महाबळेश्वर तालुक्यातील डांगरेघर ग्रामपंचायत बिनविरोध केळघर / वार्ताहर : जावली तालुक्यातील ट्रकमालकांचे गाव म्हणून जिल्हाभरात ओळख असलेल्या डा...
महाबळेश्वर तालुक्यातील डांगरेघर ग्रामपंचायत बिनविरोध
केळघर / वार्ताहर : जावली तालुक्यातील ट्रकमालकांचे गाव म्हणून जिल्हाभरात ओळख असलेल्या डांगरेघर ग्रामपंचायतीची निवडणूक बिनविरोध झाली. विशेष म्हणजे या निवडणुकीत अमोल आंग्रे व कोमल आंग्रे हे पती-पत्नी बिनविरोध निवडून आले. पती-पत्नीला बिनविरोध निवडून देऊन गावकर्‍यांनी एक वेगळा आदर्श निर्माण केला आहे.
ग्रामपंचायतीची निवडणूक म्हटले की, ही निवडणूक भावकीवर लढवली जाते. निवडणूक लागली की गावातील ग्रामस्थांचे मन कलुषित होते व गावातील एकीचे व शांततेचे वातावरण नाहिसे होते. मात्र, डांगरेघर ग्रामस्थांनी एकत्र येऊन विचारविनिमय करून गावाची निवडणूक बिनविरोध करण्यासाठी प्रयत्न केले. ग्रामस्थांच्या व वडीलधार्‍या मंडळींचा मान राखून निवडणूक बिनविरोध करण्यात आली. सदस्य म्हणून कोमल आंग्रे, रूपाली सुर्वे, शांताराम सुर्वे, अमोल आंग्रे, सुमन सुर्वे यांची बिनविरोध निवड करण्यात आली. यातील अमोल आंग्रे व कोमल आंग्रे हे पती-पत्नी आहेत. डांगरेघर गावाने एकीच्या जोरावर आतापर्यंत विविध शासकीय योजनांमध्ये सहभागी होऊन हे यश मिळवले आहे.
निवडणूक बिनविरोध करून गावात वेगळा पायंडा पाडला. याचा फायदा गावच्या विकासासाठी होणार आहे. नवनिर्वाचित पती-पत्नी असलेल्या ग्रामपंचायत सदस्यांकडून गावची विकासकामे मार्गी लागून गावाचा सर्वांगीण विकास व्हावा, अशी अपेक्षा ग्रामस्थांनी व्यक्त केली आहे. केळघर विभागातील केडंबे, बोंडारवाडी, भुतेघर, आंबेघर तर्फ मेढा, डांगरेघर, मुकवली, रेंगडीवाडी, वरोशी, गवडी या ग्रामपंचायतींच्या निवडणूका बिनविरोध झाल्या आहेत.
