वाई / प्रतिनिधी : मांढरदेव (ता. वाई) येथील श्री काळेश्‍वरी देवीच्या वार्षिक यात्रेनिमित्त भाविकांच्या होणार्‍या गर्दीमुळे कोरोनाचा प्रादुर्भ...
वाई / प्रतिनिधी : मांढरदेव (ता. वाई) येथील श्री काळेश्‍वरी देवीच्या वार्षिक यात्रेनिमित्त भाविकांच्या होणार्‍या गर्दीमुळे कोरोनाचा प्रादुर्भाव वाढू नये, यासाठी यात्रा रद्द करण्यात आली आहे. 27 जानेवारी ते 29 जानेवारी रोजी पौष पौर्णिमेला देवीची मुख्य यात्रा आहे. दरम्यान, 13 जानेवारी ते 13 फेब्रुवारीपर्यंत दर्शनासाठी मंदिर बंद राहणार आहे. जिल्हाधिकारी शेखर सिंह यांच्या आदेशानुसार यात्रेतील धार्मिक विधी, पूजाअर्चा रूढी परंपरेनुसार स्थानिक पातळीवरील देवस्थानचे ट्रस्टी, मंदिर पुजारी व ग्रामस्थ अशा मोजक्याच भाविकांनी करण्याच्या सूचना प्रांताधिकारी संगीता राजापूरकर-चौगुले यांनी दिल्या आहेत.
मांढरदेव येथील काळूबाई ही महाराष्ट्रासह इतर राज्यांतील लाखो भाविकांचे श्रध्दास्थान आहे. जानेवारी महिन्यात पौष पौर्णिमेला देवीची वार्षिक यात्रा भरते. 27, 28 व 29 जानेवारी रोजी देवीची मुख्य यात्रा आहे. मात्र, महिनाभर देवीचा यात्रोत्सव चालतो. कोरोनामुळे यात्रा, जत्रांसह गर्दी होणारे सार्वजनिक उत्सवातील सर्व कार्यक्रम रद्द करण्यात आले आहेत. सातारा जिल्ह्यात सध्या कोरोनाचा प्रादुर्भाव कमी झाला असला, तरी तो पूर्णपणे थांबलेला नाही. मांढरगडावर यात्रा कालावधीत मोठ्या संख्येने भाविक येणार ही बाब लक्षात घेऊन प्रशासनाने बैठक घेऊन यात्रा रद्द करण्याचा निर्णय घेतला आहे. यात्रेसंदर्भात घेतलेल्या बैठकीस तहसीलदार रणजित भोसले, पोलिस उपअधीक्षक डॉ. शीतल जानवे-खराडे, गटविकास अधिकारी उदय कुसुरकर, पोलीस निरीक्षक आनंदराव खोबरे, देवस्थानचे सचिव रामदास खामकर यांची प्रमुख उपस्थिती होती.
कोरोनाच्या पार्श्‍वभूमीवर या वर्षी राज्यातील बहुतांश यात्रा रद्द करण्यात आल्या आहेत. याच अनुषंगाने मांढरदेव येथील यात्रा रद्द करण्याबाबत पूर्व नियोजन बैठक घेऊन मंदिर पुजारी, स्टॉलधारक व मांढरदेव ग्रामस्थ, देवस्थानचे विश्‍वस्त यांच्या उपस्थितीत हा निर्णय जाहीर करण्यात आला. 13 जानेवारी ते 13 फेब्रुवारी हा संपूर्ण पौष महिना दर्शनासाठी मंदिर पूर्णपणे बंद ठेवण्याचा निर्णयही बैठकीत जाहीर करण्यात आला. दरवर्षी यात्रेसाठी बाहेरगावाहून येणारे व्यावसायिक मांढरदेव गावात येणार नाहीत. मांढरदेवसह परिसरातील यात्रेनिमित्ताने पै-पाहुण्यांना बोलावू नये, याही दृष्टीने दुकानदार व परिसरातील सर्व गावांतील ग्रामस्थांनी व मांढरदेव ग्रामस्थांनी काळजी घ्यावी, अशा सूचना प्रांताधिकारी यांनी दिल्या आहेत.
