डबेवाले संघटनेचे माजी अध्यक्ष तळेकरांना अटक

डबेवाल्यांची आर्थिक फसवणूक केल्याचा आरोप; पैसे घेऊनही मोटारसायकली नाहीत मुंबई / प्रतिनिधी : मुंबईच्या डबेवाला संघटनेचे माजी अध्यक्ष सुभाष तळ...

डबेवाल्यांची आर्थिक फसवणूक केल्याचा आरोप; पैसे घेऊनही मोटारसायकली नाहीत

मुंबई / प्रतिनिधी : मुंबईच्या डबेवाला संघटनेचे माजी अध्यक्ष सुभाष तळेकर यांना घाटकोपर पोलिसांनी पुण्यातून अटक केली आहे. तळेकर यांच्यावर मुंबईच्या डबेवाल्यांची फसवणूक केल्याचा आरोप आहे. डबेवाल्यांना मोटारसायकल देण्याच्या नावाखाली कागदपत्रे जमा करून त्यावर सह्या घेतल्या. भैरवनाथ नागरी पतपेढीतून कर्ज काढून मोटारसायकल न देता कर्जाची रक्कम परस्पर लाटली, असा त्यांच्यावर आरोप आहे. तळेकर यांना घाटकोपरमधील चिराग नगर पोलिसांनी काल रात्री गडत ( ता. खेड जि. पुणे) येथून अटक केली.  

    

तळेकर यांच्यावर डबेवाल्यांना मोफत दुचाकी देण्याच्या प्रकरणातफसवणुकीचा गुन्हा दाखल झाला होता. ज्याअंतर्गत घाटकोपर पोलिसांकडून तळेकर यांना अटक करण्यात आली. फेब्रुवारी 2020 मध्ये घाटकोपर पोलिस स्थानकात यासंबंधी फिर्याद दाखल करण्यात आली होता. मुंबईच्या डब्बेवाल्यांनीच ही फिर्याद दिली होती. त्या वेळी तळेकर मुंबई डबेवाला संघटनेचे पदाधिकारी होते. तेव्हा त्यांनी दुचाकी मोफत देण्याच्या नावाखाली डब्बेवाल्यांची काही कागदपत्रे घेतली होती; पण त्यानंतर डबेवाल्यांचा दुचाकी उत्पादक, विक्रेत्या कंपन्यांकडून फोन येऊ लागले नवी मुंबईतील भैरवनाथ नागरी पतंस्थेच्या मदतीने मुंबईच्या डबेवाल्यांना मोफत टीव्हीएस मोपेड ही दुचाकी देणार असल्याचे सांगून तळेकर यांनी साठ डबेवाल्यांकडून त्यांची कागदपत्रे गोळा केली होती. त्यानुसार काही डबेवाल्यांना दुचाकी मिळाल्या; परंतु त्यांना आरटीओचा परवाना नव्हता. अनेक डबेवाल्यांना दुचाकी तर मिळाली नाहीच; परंतु त्यांच्या खात्यातून पैसेदेखील वजा होऊ लागले. तसेच काही डबेवाल्यांना कर्ज फेडण्यासाठी पतपेढी करून फोन येऊ लागले. आपली फसवणूक झाल्याचे कळताच काही डबेवाल्यांनी चार फेब्रुवारी 2020 रोजी घाटकोपर पोलिस ठाण्यात सुभाष तळेकर यांच्या विरोधात तक्रार दाखल केली. या तक्रारीवरून घाटकोपर पोलिसांनी अखेर तळेकर यांच्या विरोधात फसवणुकीचा गुन्हा दाखल करून त्यांना अटक केली आहे.  तळेकर यांच्या व्यतिरिक्त डबेवाला असोसिएशनचे माजी सचिव विठ्ठल सावंत, सदस्य दशरथ केदारे, साई इंटरप्राईजेसचे राकेश प्रसाद आणि भावेश दोषी यांच्यावरदेखील गुन्हा दाखल केला आहे. पुढील तपास घाटकोपर पोलिस करत आहेत.