सातारा-सांगली जिल्ह्यात कोविडच्या लसीकरणासाठी प्रशासनाची तयारी सुरु

अनेक ठिकाणी यंत्रणा उभी करणार : ना. बाळासाहेब पाटील कराडसह इस्लामपूर येथील उपजिल्हारुग्णालयात लसीकरणाचा ड्राय रन  सातारा / प्रतिनिधी : कोविड...

अनेक ठिकाणी यंत्रणा उभी करणार : ना. बाळासाहेब पाटील

कराडसह इस्लामपूर येथील उपजिल्हारुग्णालयात लसीकरणाचा ड्राय रन 

सातारा / प्रतिनिधी : कोविड 19 चा प्रादुर्भाव रोखण्यासाठी शासनाने शर्थीने प्रयत्न केले. ’माझं कुटूंब, माझी जबाबदारी’ ही मोहिम राबवून नियंत्रण मिळवले. आता लस येण्याचा टप्पा जवळ आला असून जिल्हा प्रशासनाने त्याचे योग्य नियोजन सुरु केले आहे. सातारा जिल्ह्यात अनेक ठिकाणी मोठ्या प्रमाणात यंत्रणा उभी केली जाणार आहे. त्याचाच भाग म्हणून आज जिल्ह्यात तीन ठिकाणी पूर्व तयारी म्हणून ड्राय रन घेण्यात आला आहे, असे जिल्ह्याचे पालकमंत्री बाळासाहेब पाटील यांनी सांगितले.

कराड येथील वेणूताई चव्हाण उपजिल्हा रुग्णालयात कराड येथे उपजिल्हा रुग्णालयात पालकमंत्री बाळासाहेब पाटील यांच्या उपस्थितीत कोविड लसीकरणाचा ड्रायरन झाला. त्यावेळी ते बोलत होते. त्या प्रसंगी जिल्हा परिषद मुख्य कार्यकारी अधिकारी विनयकुमार गौडा, जिल्हा शल्यचिकीत्सक डॉ. सुभाष चव्हाण, उपविभागीय अधिकारी उत्तम दिघे यांच्यासह अधिसेविका व परिचारीका आदी उपस्थित होते.

सातारा येथे क्रांतीसिंह नाना पाटील सर्वसाधारण रुग्णालयात जिल्हाधिकारी शेखर सिंह यांच्या उपस्थितीत कोविड लसीकरणाचा ड्रायरन झाला. यावेळी आरोग्य सेवा पुणे मंडळाचे उपसंचालक डॉ. संजय देशमुख, अतिरिक्त जिल्हा शल्यचिकित्सक रामचंद्र जाधव, निवासी  वैद्यकीय अधिकारी चंद्रशेखर कारंजकर, जिल्हा परिषदेचे अतिरिक्त जिल्हा आरोग्य अधिकारी डॉ. सचिन पाटील, माता बाल संगोपन अधिकारी प्रमोद शिर्के, प्रशिक्षण केंद्र वैद्यकीय अधिकारी केम्पी पाटील, अधिसेविका व परिचारीका आदी उपस्थित होते.

इस्लामपूर / प्रतिनिधी : सांगली जिल्ह्यात जानेवारीच्या अखेरीस कोरोनाची लस उपलब्ध झाल्यानंतर ती कशी द्यायची? काय खबरदारी घ्यायची? याची रंगीत तालीम इस्लामपूर येथील उपजिल्हा रुग्णालयात घेण्यात आली. प्रतिक पाटील यांनी या मोहिमेचा शुभारंभ केला. सांगली जिल्ह्यातील कवलापूर व सांगली (हनुमाननगर) येथेही ही रंगीत तालीम घेण्यात आली.

यावेळी उपसंचालिका डॉ. सौ. माने, अतिरिक्त जिल्हा शल्यचिकित्सक डॉ. संजय पाटील, प्रांताधिकारी नागेश पाटील, गट विकास अधिकारी शशिकांत शिंदे, निवासी वैद्यकीय अधिकारी डॉ. वाय. बी. कांबळे, उपजिल्हा रुग्णालयाचे वैद्यकीय अधिकारी डॉ. नरसिंह देशमुख, कोविड विभाग प्रमुख राणोजी शिंदे, तालुका आरोग्य अधिकारी साकेत पाटील प्रामुख्याने उपस्थित होते.

राज्याचे आरोग्यमंत्री राजेश टोपे यांच्या सूचनेवरून सांगली जिल्हा परिषद व सिव्हिल हॉस्पिटलच्या वतीने सांगली जिल्ह्यात तीन ठिकाणी ही रंगीत तालीम घेण्यात आली. यामध्ये इस्लामपूर येथील उपजिल्हा रुग्णालय,कवलापूर येथील प्राथमिक आरोग्य केंद्र व सांगली (हनुमाननगर) या ठिकाणांचा समावेश आहे.

इस्लामपूर येथे 29 कर्मचार्‍यांवर कोरोना लस देण्याचे प्रात्यक्षिक करण्यात आले. प्रत्यक्ष लस दिली नाही. मात्र, लस कशी द्यायची? त्यानंतर अर्धा तास काय काळजी घ्यायची? ही सर्व माहिती ऑन लाईन कशी भरायची? याचे प्रात्यक्षिक घेण्यात आले. प्रतिकदादा पाटील यांनी या सर्व प्रक्रियेची सविस्तर माहिती घेत, हॉस्पिटलच्या विभागांची पाहणी केली.

डॉ. नरसिंह देशमुख माहिती देताना म्हणाले, पहिल्या टप्प्यात शासकीय व खाजगी डॉक्टर,आरोग्य कर्मचारी,व आशा वर्कर्स यांना ही लस दिली जाणार आहे. तर दुसर्‍या टप्यात पोलीस,भारतीय जवान, प्रशासनातील कर्मचारी व महानगर पालिकेच्या कर्मचार्‍यांना ही लस देण्यात येणार आहे. तिसर्‍या टप्यात 50 वयो गटाच्या पुढचे व इतर आजार असणार्‍या रुग्णांना लस देण्यात येणार आहे. या सर्व नियोजनासाठी ही रंगीत तालीम घेण्यात आली.