भोपाळ : मध्य प्रदेश सरकारने पोटनिवडणुकांनंतर पहिल्यांदाच मंत्रिमंडळाचा विस्तार केला असून शिवराजसिंह चौहान यांच्या मंत्रिमंडळात खासदार ज्योति...
भोपाळ : मध्य प्रदेश सरकारने पोटनिवडणुकांनंतर पहिल्यांदाच मंत्रिमंडळाचा विस्तार केला असून शिवराजसिंह चौहान यांच्या मंत्रिमंडळात खासदार ज्योतिर्रादित्य शिंदे यांच्या निष्ठावान कार्यकर्त्यांना संधी देण्यात आली आहे. मध्य प्रदेशच्या राज्यपाल आनंदीबेन पटेल यांनी दोन नवीन आमदारांना आज मंत्रिपदाची शपथ दिली.
आमदार तुलसी सिलावट आणि गोविंदसिंह राजपूत यांना मंत्रिपदाची जबाबदारी देण्यात आली आहे. मंत्रिमंडळ विस्तारात भाजपच्या अनेक नेत्यांची नावे आघाडीवर होती; मात्र त्यांना अजून वाट पाहावी लागणार आहे. तुलसी सिलावट आणि गोविंदसिंह राजपूत हे पूर्वाश्रमीचे काँग्रेसचे नेते होते; मात्र ज्योतिरादित्य यांच्यासोबत त्यांनीही भाजपचे कमळ हाती घेतले होते. काँग्रेस सरकार पडल्यानंतर शिवराजसिंह यांनी मुख्यमंत्रिपदाची शपथ घेतली. मुख्यमंत्रिपदी चौथ्यांदा विराजमान झाल्यानंतर त्यांनी मंत्रिमंडळाचा विस्तार केला. त्यामध्ये पाच जणांना मंत्रिपदाची शपथ देण्यात आली होती. त्यामध्ये तुलसी सिलावट आणि गोविंद सिंह राजपत यांनाही संधी मिळाली होती; मात्र सहा महिन्यांत पोटनिवडणूक न लागल्यामुळे त्यांना आपल्या मंत्रिपदाचा राजीनामा द्यावा लागला; पण नंतर झालेल्या पोटनिवडणुकीत या दोन्ही नेत्यांनी विजय मिळवला. त्यानंतर, आज झालेल्या मंत्रिमंडळ विस्तारात त्यांना शिवराजसिंह यांच्या मंत्रिमंडळात स्थान देण्यात आलेे. दरम्यान, शिवराजसिंह यांच्या सरकारमध्ये आणखी तीन जागा शिल्लक असून तेथे कोणाची वर्णी लागणार, याकडे सर्वांचे लक्ष लागले आहे.
