गांजा थ्रो प्रकरणानंतर प्रशासन अर्लट; कर्मचारी रडारवर कोल्हापूर / प्रतिनिधी : कळंबा मध्यवर्ती कारागृहातील दवाखाना विभागात आणखी एक मोबाईल साप...
गांजा थ्रो प्रकरणानंतर प्रशासन अर्लट; कर्मचारी रडारवर
कोल्हापूर / प्रतिनिधी : कळंबा मध्यवर्ती कारागृहातील दवाखाना विभागात आणखी एक मोबाईल सापडला. त्या मोबाईलची परस्पर विल्हेवाट लावल्याप्रकरणी कारागृहातील सचिन नवनाथ रणदिवे या शिपायाविरुध्द जुना राजवाडा पोलीस ठाण्यात गुन्हा दाखल करण्यात आला आहे. प्रशासनाला माहिती न देता तो मोबाईल दगडाने फोडून मुख्य तटाच्या बाहेर फेकून दिल्याचा ठपका त्याच्यावर ठेवण्यात आला आहे.
याबाबत पोलिस व प्रशासनाने दिलेली माहिती अशी, कळंबा कारागृहात काही दिवसांपासून गांजा थ्रो प्रकरणासह मोबाईल प्रकरण गाजत आहे. मोटारीतून 22 डिसेंबर रोजी आलेल्या संशयितांनी फडक्यात बांधलेले तीन पुडके कारागृहात फेकले. त्यात 10 मोबाईल, पाऊण किलो गांजा, चार्जर कॉड, दोन पेन ड्राईव्ह सापडले होते. त्यामुळे कळंबा कारागृह प्रशासन खडबडून जागे झाले होते. प्रशासनानेही याची गंभीर दखल घेत तत्कालीन अधीक्षक शरद शेळके यांची तडकाफडकी बदली केली होती. त्यांच्या जागी चंद्रमणी इंदूरकर यांची नियुक्ती करण्यात आली. पदाची सूत्रे हाती घेतल्यानंतर त्यांनी सातत्याने कारागृहाची झडती घेण्याचे काम सुरू ठेवले. यामध्ये 25 व 31 डिसेंबर रोजी घेतलेल्या झडतीमध्ये एकूण दोन मोबाईल, सात बॅटर्‍या सापडल्या. यानंतर पाच जानेवारीला दोन मोबाईल, सिमकार्ड व दोन बॅटर्‍या मिळून आल्या. दरम्यान, स्थानिक गुन्हे अन्वेषण शाखेने 10 मोबाईलचा छडा लावून चौघांविरुध्द गुन्हा दाखल केला होता.
सुरक्षिततेच्या दृष्टीने कारागृह अधीक्षक इंदूरकर यांच्या सूचनेनुसार विशेष पथकाकडून कारागृहाची शुक्रवारी झडती घेण्यात आली. इंदूरकर यांना कारागृहातील दवाखाना विभागात मोबाईल असल्याची माहिती मिळाली होती. त्यामुळे या विभागाची सखोल झडती घेण्याची सूचना त्यांनी दिल्या होत्या. झडतीदरम्यान कारागृह शिपाई संशयित सचिन रणदिवे याला विभागात मोबाईल सापडला. याची माहिती त्याने प्रशासनाला दिली नाही. उलट हा मोबाईल दगडाने फोडला. त्यानंतर टॉवर क्रमांक एक येथील मुख्य तटाच्या बाहेर फेकून दिला. यातील मुख्य अपराध्याला वाचवून गुन्ह्यातील पुरावा नाहीसा करून कारागृहाच्या सुरक्षिततेला धोका निर्माण करण्याचा प्रयत्न केला, अशी फिर्याद तरुंगाधिकारी साहेबराव आडे यांनी दिली. त्यानुसार जुना राजवाडा पोलीस ठाण्यात रणदिवे याच्याविरुध्द गुन्हा दाखल करण्यात आला आहे. या घटनेचा अधिक तपास पोलीस निरीक्षक प्रमोद जाधव यांच्या मार्गदर्शनाखाली आरती नांद्रेकर करत आहेत.
