रमाणेच आम्ही सुरुवात करणार आहोत, असे काकाणी यांनी सांगितले आहे. तर त्यानंतर हळूहळू लसीकरणाची संख्या वाढवत मग दुसर्‍या वा तिसर्‍या टप्प्यात प्रतिदिन 50 हजार जणांचे लसीकरण केले जाईल, असेही त्यांनी स्पष्ट केले आहे. दरम्यान आता पालिकेची सर्व तयारी पूर्ण झाली असून आता केवळ लस उपलब्ध होणे बाकी आहे.
