पुणे/प्रतिनिधी: पुणे महापालिकेतील भाजपचे 19 नगरसेवक बंडाच्या तयारीत असल्याची माहिती आहे. महापालिकेत पदे न मिळाल्याने हे नगरसेवक नाराज असल्य...
पुणे/प्रतिनिधी: पुणे महापालिकेतील भाजपचे 19 नगरसेवक बंडाच्या तयारीत असल्याची माहिती आहे. महापालिकेत पदे न मिळाल्याने हे नगरसेवक नाराज असल्याची चर्चा आहे. त्यामुळे हे 19 नाराज नगरसेवक महाविकास आघाडीमध्ये सामील होणार असल्याची चर्चा रंगू लागली आहे.
दरम्यान, भारतीय जनता पक्षाने मात्र कोणतेही बंड होणार नसल्याचे स्पष्ट केले. मतदारसंघासाठी निधी उपलब्ध होत नसल्याची तक्रार भाजप नगरसेवकांनी शहराध्यक्षांना केली होती; पण याबाबत टाळाटशळ करत निवड लोकांनाच विचारपूस होत असल्याने भाजपचे नगरसेवक नाराज असल्याचे समजते. महापौर मुरलीधर मोहोळ यांनी मात्र या चर्चांमध्ये एक टक्काही सत्यता नाही. हा निव्वळ खोडसाळपणा आहे. नगरसेवकांच्या नाराजीचा आणि बंडखोरीचा कोणताही विषय भाजपमध्ये नाही. एकहाती सत्ता महापालिकेत आहे. निवडणूक जवळ आल्यामुळे जाणीवपूर्वक हा गैरसमज पसरवण्याचा प्रयत्न करत आहेत, अशी टीका केली. सर्व समित्यांमध्ये सर्व नगरसेवकांना संधी दिली आहे. उर्वरित नगरसेवकांना या वर्षी संधी दिली आहे. निधी कमी पडला असे चित्र कुठेच नाही. नगरसेवक अजित पवार यांच्या संपर्कात असल्याचं वृत्त साफ चुकीचे आहे, असे स्पष्टीकरणही त्यांनी दिले. विरोधी पक्षच नाराजीच्या बातम्या पसरवत असेल. माझ्या माहितीनुसार भाजपमध्ये कोणतीही नाराजी नाही, अशी प्रतिक्रिया माजी खासदार संजय काकडे यांनी दिली. प्रत्येक पक्षात नाराजी असते. काही नगरसेवक नाराज असू शकतात. माझ्या माहितीनुसार कोणतेही नगरसेवक भाजप सोडून इतर पक्षात जाण्यास तयार नाही किंवा चर्चा नाही हेदेखील तेवढेच खरे आहे. राष्ट्रवादीचे काही नाराज नगरसेवक आमच्या संपर्कात आहेत, असे ते म्हणाले. या विषयी भाजपचे पुणे शहराध्यक्ष जगदीश मुळीक म्हणाले, की भाजपमध्ये अशी कोणतीही परिस्थिती नाही. मागील शुक्रवारी प्रत्येक प्रभागातील नगरसेवकांच्या बैठका घेतल्या. प्रत्येक नगरसेवकाशी वैयक्तिकरित्या बोललो. नगरसेवकांमध्ये नाराजी नाही. विरोधकांकडून नाराजी पसरवली जात आहे. सगळे नगरसेवक संपर्कात आहेत. राजकारणाचा भाग म्हणून अफवा पसरवल्या जात आहेत. अशा अफवा पसरवून राष्ट्रवादीला काही साधता येणार नाही. सगळे नगरसेवक खूश आहेत, असा दावा त्यांनी केला. राष्ट्रवादी काँग्रेसने मात्र भाजपचे नगरसेवक बंड करून राष्ट्रवादी काँग्रेसमध्ये येणार असल्याचा कोणताही दावा केलेला नाही, हे विशेष! आरोप आणि खुलासेही भाजपच करीत आहे.
