स्टँडिंग वॉरंटमुळे बोठेचा शोध घेणे पोलिसांना सोपे

  उच्च न्यायालयात अटकपूर्व जामीनअर्ज दाखल; पारनेरमध्ये युक्तिवाद अमान्य अहमदनगर/प्रतिनिधी: यशस्विनी महिला ब्रिगेडच्या अध्यक्ष रेखा जरे खून प...

 

उच्च न्यायालयात अटकपूर्व जामीनअर्ज दाखल; पारनेरमध्ये युक्तिवाद अमान्य

अहमदनगर/प्रतिनिधी: यशस्विनी महिला ब्रिगेडच्या अध्यक्ष रेखा जरे खून प्रकरणातील मुख्य संशयित आरोपी, सकाळचा माजी कार्यकारी संपादक बाळ बोठे याच्याविरुद्ध स्टँडिंग वॉरंट जारी करण्यात आले आहे. यासाठी पोलिसांनी पारनेर न्यायालयात दाखल केलेला अर्ज न्यायालयाने मंजूर केला आहे.

जरे यांचा खून झाल्यानंतर फरार असलेल्या बोठेचा ठावठिकाणा अद्याप लागू शकलेला नाही. त्याला पकडण्यासाठी स्टँडिंग वॉरंट मिळावे, म्हणून पोलिसांतर्फे पारनेरच्या न्यायालयात अर्ज दाखल करण्यात आला होता. त्यावर सुनावणी झाल्यानंतर प्रथम वर्ग न्यायदंडाधिकारी उमा बोराटे यांनी हा अर्ज मंजूर करून आरोपीविरूद्ध स्टँडिंग वॉरंट काढण्याचा आदेश दिला आहे. तपासी अधिकारी अजित पाटील यांनी पारनेर न्यायालयात एक जानेवारीला हा अर्ज दाखल केला होता. बोठे याच्यावतीने या अर्जाला आव्हान देण्यात आले होते. त्याच्यावतीने अ‍ॅड. संकेत ठाणगे यांनी न्यायालयासमोर म्हणणे मांडले. आरोपी फरार नसून अटकपूर्व जामीनअर्जासाठी प्रयत्न करीत आहे, तो आरोपीचा हक्कच आहे, अशी बाजू त्यांनी मांडली; मात्र न्यायालयाने हा युक्तिवाद फेटाळून फरारी आरोपीविरुद्ध स्टँडिंग वॉरंट काढण्याचा आदेश दिला. त्यामुळे आता बोठे याच्यापुढील अडचणी वाढल्या आहेत. 

या वॉरंटमुळे बोठे याला राज्यात व अन्य राज्यात पकडणे शक्य होणार आहे. आरोपीच्या वतीने सत्र न्यायालयात अटकपूर्व जामिनासाठी केलेला अर्ज फेटाळण्यात आला होता. त्याविरोधात मुंबई उच्च न्यायालयाच्या औरंगाबाद खंडपीठात अपील केल्याचे सांगण्यात आले असले, तरी त्यावर अद्याप सुनावणी झालेली नाही. पारनेर न्यायालयाने दिलेल्या आदेशामुळे पोलिसांच्या तपास कामाला मदत होणार आहे. आता या आधारे आम्ही पुढील हालचाली सुरू करणार आहोत. पुढील टप्प्यात आणखी काही कायेदशीर प्रक्रियांचा आधार घेतला जाऊ शकतो, असे पाटील यांनी सांगितले.

तत्पूर्वी अ‍ॅड. संकेत ठाणगे यांनी बोठेचा अटकपूर्व जामीनअर्ज जिल्हा न्यायालयात फेटाळण्यात आल्यानंतर त्याविरोधात मुंबई उच्च न्यायालयाच्या औरंगाबाद खंडपीठात 31 डिसेंबर रोजीच आपील केले आहे. त्यावरील सुनावणी अद्याप प्रलंबित आहे. त्यापूर्वीच पोलिसांनी पारनेरला स्टँडिंग वॉरंटसाठी अर्ज करणे योग्य नाही, असे म्हणणे मांडले होते. या गुन्ह्यात अटकपूर्व जामीन मिळविण्याचा आरोपीला अधिकार आहे. तशी कायद्यात तरतूद आहे. त्यावर निर्णय होण्याआधीच स्टँडिंग वॉरंटसाठी अर्ज दाखल केला आहे. यातून बोठेला पोलिसांकडून टार्गेट केले जात आहे. बोठेला जामीन मिळवून द्यायचा नाही, असेच यातून दिसते, असे म्हणणे मांडण्यात आले.