मुंबई/प्रतिनिधी : मुंबईतील ड्रग्ज फॅक्टरीचा मास्टरमाईंड आरिफ भुजवाला याला नार्कोटिक्स कंट्रोल ब्यूरोने बेड्या ठोकल्या आहेत. भुजवाला हा दाऊद ...
मुंबई/प्रतिनिधी : मुंबईतील ड्रग्ज फॅक्टरीचा मास्टरमाईंड आरिफ भुजवाला याला नार्कोटिक्स कंट्रोल ब्यूरोने बेड्या ठोकल्या आहेत. भुजवाला हा दाऊद गँग आणि दुबईतील ड्रग्ज नेटवर्कच्या थेट संपर्कात होता. एनसीबीने केलेल्या छापेमारीपासून भुजवाला फरार होता. अखेर त्याला रायगडमधून अटक करण्यात आली. भुजवालाला प्रति दाऊद असेही म्हटले जाते.
कुख्यात अंडरवर्ल्ड डॉन दाऊद इब्राहिमच्या ड्रग्ज नेटवर्कचा पर्दाफाश करत एनसीबीने भुजावालाच्या घरावर धाड टाकली होती. भुजवाला मुंबईतील डोंगरी भागात ड्रग्जची फॅक्टरी चालवत होता. छापेमारीसाठी एनसीबी भुजवालाच्या घरी पोहोचली, तेव्हा तो खिडकीतून उडी मारुन पसार झाला. एनसीबीच्या हातावर तुरी देऊन भुजवाला पसार झाला; मात्र ड्रग्ज तयार करण्यासाठी लागणारा 12 प्रकारचा कच्चा माल, कोट्यवधी रुपयांची रोकड आणि हत्यारे जप्त करण्यात आली होती. भुजवालाने आपले जाळे फक्त मुंबईतच नव्हे, तर परदेशापर्यंत पसरवले होते. अंडरवर्ल्ड माफिया करीम लालाचा नातेवाइक चिंकू पठाणला एनसीबीने गजाआड केले आहे. पठाणच्या चौकशीत आरिफ भुजवाला आणि त्याच्या ड्रग्ज फॅक्टरीची माहिती समोर आली. त्यानंतर दाऊदच्या नेटवर्कमधील महत्त्वाचा दुवा असलेल्या भुजावालाला पकडण्याची योजना एनसीबीने आखली होती. एनसीबीचे डॅशिंग अधिकारी समीर वानखेडे यांनीच डी कंपनीच्या ड्रग्ज रॅकेटचा पर्दाफाश केला. दाऊदच्या डोंगरीत घुसून त्यांनी कारवाई केली. इतकेच नाही, तर दाऊदच्या हस्तकांच्या मुसक्याही आवळल्या. वानखेडे यांनी डोंगरीतील ड्रग्जची फॅक्टरी उद्ध्वस्त केली. त्यामुळे वानखेडे यांच्या सुरक्षेत वाढ करण्यात आली आहे. करण सजनानी ड्रग कनेक्शनमध्ये समीर खान यांचे नाव समोर आले. त्यानुसार आम्ही त्यांना चौकशीला बोलवल आणि यात त्याची भूमिका संशयास्पद आढळल्याने त्यांना अटक केली आहे. याच प्रकरणात वांद्रयामधून एका व्यक्तीला एनसीबी कार्यालयात आणण्यात आले आहे. त्याचीही चौकशी सुरू आहे, अशी माहिती वानखेडे यांनी दिली. समीर खान आणि करण सजनानी यांच्यात किरकोळ रकमेचे व्यवहार झाले नसून ते मोठे आहेत. शिवाय समीर खानने ड्रग्स सेवन केल्याचे पुरावे आहेत. त्याआधारे त्यांच्यावर अटकेची कारवाई करण्यात आली, असे त्यांनी सांगितले.
