पुणे/प्रतिनिधीः हायप्रोफाईल महिलेचा मसाज करून द्याल का, त्यांचे समाधान कराल का... असे विचारून फोनवरून तरुणांच्या भावना चाळविण्याचा प्रकार के...
पुणे/प्रतिनिधीः हायप्रोफाईल महिलेचा मसाज करून द्याल का, त्यांचे समाधान कराल का... असे विचारून फोनवरून तरुणांच्या भावना चाळविण्याचा प्रकार केला जात आहे. त्यातून हायप्रोफाईल फ्रेंडशिप क्लबची मेंबरशिप घेण्यास सांगून आर्थिक फसवणुकीचे प्रकार घडत आहेत. यात आंतरराज्यीय रॅकेट सक्रिय असून, तरुणांसह वयस्क पुरुषांनाही गंडा घालण्यात येत आहे.
सुरुवातीला हिंदीतून मधूर संवाद साधला जातो. समोरची व्यक्ती मराठीतून बोलत असल्यास काही वाक्य किंवा शब्द मराठीतून बोलून त्यांचे नाव, कामाचे ठिकाण, कामाचे स्वरुप आदी माहिती विचारण्यात येते. त्यामुळे संबंधित व्यक्तीच्या आर्थिक परिस्थितीचा अंदाज येतो. त्यानंतर त्यांना पैशांची गरज आहे का, असे विचारून हायप्रोफाईल महिलेचा मसाज कराल का, त्यांचे समाधान कराल का, त्याचे तुम्हाला चांगले पैसे मिळतील, असे सांगितले जाते. संबंधित व्यक्तीने सकारात्मक प्रतिसाद दिल्यास मिटिंग करण्याबाबत किंवा अपॉईंटमेंट कधीची चालेल असे विचारले जाते. तसेच कोणत्या भागातील हायप्रोफाईल महिला क्लाएंट उपलब्ध होऊ शकेल, याची माहिती दिली जाते. त्यामुळे संबंधित व्यक्तीचा फोन करणार्‍या तरुणीवर विश्‍वास बसतो. हायप्रोफाईल महिलेसोबत अपॉईंटमेंट करून तिच्याकडूनच चांगले पैसे मिळणार, या विचाराने त्या व्यक्तीच्या भावना चाळवतात. याचाच गैरफायदा घेऊन फोनवरून संबंधित तरुणी त्यांच्या फ्रेंडशिप क्लबची मेंबरशिप घेण्यास सांगते. त्यासाठी काही पैसे ऑनलाईन ट्रान्सफर करायला किंवा बँकेच्या खात्यावर भरायला सांगते. पैसे दिल्यानंतर कॉल सेंटरमधील तरुणीचा फोन बंद होतो. फसवणूक झाल्याचे संबंधित व्यक्तीच्या निदर्शनास येते; मात्र पैसे आणि वेळही निघून गेलेली असते.
फसवणुकीच्या अशा प्रकरणांमध्ये आंतरराज्य रॅकेट सक्रिय असून त्यांच्यापर्यंत पोहचण्यात पोलिसांना मोठ्या अडचणी येतात. संबंधित रॅकेटचे कामकाज सुरू असलेले नेमके ठिकाण शोधून काढणे शक्य होत नाही. तसेच बनावट नावे, बँक खाते, सिमकार्ड हे सातत्याने बदलत असल्याने ते ‘ट्रेस’ करता येत नाहीत. संबंधित बँक, टेलिकॉम कंपनी, इंटरनेट आदी यंत्रणांकडून त्याबाबत माहिती दिली जात नाही. परिणामी अशा रॅकेटचा पर्दाफाश होत नाही. अशा प्रकरणात फसवणूक झालेल्या व्यक्ती तक्रार करण्यात पुढे येत नाहीत. समाजातील प्रतिष्ठा, पत्नी, कुटुंबीयांचा दबाव अशा एक ना अनेक कारणांमुळे संबंधित व्यक्ती पोलिसांकडे तक्रार करीत नाही. परिणामी गुन्हे घडूनही त्याबाबत ‘ना हाक ना बोंब’, अशी परिस्थिती असते.
