शिवसेना-भाजपचे परस्परांवर आरोप-प्रत्यारोप; महापालिकेची पोलिसांत तक्रार मुंबई / प्रतिनिधी: अनधिकृत बांधकामप्रकरणी अभिनेता सोनू सूदविरोधात मुं...
शिवसेना-भाजपचे परस्परांवर आरोप-प्रत्यारोप; महापालिकेची पोलिसांत तक्रार
मुंबई / प्रतिनिधी: अनधिकृत बांधकामप्रकरणी अभिनेता सोनू सूदविरोधात मुंबई महापालिकेने पोलिसांत तक्रार केली आहे. त्यामुळे भाजप आणि शिवसेना आमनेसामने उभी ठाकली आहे. सूद शिवसेनेला खटकत असल्यानेच त्याच्यावर कारवाई करण्यात आल्याचा आरोप भाजपने केला आहे. त्यामुळे दोन्ही पक्षात कलगीतुरा रंगण्याची शक्यता आहे. दुसरीकडे गुन्हा दाखल झाल्याने सोनू पुढे काय करणार, याबाबत सर्वांनाच उत्सुकता लागली आहे. भाजपचे प्रवक्ते राम कदम यांनी या प्रकरणात उडी घेऊन शिवसेनेवर जोरदार टीका केली.
केवळ सूड भावनेतूनच सोनूविरोधात कारवाई करण्यात आली आहे. टाळेबंदी काळात जनतेला मदत करण्यात राज्य सरकार अपयशी ठरले होते. त्या वेळी जे सरकारने करायला हवे, ते काम सोनूने केले होते. त्यामुळे शिवसेनाचा जळफळाट झाला, अशी टीका कदम यांनी केली. आधी कंगनावर कारवाई केली. आता सोनू सूदवर कारवाई करण्यात येत आहे. हे ठाकरे सरकार आहे की सुडाचे सरकार? कंगनाच्या कार्यालयावर जेसीबी पाठवला. आता सोनूचा नंबर? गरीब मजुरांना स्वत:च्या पैशाने गावी पाठवण्याचे काम सरकारचे होते. ते सोनूने केले. त्याचा दोष काय? इतका द्वेष येतो कुठून? असा सवाल त्यांनी केला. कोरोना संकट काळात सोनूचे हॉटेल विलगीकरण केंद्र म्हणून चालले. त्या वेळी हे हॉटेल अनधिकृत नव्हते. आता अचानक हे हॉटेल अनधिकृत कसे झालं? आपण अनधिकृत हॉटेलात विलगीकरण केंद्र तयार करत नाही ना, याची पडताळणी पालिका अधिकार्‍यांनी का केली नाही, असा सवाल कदम यांनी केला. मुंबई महाापालिकेच्या तक्रारीत म्हटले आहे, की सोनू सूद यांनी स्वत: जमिनीच्या वापरात बदल केला आहे. त्याशिवाय निश्‍चित आराखड्यात अतिरिक्त बदल करून रहिवासी इमारतीला हॉटेलच्या इमारतीत रुपांतरीत केले. यासाठी त्यांनी अथॉरिटीकडून आवश्यक ती परवानगी घेतलेली नाही.
इतकेच नाही, तर सोनूला महापालिकेने बजावलेल्या नोटिशीकडे त्याने दुर्लक्ष केल्याचाही आरोप केला आहे. नोटीस दिल्यावरही या इमारतीत अनधिकृत बदल करण्यात आले. त्यांनी महाराष्ट्र प्रदेश आणि नगररचना (एमआरटीपी) कायदा कलम 7 अंतर्गत गुन्हा केला आहे. अधिकार्‍यांच्य ामते, मुंबई महापालिकेने दिलेल्या नोटिशीविरोधात सोनू सूदने मुंबईच्या दिवाणी न्यायालयात याचिका दाखल केली होती; पण त्यांना अंतरिम दिलासा मिळाला नाही. न्यायालयाने सोनू सूदला उच्च न्यायालायत याचिका करण्यासाठी तीन आठवड्यांचा कालावधी दिला होता. महापालिकेच्या मते न्यायालयाने दिलेला तीन आठवड्यांचा कालावधी संपला आहे
