नवी दिल्ली : केंद्रीय माध्यमिक बोर्डाच्या (सीबीएसई) दहावी आणि बारावीच्या परीक्षेच्या तारखा गुरूवारी जाहीर करण्यात आल्या. त्यानुसार सीबीएसईच...
नवी दिल्ली : केंद्रीय माध्यमिक बोर्डाच्या (सीबीएसई) दहावी आणि बारावीच्या परीक्षेच्या तारखा गुरूवारी जाहीर करण्यात आल्या. त्यानुसार सीबीएसईच्या परीक्षा 4 मे पासून सुरू होणार आहेत. तर निकाल 15 जुलै रोजी जाहीर होणार असल्याचे माहिती केंद्रीय शिक्षणमंत्री रमेश पोखरियाल यांनी दिली. कोरोना साथरोगाच्या पाश्वभूमीवर यावर्षी परीक्षा पुढे ढकलण्यात आल्या आहेत.
सीबीएसईच्या परीक्षा दरवर्षी साधारणपणे फेब्रुवारी महिन्यात होतात. परंतु, यंदा कोरोना साथरोगाचा प्रकोप पाहता या परीक्षा पुढे ढकलण्यात आल्या आहेत. आगामी 4 मे रोजी सुरू होणा-या सीबीएसईच्या परीक्षा 10 जून पर्यंत चालणार आहेत. दरवर्षीप्रमाणे यावर्षी सीबीएसईच्या परीक्षा जानेवारी फेब्रुवारी महिन्यात घेता येणार नाही, अशी घोषणा पोखरियाल यांनी 22 डिसेंबरला केली होती. जानेवारी महिन्यापासून परीक्षासंबंधी प्रात्यक्षिके सुरू होत असतात. मात्र, कोरोनामुळे सर्व परीक्षेच्या नियोजनात बदल करण्यात आला आहे. मार्च महिन्यात देशात कोरोनाचा प्रसार झाल्यानंतर सर्व परीक्षा खोळंबल्या होत्या. वार्षीक परीक्षाही ऑनलाईन पद्धतीने घेण्यात आल्या. तसेच 2020-21 हे निम्मे शैक्षणिक वर्षही कोरोना साथरोगाच्या विळख्यातच गेले.
