राजकिय हाडवैर विसरून सर्व गाव एकत्र पारनेर/प्रतिनिधी : ’हंगा तिथे दंगा’अशी हेटाळणी करून तालुक्यातील अधिकारी तसेच राजकिय पुढार्‍यांकडूनही हंग...
राजकिय हाडवैर विसरून सर्व गाव एकत्र
पारनेर/प्रतिनिधी : ’हंगा तिथे दंगा’अशी हेटाळणी करून तालुक्यातील अधिकारी तसेच राजकिय पुढार्‍यांकडूनही हंग्याच्या नागरिकांना वेगळी वागणूक दिली जायची. सन 2010 मध्ये गावातील 50 टक्के तंटे एकत्र बसून मिटविले, काही न्यायालयात मिटविले. यंदाच्या ग्रामपंचायत निवडणूकीत सर्व ग्रामस्थांनीच एकत्र बिनविरोध निवडणूक करण्याचा निर्णय घेतला. ग्रामपंचायत निवडणूक बिनविरोध करण्याचे श्रेय सर्व ग्रमस्थांचे आहे, माझे नाही. सर्वांनी राग लोभ विसरून एकत्र येत मतभेदांना तिलांजली दिल्याने आता हंगे गाव नव्हे तर परिवार म्हणून ओळखले जाईल असा विश्‍वास आमदार नीलेश लंके यांनी व्यक्त केला. हंगे गावातून प्रभाग क्रमांक 1 मध्ये राजेंद्र गुलाब दळवी, वनिता बाळासाहेब शिंदे, नीता सुरेश रासकर तर प्रभाग क्रमांक 2 मध्ये जगदीप पोपट साठे, सविता शिवाजी नगरे, रूपाली सोपान दळवीतर प्रभाग क्रमांक 3 मध्ये सुलोचना राजेंद्र लोंढे, राजेंद्र सखाराम शिंदे, प्रभाग क्रमांक 4 मध्ये बाळासाहेब वसंत दळवी, मेघा बाबासाहेव नगरे, माया गणेश साळवे बिनविरोध निवडणून आले आहेत.
ग्रामपंचायतीची निवडणूक बिनविरोध करा व गावाच्या विकासासाठी 25 लाखांचा निधी घ्या या मतदार संघातील गावांना आ. नीलेश लंके यांनी केलेल्या आवाहानास चांगला प्रतिसाद लाभला. लंके यांचे गाव असलेल्या हंगे गावात मात्र त्यांच्या काही पारंपारीक विरोधकांनी अर्ज दाखल केल्याने हंग्याची निवडणूक बिनविरोध होणार का? याची संपूर्ण जिल्हयास उत्सुकता होती. उमेदवारी अर्ज मागे घेण्यास काही तासांचा अवधी शिल्लक असताना अर्ज दाखल केलेल्या विरोधकांनी आ. लंके यांच्याशी चर्चा करून बिनविरोध निवडणूक करण्याची तयारी दर्शविली. विशेष म्हणजे इच्छुकांची संख्या मोठी असल्याने बिनविरोध निवडीमध्ये एकही जागा न घेता विरोधकांनी मनाचा मोठेपणा दाखविला. मतदार संघात निवडणूका बिनविरोध करण्यासाठी आहोरात्र परिश्रम करणार्‍या आ. लंके यांना खाली पाहण्याची वेळ येऊ नये म्हणून ग्रामस्थांनी घेतलेल्या या निर्णयाचे तालुक्यात कौतुक केले जात आहे. बिनविरोध निवडणूकीचा जल्लोष करून सोमवारी रात्री झालेल्या सभेत आ. लंके यांनी केलेल्या तब्बल पाऊन तासांच्या भावनीक भाषणात ग्रामस्थांसह विरोधकांचे विशेष आभार माणले. आता आपण सर्व एक आहोत. नव्याने दाखल झालेल्या सदस्यांच्या राजकिय पुनर्वसनाची तसेच अडीअडचणी दूर करण्याची जबाबदारी माझी असेल असे ते म्हणाले.
परिवाराला गालबोट लागू देणार नाहीः आमदार लंके
हंगे हे आपले कुटूंब आहे. आपल्या या परिवाराला गालबोट न लागू देण्याची काळजी आपण सगळे मिळून घेऊ. गावातील तंटा आता पोलिस ठाण्यात जाणार नाही तर आपला वाद आपणच परिवारात मिटवू. आपण राजकिय स्वार्थासाठी एकत्र आलेलो नाही. ग्रामपंचायतीची निवडणूक बिनविरोध करण्याचा निर्णय देखील राजकिय कारणासाठी झालेला नाही. या निवडणूकीने एकमेकांमधील कटूता दुर करण्याचे मोठे काम केले. एकमेकांमधील क्रोध कमी करणारी ही निवडणूक आहे. गावाच्या विकासाची नांदी म्हणून या निवडणूकीकडे पाहिले जाईल.
